Hadısha BО́KEEVA

Qazaq óneri aýyr qazaǵa ushyrady. KSRO jáne Qazaqstannyń halyq ártisi, ataqty aktrısa Hadısha Bókeeva dúnıe saldy. Hadısha Bókeeva 1917 jylǵy 21 aqpanda Batys Qazaqstan oblysynyń Kaztalovka selosynda dúnıege keldi. Áke-sheshesinen erte aırylyp, ınternatta tárbıelendi. 1932-1934 jyldary Almaty medısınalyq ınstıtýtynyń daıarlyq kýrsynda oqyp júrip, Qazaq radıokomıtetinde ánshi boldy. Tabıǵı daryny ony Sankt-Peterbýrgtiń teatr, mýzyka jáne kınematografııa ınstıtýtynyń qazaq stýdııasyna alyp keldi. Ol ataqty akterler men rejısserlar V.Meıerhold, L.Vıven, V.Merkýrevten tálim-tárbıe aldy. H.Bókeevanyń shyǵarmashylyq qyzmeti 1938 jyly Shymkent oblystyq qazaq drama teatrynan bastaldy. 1942 jyldan Almatydaǵy Qazaqtyń mem­lekettik akademııalyq drama teatrynda úzdik­siz jumys jasady. Talantty aktrısa Hadısha Bókeeva dramalyq, tragedııalyq jáne komedııalyq rólderdi birdeı sheberlikpen oınady. Ol oınaǵan Ý.Shekspırdiń «Asaýǵa tusaýynda», «Rıchard III-de», «Otelloda» – Katarına, Koroleva Margarıta, Emılııa, M.Áýezovtiń «Qara qyp­shaq Qobylandysynda» – Qarlyǵa, «Abaıda» – Bas­taýshy, Ǵ.Músirepovtiń «Aqan seri – Aqtoq­tysynda» – Aqtoqty, Á.Ábishevtiń «Dostyq pen mahabbatynda» – Sáýle, A.Ostrovskııdiń «Naıza­ǵaıynda» – Katerına, Q.Muhamedjanov pen Sh.Aıtmatovtyń «Kóktóbedegi kezdesýinde» – Aısha apaı, T.Ahtanovtyń «Sáýlesinde» – Sáýle jáne basqa da kóptegen rólderi oryndaýshylyq ónerdiń klassıkalyq úlgisine endi. Álemdik dramatýrgııa klassıkteri Lope de Vega, Shıller, Moler, Meterlınk shyǵarmalaryndaǵy keıipkerlerdi somda­ǵan obrazdary sol keıipkerdiń ishki sezimin tereń ashyp kórsetýimen jáne shynaıy beıneleýimen erekshelenetin edi. Ol kórkemsóz oqýdyń da has sheberi boldy. Hadısha Bókeeva sahnamen qatar pedagogıkalyq qyzmetti belsendi ushtastyra bildi. Birneshe býyn qazaqstandyq ártisterdi tárbıelep shyǵardy. H.Bókeevanyń ulttyq kıno ónerinde «Raıhan» (1940), «Asaý Ertis jaǵasynda» (1959), «Tulpar­dyń izi» (1964) fılmderindegi rólderin erekshe atap ótken jón. Belgili aktrısanyń qazaq ónerine sińirgen eńbegi eskerilip, ol «Otan», Lenın, «Qurmet belgisi» ordenderimen jáne birneshe medaldarmen marapattaldy. Al 1952 jyly «Abaı» pesasyn­daǵy róli úshin KSRO Memlekettik syılyǵynyń laýreaty atandy. Asa daryndy aktrısa, kórnekti óner qaıratkeri Hadısha Bókeevanyń jarqyn beınesi bizdiń jady­myzda árdaıym saqtalady. Qazaqstan Respýblıkasynyń Úkimeti. * * * EShKIMGE UQSAMAITYN Seksen bes jyldan astam tarıhy bar qasıetti qara shańy­raq­ta teatrdyń myqty bolýy úshin joqtan bar jasaǵan babala­ry­myz­dyń seriktesi, qazaq halqy­nyń mańdaıyna bitken uly aktrısa Hadısha Bókeıqyzy ǵasyrǵa jýyq ómir súrip, dúnıeden ótti. E.