Almaty oblysy men Mysyr provınsııasynyń arasy jaqyndaı tústi

TALDYQORǴAN. 23 mamyr. О́tken juma kúni Almatyda Mysyr men Qazaqstan arasynda týrıstik salada yntymaqtastyqtyń jańa kezeńine arnalǵan baspasóz máslıhaty boldy. Ol Almaty oblysy men Mysyr provınsııasy arasynda yntymaqtastyq týraly memorandýmǵa qol qoıylýyna arnaldy. Bul týraly «QazAqparat» deregine silteme jasaǵan egemen.kz tilshisi habarlady. «Jýrnalıstermen kezdesýge Mysyrdyń Qazaqstandaǵy elshisi Haıtam Gamıl Kamal, Mysyrdyń Týrızm ákimshiligi bóliminiń basshysy Ahmed Shýkrı, Ońtústik Sınaı provınsııasynyń gýbernatory Halıd Fýda, Almaty oblysy ákiminiń orynbasary Serik  Turdálıev jáne Qazaqstan men Mysyrdyń týrızm, qonaq úı bıznesi salasynda qyzmet atqaratyn kompanııa basshylary qatysty», - delingen habarlamada. Kezdesý barysynda Almaty oblysy men Mysyrdyń eń tanymal týrıstik mekenderiniń biri - Ońtústik Sınaı provınsııasy arasynda yntymaqtastyq týraly memorýndamǵa qol qoıyldy. «Bul kelisimniń arqasynda Qazaqstan men Mysyr arasynda, ásirese, týrıstik saladaǵy qarym-qatynas jańa deńgeıge kóteriledi dep oılaımyn. Bul jerde búgingi kelisimniń alar orny erekshe. О́ıtkeni, Almaty oblysy Qazaqstandaǵy eń úlken, ekonomıkasy damyǵan jáne halyq kóp shoǵyrlanǵan óńirleriniń biri. Munda erekshe tarıhı oryndar kóp. Ońtústik Sınaı da Mysyrdyń eń betke ustar provınsııalarynyń biri. Munda búkil álemge tanymal Sharm-el-Sheıh shıpajaıy ornalasqan», - dedi Mysyrdyń Qazaqstandaǵy elshisi Haıtam Gamıl Kamal. О́z kezeginde Almaty oblysy ákiminiń orynbasary Serik Turdyálıev bul kelisim eki el arasynda týrıstik baılanystyń damýyna jańa serpin beretinin áńgimeledi. «Bul kelisimge qol qoıý biz úshin úlken qurmet. Endi Almaty oblysy men Ońtústik Sınaı arasynda týrızm, bilim, mádenıet, óner, ekologııa salasyndaǵy yntymaqtastyq damı túsedi degen senimdemin. Sonymen qatar, bul kelisim eki eldiń týrıstik kompanııalary arasynda seriktestik qarym-qatynastyń nyǵaıýyna negiz bolady», - dedi ol. Eske sala keteıik, qazirgi tańda jer sharynyń árbir 11-shi turǵyny týrızm salasynda qyzmet etedi. Al Qazaqstannan Mysyrǵa baratyn týrıster sany jyldan jylǵa arta túsýde. Sonyń bir aıǵaǵy – ótken jyly elimizden Mysyr jerine 22 myńnan astam adam týrıstik saparmen baryp qaıtqan eken. Nurbol Áldibaev. Derek: QazAqparat.