Baǵytymyz aıqyn, jolymyz jarqyn

Memleket basshysy Nursultan Nazarbaevtyń 5 ınstıtýttyq reformany júzege asyrýǵa negizdelgen «100 naqty qadam» – Ult Jospary qazaqstandyqtardy ǵana emes, álem jurtshylyǵyn da qyzyqtyryp otyr. Ony uzaq merzimge arnalǵan uly jos­par dep ataýymyzǵa ábden bolady. Sebebi, Ult Jospary elimizdiń halyqaralyq arenadaǵy bedeliniń artýyna, ekonomıkamyzdyń qar­qyn­dy damýyna, halqymyzdyń ál-aýqatynyń artýyna jol ashatyn biregeı baǵdarlama bolyp tabylady. Kezeń-kezeńimen júzege asyrylatyn Ult Jospary barlyq salany qamtıdy. Ári ol búkil qazaq­standyqtardyń jumyla kirisetin, jaýapkershilikti qajet etetin isi sanalady. Bar­lyq memlekettik organdardan, qoǵamdyq ınstıtýttar men ózge de mekeme-uıymdardan is-qımyl úılesimdiligin, tabandylyq pen qajyrlylyqty talap etedi. Mun­daı asyl qasıetter bizdiń boıymyzda bar. Ony «Qazaqstan-2050» Strategııasyn merziminen buryn oıdaǵydaı oryndap, endi aldymyzǵa ekonomıkasy damyǵan, áleýeti eselep artqan, halqy baqýatty 30 eldiń qataryna qosylý mysalynan kórýge bolady. Táýelsizdigimizdiń 25 jyldyq mereıtoıy keńinen atap ótiletin osy jyldyń basynda Elbasymyz «Ult Jospary – qazaqstandyq ar­­manǵa bastaıtyn jol» atty baǵdarlamalyq maqalasyn jarııa­lady. Sol maqalamen jan-jaqty tanysqan, úlken áser alǵan myń­daǵan ustaz-pedagogtardyń biri retinde aıtarym, Prezıdentimiz óziniń maqalasynda ult armany qalaı órilip, rýhy bıik qazaqtyń búgingi kúni ózgelermen terezesi teńelip, aıbyny asqaqtap turýy úshin ne nársege umtylý qajettigin kórsetip berdi. Sonymen qatar, memleket taǵdyryna oń áserin tıgizetin keleli de keshendi isterdi qalaı bas­taý kerektigin baǵdarlap berdi. Biz dana da darqan, batyl da batyr, bilimdi de eńbekqor halyqtyń perzentimiz. Jerimiz baı, elimizde turaqtylyq pen kelisim jarasym tapqan. Al Elbasymyz búgingi jáne erteńgi urpaq aldyna jańa tehnologııalardy meńgerip, elimizde buǵan deıin bolmaǵan jańa ón­diris oryndaryn ashý arqyly álem­dik qoǵamdastyqqa tanylyp, halyqaralyq arenada oıyp turyp oryn alýǵa úndep otyr. Osy armandardyń oryndalýyna búkil qazaqstandyqtardyń atsalysýyn qalap otyr jáne shaqyryp otyr. Mine, biz osy asyl arman­da­ry­myzdyń júzege asatynyna se­nemiz, júzege asyrýǵa bir kisideı uıym­shyldyqpen atsalysamyz. Osy uly maqsattarǵa tereń bilim, joǵary kásibı sheberlik jáne eńbekqorlyq jetkizedi. Kúnimhan DÚISENOVA, №51 mektep-gımnazııanyń dırektory. ASTANA.