О́mirzaqov, Q.Jandarbekov, Sh.Aımanovtarmen sahnada seriktes boldy. Sábıra Maıqanova, Bıken Rımova, Rahııa Qoıshybaeva, Sholpan Jandarbekova, Jamal Jal­mu­hanbetovalarmen zamandas bo­lyp, somdaǵan rólderi de erekshe edi. Lenıngradta ustazy Merkýrevten bitirip, Shymkenttiń drama teatrynda eńbek etken H.Bó­keeva oblystyq teatrdan keıin M.Áýezov teatryna jumysqa kel­di. Bul kisiniń óziniń ataǵyna saı jasaǵan obrazdary qazaq teat­ry­nyń tarıhynda altyn árippen ja­zyldy. Rólderine kelsem, Os­trovskııdiń «Naızaǵaı» pesa­syn­­da­ǵy Katerına, N.Hıkmettiń «Far­­­had-Shyrynyndaǵy» – Mehmenebaný. Sondaı-aq T.Ahta­nov­tyń osy kisige arnap jazǵan «Sáýle» pesasynda bas keıipkerdi oınap, óte joǵary deńgeıge shyǵaryp, óner álemin dúr silkindirdi. Apamyz­dyń Shekspır­diń «As­aý­ǵa tusaýyndaǵy» Kata­rına­ny, al Sh.Aımanov – Petrýchıo ró­linde oı­naǵany áli este. Qo­ıy­lym teatrda úlken bir sal­tanat­ty meıram retinde ótetin. H.Bó­keeva eshkimge uqsamaıtyn, eshkimdi qaıtalamaı­tyn tulǵa edi. Teatr ónerine ózi­niń eńbe­gimen, óziniń sabyrly minezimen tamasha iz qaldyrdy. Apamyz­dyń, Allaǵa shúkir, ataq-aby­roıy bıik deńgeıde boldy. Jasa­ǵan beıneleri kóp bolmasa da óte sapaly túrde kókeıge qonymdy edi. Bul kisiniń ekinshi ómirindegi úlgili joly – shákirt­ter daıyn­daýdaǵy eńbegi eren, shákirtte­ri­niń bári qazir tulǵaǵa aınaldy. Atap aıtsam, «Qyz Jibektegi» Quman Tastanbekov, Merýert О́te­keshova, kórnekti teatr-kıno akteri, qazir Teatr qaırat­kerleri odaǵyn bas­qaryp otyrǵan Tuń­ǵyshbaı Ja­man­qulov, «Birjan sal» fılmin qoıǵan, teatr óne­rin órge súı­regen, súıikti apa­sy­na dúnıeden ótkenshe qamqorlyq jasaǵan Dos­han Joljaqsynov, qa­zaq teatr­larynyń tarıhyn ja­zyp, dáıekti oılarymen ónerde ónege kórse­tip júrgen synshy Á.Syǵaı, Aty­raý teatrynyń kó­te­­rilýine kúsh jumsaǵan T.Qýa­ny­shev, son­daı-aq belgili sahna qaı­ratkeri Rahılıam Mashýrova, ómi­riniń so­ńyna deıin qasynan ta­bylǵan sah­na sheberi Ǵaını­ka­mal Baı­qosh­qarova, taǵy da bas­qa­lardy aıtýǵa bolady. Bir ǵasyrǵa jýyq ǵumyr keshken apamyzdyń arty jaqsy, jat­qan jeri jaıly, ımany salaýat bolsyn deımin.

