Dızel me, hımııalyq suıyqtyq pa?

Atyraýda munaı ónimin jalǵan qujatpen zańsyz tasymaldaýshy ustaldy «Zamanyń túlki bolsa, tazy bop shal» qaǵıdasyn ustanatyndar áli de boı kórsetip qalady. Alaı­da, olardyń qýlyǵyn iske asyrýyna memlekettik kiris­ter departamentine qarasty ekono­mıkalyq tergeý qyzmeti men jergilikti polısııanyń jedel-izdestirý sharasy tosqaýyl boldy. Naqtysyn aıtqanda, bir­lesken shara barysynda Atyraý-Dossor kúre jolynyń boıyndaǵy «Qarabatan» ýaqyt­sha beketinde «Daf Te 105Xf» markaly tirkemeli avtomashına toqtatyldy. Atalǵan avtoma­shınany tekserý kezinde onyń tirkemesinde 26 dana arnaıy plastıkalyq ydystarǵa quıylǵan shamamen 26 000 lıtr suıyqtyq anyqtalǵan. Júktiń ilespe qujattaryn­da plastıkalyq ydystarda «Etılenglekol» hı­mııa­lyq zaty dep jazylǵan. Júk jó­neltýshi retinde «Granit» JShS kórsetilgen. Biraq, ydystardy ashqanda munaı óniminiń (dızel janarmaıy) ıisi bar maıly suıyqtyq anyqtaldy. Osyǵan oraı tirkemeli avto­kólik quraly arnaıy turaqqa qoıyldy. Al atalǵan jaıt bo­ıyn­sha memlekettik kirister depar­tamentiniń ekonomıkalyq tergeý qyzmeti Qylmystyq kodeks­tiń 197-babynyń 1-tar­ma­ǵymen (Munaıdyń jáne munaı ónimderiniń shyǵarylý zań­dylyǵyn rastaıtyn qujat­tar­syz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeý) sotqa deıingi tergeý tirkeldi. Bir tańdanarlyǵy, júkti jóneltýshi «Granit» JShS el aýmaǵynda tirkelmegeni belgili boldy. Demek, munda jalǵan qujattar jasaý qylmysynyń belgileri bar. Sonymen qatar, sotqa deıin­gi tergeý barysynda kórsetilgen júk­ten úlgiler alynyp, sarap­tama júrgizý úshin Atyraý mu­naı óńdeý zaýytynyń mamandary tartyldy. Aldyn ala beril­gen qorytyndyǵa qara­ǵanda, tirkemeli kóliktegi plas­tıkalyq ydystardaǵy suıyqtyq «dızel janarmaıy» bolyp tabylady. Joldasbek ShО́PEǴUL, «Egemen Qazaqstan». ATYRAÝ