AQSh dıplomatynyń qoldaýy

О́tken jumada Batys elderiniń saıası elıtasy men tanymal sarap­shylarynyń nazaryn AQSh Mem­leket­tik hatshysynyń orynbasary Robert Bleıktiń Karnegı qorynda eýrazııalyq taqyrypta sóılegen sózi álem nazaryn aýdardy. Álemge áıgili bul zertteý ortalyǵy qazirgi tańda túbi tereńde jatqan saıası ıdeıalardy beıresmı jaǵdaıda málimdeýge qolaıly biregeı alańǵa aınalyp úlgergen. Joǵary laýazymdy dıplomat óz sózinde AQSh syrtqy saıa­sa­tynda ortaazııalyq aımaqtyń ma­ńyzdylyǵyn jáne Qazaqstannyń EQYU tóraǵalyǵy aıasynda Qyr­ǵyzstandaǵy janjaldy retteýge qosyp júrgen úlesin aıta kelip, AQSh-tyń Astanada ótetin EQYU sammıtine qoldaý bildi­re­tinin jetkizdi. R.Bleık óz eliniń syrtqy saıası múddeleri úshin Or­talyq Azııada turaqtylyq saq­talýynyń mańyzyn AQSh-tyń dıplomatııalyq vedomstvosy jete túsinetindigin atap ótti. Or­talyq Azııadaǵy bes memlekettiń erekshelikterin, olardyń tolyq táýelsizdigi men derbes damyp ke­le jatqandyǵyn moıyndaı oty­ryp, “AQSh óńirlik qaýipsizdik pen turaqtylyqty nyǵaıtýda biz­ben jáne bizdiń áriptesterimizben yntymaqtastyq ornatqan jáne álemdik ekonomıkaǵa sińisip ket­ken táýelsiz demokratııalyq elder retindegi damýyn qoldaıdy”, dedi ol. Robert Bleıktiń atap ótýinshe, Barak Obamanyń Prezıdent bolyp saılanýy onyń saıası komandasyna Ortalyq Azııa elderimen kópjaqty yntymaqtastyqty keńeıtý jáne óńirdegi memlekettermen belsendi únqatysýdy damytýǵa basymdyq beredi. “Kózdeıtinimiz, Ortalyq Azııa elderiniń árqaısysymen, bizdiń ulttyq múddelerimiz ben olardyń erekshelikteri men damýynyń negizinde kemeldengen ekijaqty qatynastar ornatý”, dedi dıplomat osy jaıynda. R.Bleık sondaı-aq osy jyldyń 16-17 shildesinde Almatyda ótken EQYU syrtqy ister mınıstr­le­ri­niń beıresmı kezdesýine AQSh Memlekettik departamentiniń bergen baǵasy jóninde oı bólisti. Aıta keteıik, Almaty kezdesýinde R.Bleık AQSh Memlekettik hatshy­sy­nyń birinshi orynbasary Djeıms Staınberg bastaǵan ame­rıkalyq delegasııanyń quramynda laýazymy jaǵynan ekinshi adam retinde qatysqan bolatyn. Karnegı qory­nyń paıymdaýynsha, EQYU-nyń Astana sammıti tarıhı ma­ńyzǵa ıe bolady. “Bul EQYU-nyń sońǵy 11 jylda joǵary deńgeıde uıymdas­tyrylyp otyrǵan birinshi kezdesýi bolmaq. Sonymen qatar tarıhta bi­rinshi ret mundaı basqosý ortaazııa­lyq elde ótkiziledi. Atalǵan kezdesý bul aımaqtaǵy jaǵdaılarǵa serpin berip, Uıymnyń qaǵıdattaryn EQYU keńistigine taratýǵa yqpal etedi dep senemin”, – dedi ol. R.Bleıktiń aıtýynsha, Qazaq­stannyń EQYU tóraǵasy qyz­me­tindegi jumysyn joǵary baǵalap otyr. Ásirese, Qyrǵyzstandaǵy jaǵdaıǵa qatysty. Sebebi, Uıym beıbitshilik pen demokratııany or­natýǵa jáne taraptardy tatýlas­ty­rýǵa tikeleı atsalysyp, sol má­selelerdi sheshýdiń ortasynda boldy. “Biz Qazaqstannyń Qyr­ǵyz­stan­daǵy jaǵdaıdy retteýde, EQYU-nyń áreketterin úılesti­rý­degi kúsh-jigerin joǵary baǵalaı­myz”, – dedi R.Bleık. Atap aıt­qanda, EQYU-nyń Qyrǵyzstanǵa polıseı keńesshilerin jiberý jónindegi sheshimniń qabyldanýyna, Bishkektegi EQYU ortalyǵynyń múmkindikterin qarjylaı nyǵaı­tý­ǵa jáne kúzge josparlanǵan par­la­menttik saılaýdy baqylaýda Demo­kratııalyq ınstıtýttar men adam quqyqtary jónindegi bıýronyń (DIAQB) mıssııasyn qoldaýǵa qazaq dıplomattarynyń qosqan úlesi aıtarlyqtaı. Ekonomıkalyq jaǵynan qýatty kórshi bola tura Qazaqstan Qyr­ǵyz­standa ekonomıkalyq jáne áleý­mettik turaqtylyqqa qol jet­kizýde sheshýshi rólge ıe”, – dedi R.Bleık myrza. “Egemen-aqparat”.