Sábıt ORAZBAEV, Qazaqstannyń halyq ártisi.

* * *

EShQAShAN KEÝDE QAQQAN EMES

О́ner tarıhynda Sháken Aımanov pen Hadısha Bókeeva oı­naǵan Shekspırdiń «Asaýǵa tu­saý» shyǵarmasy úlken jańa­lyq boldy. Stýdent kezimde teat­rǵa sol ekeýin kórýge bara­tynmyn. Ekeýi de jalyndap oınaıtyn. Olar ózderin Shekspır zamanynyń adamdary sekildi sezinetin.  Ol ekeýi shyq­qan bıikke keıingi býyn jetti me, jete almady ma, bul úlken suraq. Keıin ózim de dramatýrg bolyp, alǵashqy dramatýrgııa­lyq shyǵarmam 1967 jyly Muh­tar Áýezov atyndaǵy ákemteatr sahnasyna shyqqanda apaımen tanystym. О́te bııazy, adam syı­laı biletin, tárbıeli jan edi. «Men talanttymyn, maǵan ataq berińder» dep keýde qaqpaıtyn. Tipti ataq-dańq ol kisini ózi izdep keletin. «Kúlmeıtin komedııada» Hadısha degen keıipkerdi Hadısha apaı oınady. Qoıylymnyń negizgi uıytqysy ózi bolyp, qalaı oınaý kerektigin, jas avtorlardy qalaı syılaý kerektigin basqalar­ǵa úıretip júretin. M.Begalın qoıǵan meniń al­ǵash­qy fılmim «Tulpardyń izinde» tórt uly akter oınaıtyn. Farıda Sháripova, Hadısha Bókeeva, Káýken Kenjetaev jáne Asanáli Áshi­mov. Sol tórteýi ólmes mura qal­dyrdy. Hadısha apaı qapysyz uzaq ómir súrdi. Biraq ol kisiniń ishinde jarasy bitpeıtin arman ketti. Sońǵy on-on bes jylda serigi, muń­dasy, syrlasy Jalǵyzdyq degen qatygez shyndyq qana boldy. Endi ol kisiniń jany jánnatta bolady dep oılaımyn. О́zi dúnıe­den ótkenimen ol kisi jasaǵan obrazdar erteńgi jas urpaqpen ylǵı da syrlasyp júretinine senimdimin. Ámın!

Ákim TARAZI, jazýshy.

* * *

OL ULY AKTRISA EDI

Hadısha Bókeevanyń qazasy jalpy qazaq óneri, onyń ishinde M.Áýezov atyndaǵy teatr úshin úlken qaıǵy. О́ıtkeni, qazaq teatr óneriniń negizin salýshylardyń biri dúnıe saldy. Ol qazaq ak­trı­salarynyń ishinde parasaty, má­denıeti joǵary, bolmysy erekshe tulǵa boldy. Munyń birneshe sebebi bar. Birinshiden, ol Oralda, tarıhy tereń, mádenıeti joǵary ortada ósti. Ekinshiden, Lenın­grad­taǵy Teatr-kıno, mýzyka ıns­tıtýtynda bilim aldy, V.Meı­erholdtiń shákirti V.Merkýrev syndy sheberdiń dárisin tyńdady, tálimin kórdi. Úshinshiden, sonaý jas kezinde ulylar: Qalıbek, Elýbaı, Serke, Sháken, Nurmuhan, Ydyrystardyń ortasyna tústi, olarmen sahnada seriktes boldy, qazaq teatr ónerin órge súıredi. Aktrısanyń tabıǵı talant, erekshe zerektigi, eńbekqorlyǵy, ózi­ne degen talapshyldyǵymen ush­tala tústi. Akterdiń sahnada sonshalyqty kóp ról oryndaýy shart ta emes bolýy kerek. Al, solardyń ishinen úsh-tórteýi sahna óneriniń búkilálemdik deńgeıi­ne jetse – naǵyz baqyt. Osyndaı bıikke jetken rólderiniń qata­rynda Shekspırdiń «Asaýǵa tu­saý­yndaǵy» Katarına, A.Os­trov­skııdiń «Naızaǵaıyndaǵy» Katerına, N.Hıkmettiń «Farhad-Shy­rynyndaǵy» Mehmenebaný, T.Ah­tanovtyń «Sáýlesindegi» Sáýleni, sondaı-aq kınodaǵy birneshe ró­lin aıtamyz. Hadısha Bókeeva men úshin uly aktrısa. Sonaý 1974 jyly Áshir­bek (Syǵaev) ekeýi qarly qysta Semeı teatryna kelip, jumysy­myz­ben tanysqany, shákirtteriniń oıynyn tamashalaǵany, aıtqan tilek-pikirleri esten ketpeıdi. О́ki­nishim sol – Hadısha apamen spektakl qoıa almadym. О́ıtkeni, men M.Áýezov teatryna basshylyqqa kelgende aktrısa sahnaǵa kóp shyqpaıtyn kez edi. Degenmen de 90 jyldyǵyn keremet etip ótkiz­dik. Uly aktrısa kórermenine sol joly sońǵy ret taǵzym etken-di. Hadısha apamyzdyń eń jaqsy qasıeti – sonshalyqty sabyrly­lyǵy, náziktigi edi. Bárin ishteı bilip, ishki bir parasatymen elep-ekshep otyratyn. Adamı taza, bala sııaqty edi. О́zi «Kóktóbedegi kezdesý» spektaklinde Aısha apaı rólinde aıtatyndaı: «Qaıtkende adam qalady adam bolyp...» ómir­lik devızi boldy. Onyń sońynda has rólderi, taǵylymy, urpaǵy, myqty shákirtteri qaldy. Iá, qazaq óneri barda Hadısha Bókeevanyń esimi umytylmaıdy. Janyńyz jannatta bolsyn, qa­dir­li apa, uly aktrısa!

