Fransııanyń belgili rejısseri qaıtys boldy

ASTANA. 30 qańtar. Fransııanyń belgili rejısserleriniń biri Jak Rıvett 87 jasynda qaıtys boldy. О́miriniń sońǵy jyldarynda qaýipti alsgeımer aýrymen aýyryp kelgen. Bul týraly lenta.ru saıtyna silteme jasaǵan egemen.kz tilshisi habarlady. Áıgili rejısser 1950 jyldary qyzmetin kınosynshy retinde bastaǵan. Birneshe basylymdardyń ashylýyna sebepker boldy. Fransııadaǵy eń iri Les Cahiers du cinema jýrnalynyń birneshe jyl bas redaktory bolǵan. 1960 jyly eń alǵashqy «Parıj bizge tıesili» fılmin túsirdi. Álemge aty keńinen taralǵan Jan Lıýk Godar, Fransýa Trıýffo, Klod Shabrol syndy rejısserlermen birlesip «jańa tolqyn» dep atalǵan kınematografııadaǵy jańa aǵymnyń negizin qalady. Fransýa Trıýffonyń aıtýynsha, «jańa tolqyn» Jak Rıvettiń arqasynda paıda bolǵan. Atalǵan baǵyt kıno salasynda kóptegen jańashyldyqtaryn alyp keldi. Fılm barysynda sıýjettiń kútpegen jerden ózgerip ketýi, dınamıkasy, túsirilimniń jańa qyrlary kórermenge jol tartty. Jak Rıvettiń bastaýymen túsirilgen «Monah áıeli» (1966), «Essiz mahabbat» (1968), «Selın men Jıýlı naǵyz sýaıt» (1974), sondaı-aq, 13 saǵattan turatyn «Maǵan jolama» (1971) fılmderi kıno tarıhyndaǵy eń uzaq fılm bolyp esepteledi. Aıan Ábdýálı. Derek: lenta.ru. Sýret: rian.com.ua.