Germanııanyń Eýropadaǵy qaýipsizdik jáne yntymaqtastyq uıymyndaǵy (EQYU) tóraǵalyǵy aıasynda jaqynda Berlınde ótken «Saýda men ınvestısııalardyń ózara baılanystylyǵy» («Connectivity for Commerce and Investment») halyqaralyq konferensııasyna Qazaqstan Syrtqy ister mınıstriniń orynbasary Roman Vasılenko bastaǵan delegasııa qatysty.
Delegasııanyń quramyna Qazaqstan Respýblıkasynyń EQYU-daǵy Turaqty ókili Qaırat Sarybaı, Qazaqstannyń Germanııadaǵy elshisi Bolat Núsipov, tıisti mınıstrlikter men vedomstvolardyń, sondaı-aq, ulttyq kompanııalardyń ókilderi endi.
«Eýrazııa keńistiginde ekonomıkalyq ózara árekettestikti nyǵaıtý» taqyrybyndaǵy plenarlyq sessııada R.Vasılenko sóz sóılep, konferensııaǵa qatysýshylardy Eýrazııa qurlyǵynyń kindigine ornalasqan elimizdiń geografııalyq ornynyń artyqshylyqtaryn barynsha tolyq jáne tıimdi paıdalanýǵa baǵyttalǵan saıasatynyń basty basymdyqtarymen tanystyrdy.
Konferensııaǵa qatysýshylar úshin «Nurly Jol» ınfraqurylymdyq damý baǵdarlamasy, «Batys Eýropa – Batys Qytaı» avtokólik jolynyń qurylysy, «Qorǵas» shekara mańy yntymaqtastyǵy halyqaralyq ortalyǵyn damytý josparlary, Aqtaý teńiz porty men Transkaspıı logıstıkalyq baǵyttary úlken qyzyǵýshylyq týdyrdy.
Konferensııaǵa qatysýshylarǵa, sondaı-aq, Jibek jolynyń ekonomıkalyq beldeýi men Eýrazııalyq ekonomıkalyq odaqty (EAEO) qosa alǵanda Eýrazııadaǵy túrli ıntegrasııalyq bastamalar men ınfraqurylymdyq damý baǵdarlamalarynyń ózara tıimdiligin kórsetetin joba-josparlar tanystyryldy. Osy oraıda, ózara tıimdi ekonomıkalyq yntymaqtastyqtyń keleshegin anyqtaý maqsatynda EAEO jáne Eýropalyq odaq arasyndaǵy únqatysýdy jolǵa qoıý týraly EAEO tóraǵasy retindegi Qazaqstan Prezıdenti Nursultan Nazarbaevtyń buryn jarııalanǵan bastamasynyń mańyzdylyǵy erekshe ataldy.
Konferensııanyń maqsaty Vankýverden Vladıvostokqa deıingi ekonomıkalyq baılanystardy nyǵaıtý múddeleri úshin saýda jáne ınvestısııalyq jaǵdaılardy jaqsartý múmkindikterin izdestirý boldy. EQYU-nyń ekinshi ólshemi sheńberinde uıymdastyrylǵan bul is-sharaǵa EQYU keńistigi túrli aýmaqtarynyń saıası-ekonomıkalyq jáne azamattyq qoǵamnyń jetekshi ókilderi qatysty. Ústimizdegi jyly EQYU-da Germanııa tóraǵalyq etedi. Búginde Berlın «Únqatysýdy jańǵyrtý, senimdi jańadan qalyptastyrý, qaýipsizdikti qalpyna keltirý» uranymen federaldyq úkimet ózekti taqyryptardyń meılinshe mol sany boıynsha únqatysýdy ilgeriletý, EQYU keńistiginde uzaq merzimdi negizdegi senimdi qalpyna keltirý úshin EQYU ınstıtýttary men quraldaryn nyǵaıtýǵa yqpal etýge nıetti ekenin anyq bildirip otyr.
Berlınde bolýy kezinde R.Vasılenko GFR SIM-iniń Shyǵys Eýropa, Kavkaz jáne Ortalyq Azııa elderimen yntymaqtastyq máseleleri boıynsha ýákili Andreas Peshkemen, Qazaqstan-Germanııa Strategııalyq yntymaqtastyǵy boıynsha iskerlik keńesiniń teń tóraǵasy Peter Tılspen jáne Germanııanyń Shyǵys ekonomıka komıtetiniń aımaqtyq dırektory Martın Hofmanmen kezdesip, kelissózder júrgizdi. Suhbattastar ekijaqty qarym-qatynastardy damytý men halyqaralyq kún tártibiniń ózekti máselelerimen qatar, eki memlekettiń shıkizat pen tehnologııalyq seriktestigi sheńberinde ekonomıkalyq kelisimderdi júzege asyrý boıynsha tabysty ózara árekettestigi, Astanada ókiziletin EKSPO-2017 kórmesine Germanııanyń qatysýy, sondaı-aq, Qazaqstanda qosarlanǵan bilim berýde nemis úlgisin engizý máselelerin talqylady.
Qazaqstandyq dıplomat, sonymen qatar, Avstrııa Syrtqy ister mınıstrliginiń Bas hatshysy Mıhael Lınhartpen kezdesti. Kezdesýde ekijaqty kún tártibiniń ózekti máseleleri men Avstrııanyń aldaǵy 2017 jyly EQYU-da tóraǵalyq etýine qatysty jaıttar talqylandy. Avstrııa tóraǵalyǵynyń «Jasyl ekonomıkany qurý, seriktestikti jasaý» (Greening the Economies, Building Partnerships) boıynsha usynǵan urany Qazaqstannyń syrtqy saıası basymdyqtary men aldaǵy EKSPO-2017 halyqaralyq mamandandyrylǵan kórmesiniń tujyrymdamasymen asa úndes ekeni atap kórsetildi. Osyǵan oraı, suhbattastar kelesi jyly eki memlekettiń kúsh-jigerin EKSPO-2017 alańynda biriktirý týraly ýaǵdalastyqqa keldi.
«Egemen-aqparat»