Esmuhan OBAEV, M.Áýezov teatrynyń kórkemdik jetekshisi, Qazaqstannyń halyq ártisi.

* * *

MÁÝELI BÁITEREKTEI SAIаLADYQ

Qazaq óneri aýyr qazaǵa ushy­rady. Ulttyq sahna óneriniń korıfeıi, KSRO halyq ártisi, KSRO Memlekettik syılyǵy­nyń laýreaty, professor Hadısha Bókeeva dúnıeden ozdy. Ǵasyrda bir týatyn talant ıesi Hadısha Bókeeva jasaǵan ǵajaıyp obrazdar galereıasy ár­qashan halyq jadynda. Álem­dik jáne tól dramatýrgııa­myz­dyń injý-marjandary Ý.Sheks­pırdiń «Asaýǵa tusaýynda» – Katarına, N.Hıkmettiń «Far­had-Shyrynynda» – Mehmenebaný, A.Ostrovskııdiń «Naıza­ǵaı­ynda» – Katerına, M.Áýe­zov­tyń «Qara qypshaq Qobylan­dysynda» – Qarlyǵa, T.Ahta­nov­tyń «Sáýlesinde» – Sáýle jáne t.b. taǵdyry qym-qýaty názik jan­dardyń beınelerin jasaǵan aktrısa, Jaratqannyń jumbaq zaty – áıelder álemin ádemi áspettep ketti. Qazaq akterlik óneriniń altyn qoryn qaıtalanbas sheberligimen baıytqan Hadısha apamyz Batys mádenıetiniń úzdik úlgisin ulttyq sahna tórine ákelgen ká­sibı aktrısa. О́ziniń tula boıyn­daǵy tańǵaldyrar tamasha talan­tyn respýblıkamyzdaǵy teatr uj­ymdarynda eńbek etip júrgen shákirtterine jomarttyqpen syı­laı bilgen ulaǵatty ustaz óne­rimizdiń máýeli báıteregi ispetti. Sol báıterektiń kóleńkesin saıalap júrgen izbasarlary, búgingi urpaq jetimsirep qaldyq. Sahna­nyń sıqyrly álemi arqyly kó­rer­menniń kókiregine ıman, júre­gine adamgershilik, janyna mahabbat nuryn uıalatqan uly Hadıshamen qoshtasý qıyn-aq. Qosh bol, qazaq sahnasynyń padıshasy! Jatqan jeriń jaıly, ımanyń serik bolsyn!

Tuńǵyshbaı JAMANQULOV, Qazaqstan Teatr qaıratkerleri odaǵynyń tóraǵasy.

