QOSTANAI. 28 naýryz. Qostanaıda taekvondodan kadetter arasynda respýblıkalyq chempıonat birinshi ret ótti. Oǵan Qazaqstannyń barlyq oblystarynan kadet sportshylary qatysty. Bul týraly ng.kz saıtyna silteme jasaǵan egemen.kz tilshisi habarlady.
2002-2004 jyly týǵan 360 taekvondoshy 10 salmaq dárejesinde synǵa tústi. Olardyń arasynda 3 álem chempıony da boldy. Osy chempıonatta bási basym bolǵandar respýblıka quramasyna ótip, álem chempıonatyna qatysýǵa múmkindik aldy. Mamandardyń aıtýynsha, jarys álemdik standartpen ótti.
Aıta keteıik, sporttyń bul túri Qostanaıda kenjelep qalǵan bolatyn, oblys quramasy respýblıka boıynsha sońǵy orynda.
Oblystyń taekvondodan bas jattyqtyrýshysy Ahtam Odılov: «Búgin qostanaılyq biraz balalar qatysyp jatyr, biraq olardyń tájirıbesi áli az, respýblıkalyq quramaǵa ótpeıdi. Onyń esesine bul chempıonat olar úshin jaqsy jattyǵý bolyp tur», – dedi.
Elimizdegi kadetter arasyndaǵy aǵa jattyqtyrýshy Myrzaǵalı Suraǵanovtyń aıtýynsha, aldymen halyqaralyq týrnır Máskeýde ótedi, sodan iriktelgender Koreıada qyrkúıek aıynda ótetin álem chempıonatyna joldama alady. О́tken jylǵy álem chempıonatynan qazaqstandyq kadetter 3 qola medal alǵan bolatyn. Bul joly olardyń altyn men kúmisten úmiti bar.
Názıra Járimbetova.
Derek, foto: ng.kz.
