Azamattar quqy jaqsy qorǵalýy tıis

Memleket basshysy Nur­sul­tan Nazarbaev Aqordada elimiz­diń quqyq qorǵaý júıesin refor­malaý máseleleri boıynsha keńes ótkizdi, dep habarlady Qazaq­stan Respýblıkasy Prezıdenti­niń baspasóz qyzmeti. Keńeske Premer-Mınıstr Kárim Másimov, Prezıdent Ákim­shiliginiń Basshysy Aslan Mýsın, Qazaqstan Respýblıkasy Prezı­dentiniń kómekshisi – Qaýipsizdik Keńesiniń hatshysy Marat Tá­jın, Konstıtýsııalyq Keńestiń Tóraǵasy Igor Rogov, Bas Prokýror Qaırat Mámı, Ádilet mınıstri Rashıd Túsipbekov, Pre­zıdent Ákimshiligi Basshysynyń orynbasary Talǵat Donaqov qatysty. Keńesti ashqan Elbasy quqyq qorǵaý júıesin reformalaý min­deti óziniń “Jańa onjyldyq – jańa ekonomıkalyq órleý – Qa­zaqstannyń jańa múmkindikteri” atty Qazaqstan halqyna bıylǵy Joldaýynda baıandalǵanyn atap ótti. Joldaýda Qazaqstan quqyq qorǵaý júıesin reformalaýdyń birqatar baǵyttary – quqyq qor­ǵaý júıesin ońtaılandyrý, árbir memlekettik organnyń aıqyn quzyretterin túzip shyǵý, zańdardy izgilendirý men sapasyn arttyrý qajettigi daralap kórsetilgen bo­latyn. Osyǵan baılanysty Mem­leket basshysy Úkimetke quqyq qorǵaý júıesin reformalaý tý­ra­ly zań jobasyn joǵary halyq­ara­lyq qalyptarǵa saı bolatyn­daı etip ázirlep, bıylǵy jyly Parlamentke engizýdi tapsyrdy. Memleket basshysy qylmys­syz­dandyrýǵa basa nazar aýdarý qajet ekenin atap ótti. Zańdar álde­qaıda izgilengen bolýy tıis, al bas bostandyǵynan aıyrý túrin­degi jazany keı jaǵdaılarda iri kólemde aıyp salý nemese qoǵamdyq jumystarǵa tartý se­kildi balama sharalarmen aýys­ty­rý­ǵa bolar edi. Sondaı-aq, jaza­syn óteý oryndarynan bosatyl­ǵan­dardyń qaıtadan qylmysker­ler qataryn tolyqtyrmaýy úshin olardy beıimdeýmen aınalysý da mańyzdy bolmaq. – Quqyq qorǵaý vedom­stvo­lary­nyń birin-biri qaıtalaýyn boldyrmaı, olardyń jumysyn tıim­di etý, álemdik tájirıbeni paıdalana otyryp, burynǵy ke­ńestik júıeniń keleńsiz mura­lary­nan arylý qajet. Biz ótken jyldarda kóp is atqardyq. Muny barlyq álemdik sarapshylar aı­typ otyr. Endi osy reformany at­qarý qaldy. Biz óz azamat­ta­ry­myzdyń quqyqtary jaqsy qor­ǵal­ǵanyn, kásipkerlerdiń qorǵal­ǵanyn, quqyq qorǵaý júıesiniń ózindegi sybaılas jemqorlyqqa tosqaýyl qoıylǵanyn qalaımyz. Jaýapkershilikti kúsheıtý mańyz­dy jáne bul organdardyń ár­qaısysy óz isimen aınalysa­tyndaı etý kerek, – dep atap kórsetti Prezıdent. Keńeste Premer-Mınıstr K.Másimov sóz sóıledi. Úkimet basshysy Prezıdent Joldaýynda aıtylǵan árbir baǵyt boıynsha qurylǵan komıssııalardyń jumysy týraly, eldiń quqyq qorǵaý júıesin reformalaýdyń quqyqtyq bazasyn jasaýdy kózdeıtin zań shyǵarý jumysynan habardar etti. Keńes qorytyndysynda Prezıdent birqatar naqty tapsyrmalar berdi. ---------------------------------- Sýretti túsirgender S.BONDARENKO, B.OTARBAEV.