Elordada belgili telejýrnalıst, qoǵam qaıratkeri Nurtileý Imanǵalıulyn eske alýǵa arnalǵan dástúrli bılıard týrnıri ótti.
Is-sharanyń shymyldyǵy aqyn Erkebulan Qaınazardyń Nurtileý Imanǵalıulyna arnaǵan jyr shashýymen ashyldy. Jetisýda dúnıege kelip, jarty ǵasyrǵa jýyq ýaqyt jýrnalıstıka qazanynda qaınap, «Oı-kókpar», «Betpe-bet», «Dińgek», «Qoltańba» syndy habarlar júrgizip, «Baı-qýatty bolaıyq!» degen qanatty sózimen qazaq halqynyń júreginen ornyn alǵan tulǵanyń eren eńbegin nasıhattaýǵa baǵyttalǵan bul ıgi is-shara osymen altynshy márte uıymdastyrylyp otyr.
Elýge jýyq tastaıaq sheberi qatysqan básekede bas júldeni Parlament Májilisiniń depýtaty, aqyn Janarbek Áshimjan ıelendi. Ekinshi oryn alashtanýshy ǵalym Qaırat Saqtyń enshisine buıyrsa, úshinshi oryn qalamger Boranbaı Jarylqaǵanov qanjyǵasyna baılandy. Tórtinshi oryndy belgili fotojýrnalıst Erbol Erdenbek jeńip aldy. Jalpy, úzdik segizdikke engen bılıardshylar Manap Kókenov, Ábdikerim Manapov, Amangeldi Seıithan, Beısen Quranbek atyndaǵy atalymdar boıynsha marapattaldy.
Nurtileý Imanǵalıulynyń shákirti Nurdilda Orazdyń uıytqy bolýymen dástúrli túrde ótip kele jatqan týrnırge «Tas Group» kompanııasynyń quryltaıshysy Dýlat Tastekeı demeýshilik etip keledi. Bıyl da sol dástúr jalǵasyn taýyp, jeńimpazdar men úzdik oıyn kórsetkenderge qarjylaı syılyq tabys etildi.