Jyl saıyn Japonııanyń Hırosıma qalasynda atom bombasynan qaza tapqandardy eske alý sharalary ótedi. Bıyl alǵash ret oǵan sol atom bombasyn tastaǵan AQSh eliniń ókili de qatysyp otyr. Sondaı-aq onyń odaqtastary bolǵan Ulybrıtanııa men Fransııa ókilderi de kelipti. Eń bastysy – sharaǵa BUU Bas hatshysy Pan Gı Mýn qatysty. Sirá, Semeı polıgonyndaǵy alǵashqy jarylys bolǵan kúni synaqtyń zardabyn shekkenderdi de eske alyp jatsaq, jón sııaqty-aý.
Qastandyq pa, qýanysh pa?
Iran prezıdenti Mahmud Ahmadınejadqa qastandyq jasaldy degen habardy, bálkim, álemniń barlyq aqparat quraldary taratqan shyǵar-aý. Onyń mazmuny: laqtyrylǵan granata prezıdentke jetpegen, jetse ony qatty jaralaýy múmkin eken. О́ıtkeni, bul granata jýrnalıster mingen avtobýsty aıtarlyqtaı zaqymdap, ondaǵy biraz adam jaraqat alypty. Shyn máninde bul eshqandaı qastandyq emes, ol prezıdenttiń kelgenine óz qýanyshyn bildirgen adamnyń ózi jasaǵan oıynshyǵynyń jarylysy ǵana eken. Jaralanǵan jýrnalıster de joq kórinedi. Qastandyq bolmaǵanyn prezıdent ákimshiligi aıtyp otyr.
Aǵash úshin atysypty
Izraıl men Lıvan shekarasynda atys bolyp, odan bes adam: tórt lıvandyq jáne bir ızraıldik áskerı qaza tapqan. Lıvan jaǵynyń aıtýynsha, Izraıl soldattary shekaradan ótip, aǵash kese bastapty. Al osyndaǵy BUU-nyń ýaqytsha kúshteriniń ókili kesilgen aǵash Izraıl aýmaǵynda ekenin aıtady. Qalaı bolǵanda da, aǵash úshin atystan adamdar ólgen.
Kolýmbııada – jańa prezıdent
Senbi kúni Kolýmbııanyń jańa prezıdenti Hýan Manýel Santostyń qyzmetine kirisý rásimi ótti. Jurt nazaryn aýdarǵan bir jaı – jańa prezıdent kúni keshe dıplomatııalyq qatynastaryn úzgen kórshi el Venesýelamen til tabysýǵa umtylatynyn málimdedi. Buǵan kórshi eldiń atyna biraz qatty sóz aıtyp qalǵan Venesýela prezıdenti Ýgo Chaves barynsha yqylaspen ún qatty. Iá, bul onyń ózi orynsyz basqan qadamdardan qaıtqan bir sáti.
Lańkestik qaıdan?
Irakta lańkestik áreketter barǵan saıyn órshı túsýde. Shilde aıynda odan 535 adam qaza tapqan. Nege degen suraqqa jaýapty jurt ıslamnyń eki tarmaǵy: shıızm men sýnnızmniń arasynan izdeıdi. Lańkestik áreketter kóktemdegi parlament saılaýynan keıin kóbeıgen. Elde álige deıin úkimet qurylǵan joq. Onyń basshylyǵyna “Ál-Irakıa” sýnnıttik bloktyń jetekshisi Aııad Allaýı men sheııtterdiń kósemi, qazirgi premer-mınıstr Nýrı ál-Malıkı talasyp júr. Olardy qoldaıtyndar bir-birine qarsy lańkestik áreketterge de baratyn kórinedi.
Syrtqa – tyıym
Reseı Premer-mınıstri Vladımır Pýtın qurǵaqshylyqqa baılanysty Reseı aýmaǵynan astyqty eksportqa shyǵarýǵa ýaqytsha tyıym salynatynyn málimdedi. Bul tyıym jyldyń sońyna deıin josparlanyp otyr. Odan keıingisi belgisiz. Bul málimdemeden keıin astyqtyń baǵasy dúnıe júzinde sharyqtap shyǵa kelgen. Aıtalyq, sol astyqty kóp óndiretin AQSh-tyń ózinde ol 70 paıyzǵa ósken. Reseı óziniń kedendik áriptesteri Belarýs pen Qazaqstannan da solaı etýdi ótinse kerek. Árkim ózinshe sheshkeni jón, árıne. Qazaqstan ázirge astyqty syrtqa shyǵarýǵa tyıym salamyn dep otyrǵan joq.
Án aıtyp el basqarmaq
Bıyl Gaıtıde qatty jer silkinisinen keıin alǵash ret prezıdent saılaýy ótedi. Amerıkalyq reper Ýaıklef Djın prezıdenttikke kandıdat bolyp tirkelipti. Birqatar sarapshylardyń pikirinshe, onyń múmkindigi ájepteýir joǵary kórinedi. Jastar arasynda tanymal eken. Biraq el basqarý óleń aıtyp júrip atqaratyn sharýa emes-aý.
Qaıyrymdy qumarpaz
Amerıkanyń Las-Vegas qalasyndaǵy atyn jasyryp júrgen bir baı adam zárýlikke ushyraǵandarǵa 1 mıllıard dollardaı qarjy úlestirip úlgeripti. Onyń aldynda sonaý basta dúnıe tabýdyń eki joly turǵan eken: biri – esirtki saýdasy, ekinshisi – qumar oıyn. Sońǵysyn tańdaǵan ol aıtarlyqtaı qarjy jınap, endi ony muqtajdyq kórgenderge berip júrgen kórinedi. Ol osynaý ıgi iske basqa baılardy da shaqyrypty.
Ázirlegen Mamadııar JAQYP.
