«Qazaq analary – dástúrge jol» respýblıkalyq qoǵamdyq birlestigi Almaty qalasy men Almaty oblysyndaǵy fılıalynyń músheleri, ıaǵnı aqjaýlyqty ájeler uzyndyǵy 112 metrdi quraıtyn «Jyldyń tórt mezgilin beıneleıtin syrly syrmaq» atty aıryqsha týyndysymen álemdik rekordtar kitabyna endi.
Bul bastama – qazaq ájeleriniń ulttyq dástúrge degen sheksiz qurmetiniń kórinisi. Olar bir jyl boıy arnaıy bııazy júnnen basylǵan juqa kıizge basqa tústi kıizden nemese matadan oıý-órnek syryp, astar salyp tikti. Oǵan qoshqar múıiz, túıe taban, synyq múıiz syndy bes túrli túspen kómkerilgen oıý-órnektiń klassıkalyq úlgisin paıdalandy.
Atalǵan týyndy Naýryz meıramynda alǵash kórmege usynyldy. Syrmaqty turǵyndarmen birge «Álemdik rekordtar kitabynyń» ókilderi de tamashalady.
Syrmaqty jasaǵandar ishinde Qarasaı aýdanyna qarasty Irgeli aýyldyq okrýginiń ájeleri de boldy. Taıaýda aýyldyq okrýg ákiminiń orynbasary Eskendir Egeýbek aqjaýlyqty ájelerge alǵysyn bildirip, «Álemdik rekordtar kitaby» uıymy jibergen sertıfıkatty resmı túrde tabys etti.
Aqtoty MYRZABEKQYZY
Almaty oblysy,
Qarasaı aýdany