ASTANA. 23 mamyr. Euromonitor International júrgizgen zertteýlerge sáıkes álemdegi eń kóp shaı ishetin elderdiń kóshiniń basyn О́zbekstannyń bastap turǵany belgili boldy. Bul týraly The Independent gazetiniń aqparyna súıengen egemen.kz tilshisi habarlady.
Basylymnyń jazýynsha, О́zbekstan turǵyndarynyń óte-móte basym bóligi shaı ishkendi qalaıdy eken. Zertteý bul el turǵyndarynyń 99,6 paıyzynyń shaısyz júre almaıtynyn kórsetti. Al eki Amerıkanyń qıylysyndaǵy Gvatemala memleketi jurtynyń 99,6 paıyzy kerisinshe kofeni qalaıtyn bolyp shyqty.
Álemdik zertteý uıymy muny jer júzinde «Siz shaıdy qalaısyz ba, kofeni jón sanaısyz ba?» degen saýaldama júrgizý arqyly anyqtaǵan.
Osy suraý salýdyń qorytyndysynda shaıqor elder de, kofequmar halyqtar da anyqtalyp shyǵa kelgen. Aıtalyq, shaı ishkishterdiń tizimin О́zbekstan bastasa, odan keıingi qatarlardy Kenııa (99,2%), Ázerbaıjan (99,1%), Pákistan (99%), Qytaı (98,9%) jáne Mysyr (98,5%) elderi alady. Al kofe ishkishterdiń kóshinde Gvatemaladan keıin Domınıkan Respýblıkasy (99%), Brazılııa, Ekvador (97,4%), Grekııa (96,8%) jáne Danııa (92,2%) tur.
Qazaqstan bul eki tizimniń de keýde qatarynda joq. Bizge qaraǵanda, Ulybrıtanııa men Reseıdiń ózi joǵary. Bulardyń aldyńǵysynda shaıqumarlar 78,4% bolsa, kelesisinde 77,5% kórsetkishinde. Al Estonııa men Polshada kofe men shaıdyń ara salmaqtary bir-birine óte jaqyn. Bularda tıisinshe olar 49% jáne 51% mólsherlerin quraıdy.
Talǵat Raıymbek.
Derek, foto: The Independent.