Shtork shákirtteriniń úshinshi jeńisi

Sársenbi kúni jer júziniń bir­qatar elderinde fýtboldan joldas­tyq kezdesýler ótti. Solardyń biri Qazaqstan men Oman ulttyq quramalarynyń arasynda oınaldy. Kezdesýde esep 3:1 bolyp alań ıeleriniń paıdasyna sheshildi. Qazaqstan quramasy dál osyn­daı esppen sońǵy ret irikteý týrnı­rinde Andorra komandasyn jeńge­nin bilemiz. Al osy jolǵy Omanmen ótken match elordanyń halyqaralyq ta­laptarǵa saı keletin, dúnıe júzin­degi eń ádemi bes stadıonynyń biri sanalatyn “Astana-Arena” jabyq stadıonynda ótti. Kezdesýge bıylǵy álem chempıonatynda kópshiliktiń kózaıymyna aınalǵan ózbekstandyq Ravshan Irmatov tórelik etti. Endi matchtyń ózine keler bolsaq, Qazaq­stan men Oman joldastyq kezdesýi buqaralyq aqparat quraldary men Astana kóshelerindegi bılbordtarda bir apta boıy jarnamalaǵannyń arqasynda bolar, stadıonǵa biraz jankúıerler jıyldy. Osy jolǵy el qurama­sy­nyń sapynda eki qan­da­symyz bolsa, sonyń biri Nurbol Ju­masqalıev, ekinshisi Azat Nur­ǵa­lıev boldy. Bul ekeýi de Qos­tanaıdyń “Tobyl” ko­mandasynyń oıynshy­la­ry. Al Tańat Nóserbaev pen Jambyl Kó­keev sııaqty aıaq­dop­shylar bireýi ja­raqatyna, ekin­shisi oıyn tájirı­besiniń azdyǵyna baılanysty el quramasy sapynan kórinbedi. Osy matchta birinshi goldy ko­manda kapıtany Andreı Karpovıch soqty. Ol oıynnyń 20-shy mınó­tin­de Sergeı Ostapenkonyń ja­sa­ǵan soqqysynan Oman qorǵaýshysy­nyń aıaǵyna tıip, keri qaıtqan dopty qaqpa torynda týlatty. Al ekinshi dopty Nurbol Jumasqalıev jasyl alańda qos egizdiń syńa­ryn­daı bo­lyp júrgen Azat Nur­ǵa­lıev­tiń sol qaptaldan shyǵarǵan pasyn baspen ádemi soǵyp, Oman qaqpa­shysyn taǵy bir ret jer qaratty. Al oı­ynnyń ekinshi jartysynda taǵy da sol Nurboldyń oń qap­taldan qaq­paǵa qaraı tepken dobyn Oman qor­ǵaýshysy Ál-Alavı toqtatamyn dep óziniń qaqpasyna gol soǵyp aldy. Bul 62 mınótte Qazaqstan qurama­synyń soqqan úshinshi goly boldy. Degenmen, Oman oıynshylary da qarap otyrmaı, 2 mınót ótken soń alań ıeleriniń qaqpasyna alystan gol salyp, esep aıyrmasyn eki dopqa kemitti. Jalpy, matchtyń Qazaqstan quramasynyń basymdy­ǵymen ótke­­nin atap ótý jón. Ási­rese, Nur­bol­dyń Oman qaqpasyn bir­neshe ret kóz­degen doptary ny­sanaǵa dál tı­meı jatsa da, qarsy­lastaryn biraz ábigerge túsirdi. Sol sııaqty koman­da kapıtanynyń jeıdesin kıgen Andreı Karpo­vıch­tiń de barynsha ter tókkenin atap ótýge bolady. Kezdesý aıaqtalǵan soń Oman quramasynyń bas bapkeri, fransýz mamany Klod Marı Fransýa Le Rýa otandastarymyzdyń oıynyn bas barmaqpen baǵalaıtynyn aıtty. Degenmen, sóz arasynda ol Qazaq­­stan­men bolǵan joldastyq kezde­sý­ge negizgi quramada oınaıtyn jeti aıaqdop sheberiniń kele almaǵanyn, osy oıynǵa bar bolǵany 1988-1993 jyldary týǵan jastardyń qatys­qa­nyn jasyrmady. Shynymen de Oman quramasynda Anglııanyń pre­mer-lıgasynda “Ýıgan” koman­da­syn­da óner kórsetetin negizgi qaq­pashy Álı Abdýlah ál-Habsı sııaqty oıynshylar bolǵan joq. Al Qazaqstan quramasynyń bas bapkeri Bernd Shtork bolsa, match aıaqtalǵan soń oıynshylarynyń jaqsy óner kórsetkenin, endi olar Eýropa chempıonatynyń irikteý týrnırine qatysý úshin jan-jaqty daıyn­da­latyndaryn, sol básekelerge “Aq­tóbe” men basqa da komandalarda oınaıtyn jigitterdiń shaqyry­latynyn atap ótti. Jalpy, Omandy nashar komanda desek, artyq aıtqan bolar edik. Qa­zaqstan quramasymen ekinshi qu­ram­men oınaǵan komanda qazir Parsy shyǵanaǵynyń chempıony bolyp sa­na­lady. Sonymen birge ol 2004, 2007 jyldary Parsy shyǵanaǵy chem­pıonatynyń kúmis júldegeri, 2009 jyly atalmysh óńirdiń ký­bo­gynyń ıegeri bolsa, Azııa kýbogyna 2004, 2007 jyldary qatysqan. Qazaqstan quramasy Oman ko­mandasyn jeńgennen keıin FIFA reıtınginde 126-orynnan 125-shi satyǵa kóterildi. Dastan KENJALIN. ---------------------------------- Sýretterdi túsirgen Orynbaı BALMURAT.