Iftar saýaptan bolsyn

Keshe Astanadaǵy “Rıksos” qonaqúıiniń “Jeruıyq” zalynda Elbasy Nursultan Nazarbaev Qazaqstan musylmandary qaýymyna arnap qasıetti Ramazannyń qurmetine ıftar dastarqanyn jaıǵyzyp, aýyzashar berdi. Oǵan elordanyń din ıslamdy bek tutynatyn musylmandary arasynan úsh júzdeı ókil jı­nal­dy. Onyń ishinde memlekettik saıası qyzmetkerler, depýtattar, dinı qyz­metkerler men namaz­handar, qur­metti aqsaqaldar men analar, má­denıet jáne BAQ ókilderi boldy. Dastarqandy ashqan Qazaqstan mu­syl­man­dary dinı basqarmasy­nyń tóraǵa­sy, Bas múftı Ábsattar qajy Derbisáli alǵashqy sózdi dinbasy Prezıdent Nursultan Nazar­baevqa berdi. Elbasy Qazaq­stan musylmandaryn qasıetti Ra­ma­zanmen quttyqtap, oraza ustaǵan barlyq jamaǵattyń qulshyly­ǵy­nyń qabyl bolýyn, otbasylary­nyń aman, júzderiniń jarqyn bolýyn tiledi. Odan ári Elbasy ıslam dininiń ıgi qasıet­terin aıtyp berdi. Bizdiń dinimiz joq-jitikke, qaryp-qaserge kómek berýdi ýaǵyzdaıtyn barynsha ádi­letti din. Elimizde ty­nyshtyq bo­lyp, eshqandaı qan tógilmeı, beı­bit ómir súrip kele jatqa­nymyzǵa ıslam dininiń áseri mol. О́ıtkeni, ıslam dinin bek tu­tynatyn haq musylman árqa­shanda tózimdi bolyp, basqa­lardyń seni­mi­ne qurmetpen qa­raýdy talap etedi, deı kelip osydan ári Elbasy Álem­dik jáne dástúrli dinder kóshbas­shy­lary seziniń Qazaqstanda turaqty túrde ótkizilip kele jat­qan­dyǵyn, kelesi jyly Qazaq­stan­nyń IKU tóraǵasy bolatyndyǵyn aýyzǵa alyp, osynyń bári elimiz­degi turaqtylyq pen tynyshtyqtyń arqasy ekendigin aıtty. Bul iste ıslamnyń atqaryp otyrǵan róli zor, dedi Prezıdent. Jyldan-jylǵa jastar ara­syn­da ıslam dinin qadir tutyp, onyń talaptaryna moıyn usyný­shylar sany kóbeıip keledi. Biraq adam dinniń syrtqy pishinin ǵana saqtap, nıeti durys bolmasa esh­qan­daı qulshylyqtyń qabyl bol­ma­sy haq. Sondyqtan adam eń bas­tysy óziniń nıet-qulqyn durys jolǵa qoıyp, shyn júre­gimen Allaǵa senýiniń mańyzy zor, dedi Elbasy. Odan ári mu­sylman dinin tutynýshylarǵa arnalǵan qurmet bıliktiń barlyq deńgeıinde de turaqty túrde ja­salyp kele jatqanyn aıtty. Qazir barlyq oblystar men aýdan ákim­deri de ózderindegi musylman­dar­dyń ókilderine arnap ıftar dastarqanyn jaıǵyzýda, dedi  sóziniń sońynda. Ábsattar qajy Derbisáli qazaq­standyq barsha musylmandar aty­nan Ramazannyń qurmetine jaı­ǵyz­ǵan ıftar dastarqany úshin Elbasy N.Nazarbaevqa alǵy­syn aıtty. Eli­mizde júrgizilip otyr­ǵan beıbit­súıgish, durys saıa­sattyń arqasynda musylmandar qaýymy óziniń senim bostan­dyǵyna tolyq ıe bolyp, jyldan-jylǵa sany qatty ósip keledi. Dinimiz qursaýda, rýhymyz tusaý­da bolǵan keńestik kezeńde eli­­mizde bar bolǵany 68 meshit bol­sa, qazir olardyń sany 2 myńnan asyp barady jáne olardyń bári de arnaıy salynǵan ǵıbadat­ha­nalar, dedi ol. Sodan keıin din­ba­sylardyń Elbasy týraly jazǵan pikirler jınaǵynan turatyn kitapty syıǵa tartty. Iftar dastarqany basynda aq­saqaldar atynan Zeınolla Muha­med­januly jáne basqalar sóılep, Elbasyna ózderiniń rıza­shy­lyq­taryn bildirdi. Senator О́mirbek Baıgeldı tógildirip turyp bata berdi. Jaqsybaı SAMRAT.