* * *

ÁR ISI О́NEGE BOLATYN

Hadısha apaı týmysynan bó­lek jaratylǵan, tabıǵaty tekti jandardyń biri edi. Kózime  erekshe parasat pen mádenıettiń úl­gisindeı kórinetin. Onyń kez-kel­gen janmen aralas-qura­las­ty­ǵyn­da bólekshe syrbazdyq baıqa­lyp turatyn. Kópsózdilikke, on­yń ishinde kópirme sózge, jasan­dy­lyq­qa jany qas adamdardyń biri de osy Hadısha apaı edi. Bir­deńeni unatpasa, daýys kótermeı, eshkimniń janyna tıetin sóz aıtpaı, ústeldi oń qolynyń saýsaq­tarymen tyqyldatyp otyratyn bir qasıeti bolatyn. «Eı, áı, óı» degen sózderdi estise, qabaǵy túsip ketetin. Qaı jerde bolma­syn osy sózderge abaı bolý kerektigin lezdemelerde  aıtyp oty­ratyn. «Halqymyzdyń mádenıe­tine syn bolady» dep qoıatyny bar edi. Ol úshin eń kıeli oryn sahna boldy. Eń alǵash teatrǵa kelgenimde apaıdyń  maǵan «Balaqaı, sahnada ókshemen emes, aıaqtyń ushymen júrý kerek» dep aıt­qany áli jadymda. Men ol sózdi eki maǵynada túsindim. Birinshiden, shyn máninde sahnada ókshe­men júrýge bolmaıdy, ekinshiden, «sah­nanyń kıesi bar, ony qur­metteý qajet» degeni shyǵar dep tú­sindim. Hadısha apaıdyń  taǵy bir er­ek­she qasıeti retinde ustam­dy­ly­ǵyn, sabyrlylyǵyn aıtýǵa bo­la­dy. Kóńil-kúıin jasyryn us­taı­tyn. О́mirde birde-bir ret kóz ja­syn kórsetken emes. Tek 80-jyl­dary bolǵan oqıǵa ǵana apaı­dyń jan dúnıesin qatty qoz­ǵady-aý dep oı­laımyn.  Batys Qazaqstan ob­ly­syn­da gastroldik saparda júr­genbiz. Apaı bizdi bir aýdan­nyń orta­ly­ǵyn­daǵy eski úıge ertip apar­dy. Sol úıge jaqyndap baryp, bosaǵasyn ustap egilip jylap turǵany kóz aldymda sýret bop qalyp ketipti. Sóıtsem, ol Hadısha Bókeeva týǵan úı eken. Sodan keıin ol kisiniń eshqashan  jyla­ǵanyn kórmeppin. О́zindik bet-beınesi, ózine tán erekshe minezi bar osyndaı kisiniń o dúnıelik bolýy qabyrǵamdy qaı­ystyrady. Amal ne, bárimizge or­taq ajal ǵoı. Topyraǵy torqa bolsyn!

Tilektes MEIRAMOV, Qazaqstannyń halyq ártisi.

* * *

TEKTI JAN BOLATYN

Hadısha apaıdyń boıynda Jaratýshydan berilgen asyl qasıetterdiń barlyǵy bar edi. Onyń oınaǵan qoıylymdaryn biz qyzyǵa kóretinbiz. Biz ǵana emes, barsha jurtqa unaıtyn. Mysaly, onyń Katarınasy búkil Máskeý moıyndaǵan beıne. Sondaǵy árbir qımyl-qozǵalysy áli kúnge kóz aldymda desem, apamyz biz úshin naǵyz ustaz boldy. Onyń tárbıesin kórgen kóptegen ártister búgingi tańda qazaq sahnasynyń jaryq juldyzdary bolyp júr. Meniń ózim de Hadısha apaımen talaı ret sahnalas boldym. Sol úshin de baqyttymyn! Ol kisiden kóp nárse úırendik. Teatr ónerine 20 jasymda kelgen bolsam, búginde sahnada júrgenime 45 jyldyń júzi bolypty. Osy ýaqyttyń 34 jylyn Hadısha apaımen birge ótkizdim. Teatrdaǵy barsha qyz-kelinshekterge kıim kııý, áshekeı buıymdardy jarastyryp taǵyný mádenıetin, tamaqtaný ádebin, tipti júrip-turyp, óz ornymen sóıleýdiń ózin osy Hadısha apaı úıretti desem de bolady. Qazaq talantty halyq qoı. Áli de, talaı Hadıshalar keledi ómirge. Biraq, ol kisiniń orny bólek. Jaqsyny adam qııa ma?! Aldy jaryq bolsyn!

Gúljan ÁSPETOVA, Qazaqstannyń halyq ártisi.

