Astanada Nazarbaev ýnıversıtetine qarasty páterden qarý tabylýyna baılanysty sotqa deıingi tergeý bastaldy, dep jazady Egemen.kz.
Buǵan deıin depýtat Murat Ábenov osy iske baılanysty shetel azamattary ustalyp, qarý-jaraq arsenaly tabylǵanyn málimdegen edi. Alaıda polısııa bul aqparatty ishinara joqqa shyǵardy. Polısııanyń habarlaýynsha, iske qatysty eshkim ustalmaǵan, biraq atys qarýynyń tabylǵany dáleldendi. Sonymen qatar tabylǵan qarýlardyń tarıhı qundylyǵy bar antıkvarlyq buıymdar ekeni aıtyldy.
Depýtattyń málimdemesi buqaralyq aqparat quraldary men áleýmettik jelilerde rezonans týdyrdy. Degenmen, quqyq qorǵaý organdary da, Nazarbaev ýnıversıteti de Murat Ábenovti jaýapkershilikke tartýǵa negiz joq ekenin jetkizdi. Al Ǵylym jáne joǵary bilim mınıstri Saıasat Nurbek ýnıversıtetke qatysty tekseris júrgizýge sebep joq ekenin málimdedi. Onyń aıtýynsha, oqý ornynda oqytýshylarǵa beriletin nemese jalǵa usynylatyn qyzmettik páterler bar.
Sonymen qatar tabylǵan zattar boıynsha polısııa sotqa deıingi tergeýdi jalǵastyryp jatyr. Is 21 sáýir kúni Saraıshyq aýdandyq polısııa basqarmasynda atys qarýyn, oq-dárilerdi, jarylǵysh zattardy nemese qurylǵylardy zańsyz ıemdený, berý, ótkizý, saqtaý, tasymaldaý nemese alyp júrý baby boıynsha tirkelgen.
Atalǵan bapqa sáıkes, kiná dáleldengen jaǵdaıda 19,6 mıllıon teńgege deıin aıyppul salý nemese 5 jylǵa deıin bas bostandyǵyn shekteý jazasy qarastyrylǵan. Qazir tergeý naqty kimge qatysty júrgizilip jatqany jarııalanbaǵan.