Sport pen sharýashylyqty qatar ıgerip, jibek baýly altyn qazyǵyn aýylǵa qaǵyp, órisin qaladan tapqan Juldyz – jańa zamannyń jasy. Tórt túliktiń paıdasyn túsinip, babyn tabý – kez kelgenge buıdasyn ustatpaıtyn tirlik. Al ár tańyn túıe saýýdan bastaıtyn Juldyz úshin mal sharýashylyǵy – ómiriniń ózegi.
2005 jyly qańtar aıynda Beki aýylynda týǵan Juldyz О́tepbergen dzıýdo sheberi, el chempıony. Dzıýdomen 6-synyptan bastap aınalysqan ol Aqtaýdaǵy «Asmet Ulas» joǵary pedagogıkalyq kolledjin dene shynyqtyrý mamandyǵy boıynsha támamdaǵan. Qazirgi tańda jalyndaǵan jas – Aqtaýdaǵy «TAIQOT» sport klýbynda bapker. Jas bapker ár shákirtiniń bolashaǵyna úmitpen qaraıdy ári sportshy retinde ózi de álem chempıony tuǵyryna kóterilýdi armandaıdy.
Otbasynda bir ápke, bir ini, eki sińlisi bar Juldyz qaladaǵy jattyǵýdan qoly bosaı sala, Bekige qaraı jol tartady. Munda ony tórt túliktiń jaǵdaıyn jasaý deıtin hobbıi kútip turady. Motosıkl men kólik júrgizetin sharýa qyzǵa atqa miný de asa qıyndyq týǵyzǵan emes. Saýmal saýyp, maldy óriske jiberý, aýylda qalǵan botalardyń babyn jasaý, qora tazalaý, keshki óristen keler tórt túligin túgendep aýylǵa ákelý, qoralaý syndy jumys – mal sharýashylyǵyn kásip etken Juldyzǵa qıyn emes, qyzyq is. Dala qyzynyń sharýadan tynysy keńeıip, jany tynyshtyq tabady.
«Aýyldaǵy eńbek adamdy shydamdylyq, jaýapkershilik pen tabandylyqqa tárbıeleıdi» dep sanaıtyn Juldyz Saýalbekqyzy: «Mundaǵy ómir maǵan eń aldymen – tynyshtyq. Aýyldyń taza tabıǵatynan energııa alamyn, al mal baptaý, tórt túlikti jaıǵaý sekildi jumys kúsh beredi, oıdy tazartady. Tańǵy as ishpesten buryn túıe saýamyn, sebebi úıimniń berekesin arttyrǵan tórt túligim – men úshin birinshi orynda», deıdi.
Sportzalda shákirtterimen birge jattyǵyp, aýylda ata-anasynyń kómekshisi bolǵan qyz áleýmettik jelide de belsendi. Instagram, TikTok jelilerinde aýyldyń tynys-tirshiligi, maldy kútip-baptaý, jaıý, kólik júrgizý, mal ónimderin daıyndaý baǵytynda áserli jazbalary men túsirilimderin jıi jarııalap, jurtshylyqtyń ystyq yqylasyna bólenip júr.
Kóktem – tabıǵattyń qaıta túlep, tórt túliktiń tóldep, qoranyń qozy-laq pen bota-buzaýǵa tolatyn kezi. Mal sharýashylyǵynyń mashaqaty qaı mezgilde de az emes, áıtse de kóktemniń malshylarǵa qat-qabat tosatyn qıyndyǵy taǵy bar. Osy qıyndyqtyń ózin qyzyqty ári tartymdy kontentke aınaldyrý Juldyzdyń qolynan keldi. Sharýany dóńgelente júrip, tartymdy sátti ádemi kadrmen jelige júktep, oqyrmanyn qýantýǵa da ýaqyt tapty.
– Aýyl ómiri – jan-jaqty qalyptasýdyń bastaýy. Ony jelige júkteýdegi maqsatym – aýyl turmysynyń mazmundy ári qyzyqty ekenin kórsetý. Mundaǵy ár kún jańa tájirıbe men eńbekke toly, – deıdi ol.
Armany asqaq, maqsaty mol jas bolashaqta aýyl turmysy, mal sharýashylyǵyna qatysty etnotýrızmdi damytyp, jeke kásippen aınalysqysy keledi. Bolashaǵyn týrızm salasymen baılanystyrǵan Mańǵystaý óńirinde bul qajetti ári utymdy joba bolary anyq.
«Inilerimiz bar edi, óziń sııaqty sharýanyń jaıyn biletin qyz bolsa jaqsy ǵoı», dedim áńgime sońyn ázilge buryp. «Jelige aýyl ómirin salamyn dep osyndaı usynystan bas kótere almaı qaldym», dep sál jymıǵan Juldyz ishki syrynyń shetinen jaılap habar berip qutyldy. Al biz ishteı ulttyq bolmysymyzdy zamanaýı jańǵyrtyp qana qoımaı, alǵa jeteleıtin Juldyzdaı qazaqy qundylyqqa qanyp ósken jastarymyz kóp bolsyn dep tiledik.
Mańǵystaý oblysy