Qazaqstanda 1-16 mamyr aralyǵynda ótip jatqan Dala.Camp ulttyq mal sharýashylyǵy ekspedısııasy qatysýshylary dalada jappaı qyrylǵan aqbókenderdi anyqtady. Oqıǵa Baıanaýyl men Kýrchatov arasyndaǵy aýmaqta, Jańa Aqshıman aýylyna jetpeı tirkelgen, dep habarlaıdy Egemen.kz.
Ekspedısııa músheleriniń aıtýynsha, janýarlardyń ólekseleri uzaq ýaqyt dalada jatqan. Bul olardyń bir sátte emes, birtindep qyrylǵanyn bildiredi.
Turan qaýymdastyǵy basqarma tóraǵasy jáne ekspedısııa jetekshisi Jánibek Kenjebaevtyń aıtýynsha jaǵdaıdyń yqtımal sebepteriniń biri – kóbeıý kezeńimen baılanysty tabıǵı bıologııalyq úderister. Bul ýaqytta aqbókender álsirep, syrtqy qaýipterge tózimdiligi tómendeıdi.
Atyraý oblysynyń úsh turǵyny Aqtóbede kıik ushasymen ustaldy
Degenmen, naqty qorytyndy jasaý úshin qosymsha ǵylymı zertteýler qajet ekeni atap ótildi.
Ekspedısııa jumysy jalǵasyp jatyr. Qatysýshylar daladaǵy ahýaldy baqylap, derekter jınap jatyr. Jınalǵan materıaldar keıin mal sharýashylyǵy salasynyń jaǵdaıyn jáne tabıǵı tepe-teńdikti tereń taldaýǵa negiz bolmaq.
Aıta keteıik, Dala.Camp ulttyq mal sharýashylyǵy ekspedısııasy 2026 jyldyń 1 mamyrynda Astana qalasynda bastalǵan. Joba Qazaqstannyń Turan mal sharýashylyǵy qaýymdastyǵy uıymdastyrǵan 16 kúndik dalalyq medıajoba retinde júzege asyp jatyr.
Ekspedısııa shamamen 10 óńirdi qamtyp, 6000 shaqyrymnan astam joldy eńserýdi kózdeıdi. Oǵan 40-qa jýyq fermer, sarapshy jáne sala mamandary qatysýda. Joba aıasynda naqty sharýashylyqtarda tájirıbe almasý, mal sharýashylyǵynyń ekonomıkalyq jaǵdaıyn taldaý jáne salanyń negizgi máselelerin anyqtaý josparlanǵan.
Qytaı ǵalymdary kıikti zertteýge den qoımaq
Ekspedısııa sońynda Qazaqstandaǵy et baǵytyndaǵy mal sharýashylyǵy boıynsha analıtıkalyq esep ázirlenip, kópserııaly derekti fılm men realıtı formatyndaǵy joba shyǵarylmaq.