Tarazda «Baýyrjantaný» ortalyǵynda jańa eńbekter daıyndalýda

TARAZ. 29 qańtar. Taraz memlekettik pedagogıkalyq ınstıtýtynyń «Baýyrjantaný» ǵylymı-zertteý ortalyǵynda Halyq qaharmany Baýyrjan Momyshulynyń kóptomdyq shyǵarmalar jınaǵynyń kelesi 15 tomy daıyndalýda. Buǵan deıin onyń 30 tomy jaryq kórgen bolatyn. Bul týraly egemen.kz tilshisi habarlady. Atalǵan oqý ornynyń baspasóz qyzmetiniń taratqan málimdemesi boıynsha, kóptomdyqta qazaqtyń kórnekti jazýshysy, dańqty qolbasshy týraly estelikter, dramalyq shyǵarmalar, arnaýlar, poemalar men balladalar toptastyrylǵan. Atap aıtqanda, 31, 32, 33, 34, 35, 36, 37, 38 tomdarda B. Momyshuly týraly esimi elge belgili qalamgerler, ǵalymdar men qoǵam qaıratkerleriniń estelikteri jınaqtalǵan. Olardyń qatarynda Mamytbek Qaldybaev, Dmıtrıı Snegın, Ázilhan Nurshaıyqov, Tahaýı Ahtanov, Táken Álimqulov, Tursyn Jurtbaı, Myrzataı Joldasbekov, Bahytjan Momyshuly, Mekemtas Myrzahmetuly, Muhtar Shahanov, Qasym Qaısenov, Sherhan Murtaza, Ǵabıt Músirepov, Zeınep Ahmetova, Ákim Tarazı syndy azamattar bar. Al, 39 tomǵa Málik Ǵabdýllınnyń «Baýyrjan Momyshýly» atty orys tilindegi ocherki berilgen. Batyr týraly dramalyq shyǵarmalar 40, 41 tomdarda. Onda Sherhan Murtazanyń «Noqtaǵa basy sımaǵan», Járken Bódeshtiń «Juldyztas» jáne ózge de jazýshylardyń týyndylary bar.  42, 43 tomdarda jalpy sany 200 arnaý óleń toptastyrylǵan. 44 tomda poemalar, 45 tomda jyr, balladalar jınaqtalǵan. «Búgingi kúnde 15 tom baspaǵa tolyqtaı daıyn deýge bolady. Jalpy, dúnıejúzinde Baýkeń týraly jazylǵan eńbekter óte kóp. Solardyń bárin jınap, aýdarý qajet. Osylardy rettesek batyr aǵamyzdyń 100 tomdyǵyn shyǵarýǵa múmkindigimiz bar,» - deıdi «Baýyrjantaný» ǵylymı-zertteý ortalyǵynyń bas ǵylymı qyzmetkeri Álimbaı Naızabaev. Taraz memlekettik pedagogıkalyq ınstıtýtynyń rektory Darııa Qojamjarovanyń qoldaýymen ortalyq búginde Qazaqstan Respýblıkasy Ortalyq Memlekettik muraǵatyndaǵy Baýyrjan Momyshulymen qarym-qatynasta bolǵan qoǵam qaıratkerleri, aqyn-jazýshylar basqa da óner adamdarynyń jeke qorlaryndaǵy Baýkeńe baılanysty arhıvtik qujattardy jınaqtaý ústinde. Aıta keteıik, ǵylymı ortalyq B. Momyshulynyń muralaryn jınaý, zertteý jáne basyp shyǵarý baǵytynda jumys atqarady. Jýyrda «Legendarnyı batyr» degen atpen estelik kitaby men «Fotoqujattyq albomyn» kópshilik nazaryna usynylǵan bolatyn. Oralhan Dáýit. Derek, sýret: egemen.kz