* * *

О́LMES BEINELER JASADY

Hadısha apaıdyń teatr óne­rindegi alar orny orasan, uly aktrısa bolǵanyn kórermen qaý­ym jaqsy biledi. Ol – qazaq sah­na­syna eýropalyq úlgidegi arıstokratızmdi alyp kelip, qazaqy tektilikpen ushtastyra bildi. On­yń somdaǵan keıipkerleri aq­súıek­terge tán kirpııazdyǵymen, ózin­dik ómir súrý mánerimen er­ekshelendi. Álemdik klassı­ka­lardaǵy mańdaıaldy beınelerdi jasap, qazaq teatr óneriniń jańa bir beleske kóterilýine zor úles qosty. Ý.Shekspırdiń 400 jyl­dyq torqa­ly toıynda Anglııada ótken teatr merekesine áriptesi Sháken aǵa Aımanovpen birge bizdiń teatr óne­rimizdi alǵash ret álemge ta­nyt­ty. Tanytyp ǵana qoımaı, qa­zaq degen qasıetti ha­lyqtyń da­rynyna tamsandyryp, ózge­ler­di tánti etti. Hadısha apaı qa­zaq kınosynyń kemeldený ke­ze­ńine de aıanbaı ter tókti. Shy­ǵys ha­lyqtarynyń: «Artyńda qalar shákirt tárbıelemeseń, bul ómir­di bosqa ótkizgeniń» degen fál­sa­fasyn da aldyna maqsat etip qoıa bilgen ulaǵatty ustaz ónerge degen adaldyǵynan aıny­ǵan emes. Qadirli Hadısha apaı! Endi, mine, ónersúıer qaýym men árip­testerińizdi ókindirip, ǵaıyptyń kemesine minip, fánıden baqı­lyqqa kóship barasyz... Alla ıman baılyǵyńyzdy berip, aldyńyz­dan jarylqasyn! Adaldyqqa to­ly janyńyzdy jánnattyń tórine kótersin! Súıingende de, kúıingende de aıtar «Balaqaı!..» – degen sózi­ńizdi saǵynar shákirtterińiz qal­dy. El barda óner óshpek emes! Sol ónermen birge Sizdiń esimińiz de máńgi jasaı bermek! Baqul bolyńyz, qazaq sahnasynyń aq­súı­ek aktrısasy – Hadısha apaı!

Áýbákir RAHIMOV, M.Áýezov teatrynyń rejısseri, Qazaqstannyń eńbek sińirgen qaıratkeri.

* * *

ÚLGI-О́NEGE ALDYQ

Hadısha Bókeeva qazaq aktrısala­ry­nyń ishindegi eń tekti de sulý, baladaı ańǵal da erekshe taza apamyz edi. Onyń ónerinen de, ómir súrý saltynan da úlgi-ónege alyp óstik. Bizder 1958 jyly M.Áýezov teatrynyń stýdııasyna kelgende emtıhan qabyldaǵandardyń ishinde Hadısha apa da boldy, sonsoń stýdııa­lyq­tarǵa sabaq berdi. Naǵyz ustaz boldy. Ol kisiniń róldi qalaı jetildirý kerektigi týraly áńgimeleri óz aldyna, oqýǵa jańa kelgen jastarǵa qalaı kıinip, qa­laı júrý, qalaı sóıleý, tipti qasyq pen sha­nyshqyny qalaı ustaýǵa deıin úıre­te­tini búginde ańyz. Ol kóptegen jasqa, on­yń ishinde Esbolǵan (Jaısańbaev) ekeýmizge de úlken ustaz, anamyzdaı boldy. О́zi qatań da talapshyl, biraq júregi sonsha­lyq­ty jumsaq, jany názik edi. Hadısha apa Mehmenebanýdy, Sháken aǵa ekeýi jup­tasyp Katarına men Petrýchıony oına­ǵan­da bizder sahna artynda turyp qyzyq­taı­tynbyz, tań qalyp, rahatqa bólenetinbiz. Hadısha apanyń elimiz táýelsizdik al­ǵan­nan keıingi, mysaly «Soqyrlar», «Kebenek kıgen arýlar», «Qylkópir» qoıy­lym­daryndaǵy rólderi de qyrtysty bol­dy. Onymen sahnada birge bolý úlken ba­qyt edi. Hadısha apada qyzǵanysh, ishtar­lyq degen eshqashan bolǵan emes. Bir rólge birge túskende barynsha qamqorlyq kór­setip, aqyl-keńesin aıtyp júretin. Eshbir artyq sózi joq, sonshalyqty kishipeıil, mádenıeti óte joǵary adam edi. Hadısha apa uly aktrısa ǵana emes, jaq­sy da súıikti jar boldy. Qazaq óne­riniń úlken tulǵasy Baıǵalı aǵa ekeýi sonshalyqty baqytty da aıaýly ǵumyr kesh­ti. Olardyń otbasylyq ómiri, birin-biri aıalaýy da jastarǵa úlgi, al Hadısha apa­nyń aktrısalyǵy, áıel, ana bola alý qu­direti bizderge ónege. Topyraǵyńyz torqa, ımany­ńyz salamat bolsyn, qadirli apa!

Salıha QOJAQOVA, Qazaqstannyń eńbek sińirgen ártisi.