Qarý saýdalaǵan qaraqshyǵa arasha suraıdy

Taılandtyń apellıasııalyq sotynyń qarý saýdasymen aı­nalysqan reseılik kásipker Vıktor Býtty AQSh-qa eks­tra­dısııalaý týraly qaýly qabyldaýy biraz shý shyǵardy. Shýǵa, basqany bylaı qoıǵanda, Reseıdiń syrtqy ister mınıstri Sergeı Lavrovtyń ózi qosylǵany biraz jaıdy ańǵartady. Bul jerde ózi­­niń azamatyna ara túsip otyr­ǵan Reseıdiń qa­damdaryn da ar­tyq kórmeýge bol­­­ǵandaı-aý. Sol orystarda “bul ıttiń ǵana balasy ǵoı, bi­raq bizdiń ıttiń ba­lasy” degen sóz bar. Vıktor Být – aıtýly, álemdi shýlatqan qylmysker, sóıtse de ol Reseıdiń azamaty. Ony basqa eldiń ja­zalaýyna berip qoıý Re­seıge syn. Sodan da olar, mı­nıstri bas bolyp, dúrligip jatyr. Jalpy, Vıktor Být degen kim? Oǵan aıyp taǵylǵanyna talaı bolǵan. Aıyptaýshylardyń ba­syn­da, AQSh-ty jáne basqa da elderdi aıtpaǵanda, Birikken Ulttar Uıy­my tur. Reseılik qarý saýdalaǵan qaraqshy BUU-nyń embargosyna qaramaı, Afrı­kadaǵy birshama shıelenisti aı­maqqa qarý jet­kizgen. Bul rette Angola, Kongo Demokratııalyq Respýblıkasy, Lıberııa, Rýanda, Serra-Leone, Sýdan elderi atalady. Sondaı-aq Belgııa úki­meti Vıktor Býttyń Aýǵan­stan­daǵy “Talıban” men “Ál-Kaıda” lańkesterine qarý jetkizgeni úshin aıyptaǵan. Osydan eki jyl buryn Být Taı­landta ustalǵan kezde Reseı aqparat quraldary onyń bu­rynǵy qylmystaryn ataǵan edi. Al qazir onyń birin de aıtpaı, Býttyń aıyby joq, oǵan saıası turǵyda qysym jasalyp jatyr degen jalań sózge kóbirek jú­ginedi. Buryn bul kásipkerdiń biraz ushaqtary bar ekeni, ol túrli zańsyz tapsyrystardy oryndap oty­ratyny aı­tyl­ǵan. Endi Býttyń Taılandta qalaı ustalǵanyna kel­sek, onda da biraz dúdámal jaılar bar. О́ziniń aıtý­ynsha, ol tý­rıs­tik saparmen kel­gen. Biraq naqty maqsaty aıqyn emes. Sonda ol AQSh arnaýly qyzmetiniń to­ryna túsken. Být Kolýmbııadaǵy ekstremıstik FARC uıymynyń ókili retinde kezdesken adamǵa biraz “syryn” ashyp qoıǵan. Bul kezdesý, ondaǵy áńgime taspaǵa jazyp alynyp, keıin dálel retinde paıdalanylyp otyr. Ol ekstremıstik uıymǵa 800 jer-áýe zymyranyn, 5000 AK-47 avto­matyn, mıllıon danadaı oq-dári, mınalar, jarylǵysh zattar, sondaı-aq tikushaqtar jetkizip berýge ýáde etken. Taılandtyń ózi de óte yń­­ǵaı­syz jaǵdaıda qalyp otyr. Al­ǵashynda onyń soty da, úkimeti de Býtty aqtamaq oıda bolǵanǵa uqsaıdy. Biraq Reseıdiń degenine kónýge AQSh-tan asa almaı­tyndaı. Jalpy, BUU-dan bastap, biraz halyqaralyq uıymdar, elder aıyptap otyrǵan qarý saýdasymen zańsyz aınalysqan qylmyskerdi aqtaý da ońaı emes. Bul elde sońǵy sheshimdi úkimet aıtady, ol sot sheshimin buza alady. Biraq Taıland úkimetiniń ózi yńǵaısyz jaǵ­daı­ǵa qalatyn sheshimge barýy qı­yn-aq. Vıktor Být AQSh-qa jetki­ziletin bolsa, onyń ómir-baqı túrmege qamalý jazasyna kesilýi ábden múmkin.