Jýyrda elordadaǵy Tuńǵysh Prezıdent mýzeıinde Qazaqstan halqynyń birligi kúnine arnalǵan «Kúndelikti ómirdiń beıneleri» atty taqyrypta qor kórmesiniń ashylý saltanaty ótti. «Mýzeı jınaǵy» atty jańa mýzeıtaný baǵdarlamasy alǵash ret álem halyqtarynyń kúndelikti turmystyq mádenıetiniń mańyzdy tustaryn kórsetetin taqyryptyq ınterer toptamasyna júıelengen mýzeı jınaqtarynyń shaǵyn bóligin usyndy.
Kórmeni mýzeı dırektorynyń orynbasary Kúlaısha Aqtaeva ashyp, Elbasy kitaphanasynyń atqarýshy dırektory Beısembaı Jumabekov mýzeı tarıhyna, ondaǵy jádigerlerdiń qundylyǵyna toqtaldy.
Aıta keteıik, mýzeı jınaqtarynyń ereksheligi – Qazaqstan Respýblıkasynyń Prezıdenti N.Á.Nazarbaevqa, Qazaq eline, qazaq halqyna, álemdegi ózara yqpaldastyq pen tatý kórshilikti damytýǵa baǵyttalǵan Qazaqstannyń halyqaralyq deńgeıdegi belsendi is-áreketine degen zor qurmettiń belgisi retinde tabys etilgen syılyqtardan quralǵan. Toptamalar men jeke jádigerlerdiń tusaýkeseri mýzeı qyzmetkerleriniń júıelengen turaqty jumystarynyń nátıjesi retinde «Mýzeı jınaǵy» baǵdarlamasynyń mańyzdy baǵyttarynyń birin quraıdy. Álem halyqtarynyń alýan túrli shyǵarmashylyǵy men joǵary kórkem mádenıetiniń úlgilerinen iriktelip alynǵan qaıtalanbas biregeı jıyntyq óz tarıhynan kóptegen aqparat beredi.
Mýzeıdiń úsh zalynda ornalasqan «Kúndelikti ómirdiń beıneleri» kórmesiniń ekspozısııasy klassıkalyq mýzeılik sahnalyq kórinisterden jáne sanamyzda kúndelikti ómirdegi ásemdiktiń sımvoly retinde qalyptasqan jeke zattardan quralǵan. Kórme 2016 jyldyń 26 maýsymyna deıin jalǵasatyn bolady.
Raýshan TÁÝIRHANQYZY,
«Egemen Qazaqstan»
Sýretti túsirgen
Erlan OMAROV