Qorjynda – 1128 medal

Jambyl oblysynyń sportshylary byltyr osynsha júlde aldy Buqaralyq sportty damytýdyń eń negizgi joldarynyń biri joǵarǵy sporttyq jetistikterdi nasıhattaý ekeni anyq. О́tken jyly Jambyl oblysynyń sportshylary álemdik jáne halyqaralyq baıraqty básekelerde 1128 medalǵa ıe boldy. Onyń ishinde álem, Azııa chempıonattary men Kýboktarynda – 111 medal, halyqaralyq týrnırlerde – 194 medal, Qazaqstan Respýblıkasynyń chempıonattarynda 823 medal ıelenip, jyldy óte tabysty aıaqtady. Iá, kezinde talaı myqtyny moıyndaǵan jam­byldyq ulandar qazir endi solarǵa ózderin moıyndatyp júr. – О́tken jylǵy jumysta­rymyzdyń eń basty baǵyttarynyń biri, el erteńi jastarymyzdyń jan-jaqty bilimdi, rýhanı baı, ulttyq salt-dástúrlerimizge adal­dyǵyn boıyna sińirýge ar­naldy, – deıdi bul jóninde Jambyl oblystyq sport jáne dene­shy­nyqtyrý basqarmasynyń basshysy Gamlet Qaınarbekov. – О́t­ken jyly óńirde dene­shy­nyq­tyrý jáne sportpen júıeli túrde shuǵyldanýshylar qatary 25,5 paıyzǵa kóterilip, 282,3 myń adamǵa jetti. Bul – 2014 jylmen salystyrǵanda, 2,2 paıyzǵa nemese 26,8 myń adamǵa ósken degen sóz. Sonyń ishinde 30,2 paıyzy nemese 60,0 myń adam mektep jasyndaǵy balalar. Iá, óńirde el erteńi jastardyń sportpen aınalysýyna mol múmkindikter jasalýda. Jalpy, sporttyń buqaralyq mańyzyn arttyrý máselesin – sporttyq bazalardyń qoljetimdiliginen bóle qaraýǵa bolmaıdy. О́ıtkeni, sport nysandary – buqaralyq sportty damytýdyń kepili. Sońǵy jyldary oblysta sport nysandarynyń qoljetimdiligi úlken qarqynmen ósip keledi. О́tken jyldyń ózinde Moıyn­qum, Jýaly aýdandarynda sport zal kesheni, Taraz qalasynda №3 olımpıada jetkinshekterin daıarlaıtyn sport mektebine arnalǵan deneshynyqtyrý-saýyqtyrý ke­sheni paıdalanýǵa berildi. So­nymen qatar, Taraz qalasynda shaǵyn fýtbol, basketbol jáne voleıbol oıyndaryna arnalǵan, jasandy tósenishpen qorshalǵan – 3, Qarataý qalasynda 2 sport alańshasy qatarǵa qosyldy. «Qazfosfat» JShS sport keshenin ashty, onda búginde 600 jumysshy men 150-ge jýyq jasóspirim sportpen turaqty shuǵyldanýda. Jalpy alǵanda, ótken jyly oblystyń sport salasynyń damýyna 6,35 mlrd. teńge bólindi. Bul salany qarjylandyrý 2014 jylmen salystyrǵanda, 12,0 paıyzǵa artqan. Oralhan DÁÝIT, «Egemen Qazaqstan». Jambyl oblysy.