Ǵylym salasyndaǵy jasandy ıntellekt

Saltanatty jıynǵa 400-den astam otandyq jáne sheteldik ǵalymdar, sa­la­lyq mınıstrlikter men jergilikti at­qa­rýshy organdardyń, ındýstrııa men bız­nes salalarynyń ókilderi, joǵary oqý oryndary men ǵylymı zertteý ınstıtýt­tary­nyń basshylary qatysyp, ǵylymdy boljaý, tehnologııalyq damý baǵytta­ryn aıqyndaý jáne predıktıvti analıtıkany engizý máselelerin talqylady. Is-sharanyń basty taqyryby – ǵylymdy basqarýdyń jańa tásili men jasandy ıntellekt múmkindigin ulttyq ǵylymı ınfraqurylymǵa engizý boldy.

Prezıdent janyndaǵy Ulttyq ǵylym akademııasynyń prezıdenti Aqylbek Kúrishbaev jańa ortalyqtyń ashylýyn ǵylymdy uıymdastyrýdaǵy sapaly ózgeristiń bastamasy dep baǵalady. Onyń aıtýynsha, ǵylym burynǵy­daı jeke jobalardyń jıyntyǵy emes, eldiń áleýmettik-ekonomıkalyq damýyna qyzmet etetin birtutas júıe bolýǵa tıis. «Biz ǵylymdy qarjylandyrý­dyń bytyrańqy modelinen bas tartyp, resýrstardy strategııalyq basymdyqtarǵa baǵyttaıtyn jańa arhıtektýraǵa kóshýimiz qajet. «AI SilkNet» osy úderistiń ıntel­lektýaldyq ózegine aınalady», dedi ol. Akademııa prezıdenti ǵylymı saıa­sat naqty nátıjege, ulttyq básekege qabi­lettilikti arttyrýǵa jáne bolashaq tehnologııalyq múmkindikti aldyn ala anyqtaýǵa negizdelýi kerektigin atap ótti.

«AI SilkNet» ortalyǵy Ulttyq ǵylym aka­demııasy men Koreı ǵylymı-tehnı­ka­­lyq aqparat ınstıtýtynyń (KISTI) bir­les­ken bastamasy retinde quryldy. Ashylý rási­mi­ne qatysqan KISTI prezıdenti doktor Sık Lı qazirgi álemde ǵylymı jetistik de­rekterdi tıimdi taldaý men uzaqmerzimdi bol­jaýǵa tikeleı baılanysty ekenin aıtty. «For­saıt jáne predıktıvti analıtıka mem­leketterge tehnologııalyq ózgerister­di aldyn ala túsinýge múmkindik beredi. Qazaqstanmen birlesken bul orta­lyq ǵylymı yntymaqtastyqty jańa deńgeıge kóterip, Ortalyq Azııa úshin mańyzdy taldaý alańyna aınalady», dedi Ǵylym akademııasynyń prezıdenti.

Jasandy ıntellekt jáne sıfrlyq damý vıse-mınıstri Dmıtrıı Mýn jańa platformanyń ulttyq ǵylym úshin strategııalyq mańyzyna toqtaldy. Onyń sózinshe, «AI SilkNet» ǵylymı aqparat­tyń aýqymdy kólemin taldap, jahandyq tehnologııalyq trendterdi anyqtaýǵa, patenttik jáne jarııalanymdyq analı­tıka júrgizýge, sondaı-aq túrli salalar­dyń damýyna arnalǵan predıktıvti ssenarııler jasaýǵa múmkindik beredi. «Ǵy­lym men tehnologııa forsaıty – strategııa­lyq basqa­rý quraly. Ulttyq JI plat­for­masy ǵy­ly­mı aqparat kólemin taldaý­ǵa, ǵa­lam­dyq tehnologııalyq trendterdi anyq­taýǵa, patenttik jáne jarııalanymdyq ­ana­lıtıkany júrgizýge, salalardyń da­­mýyna predıktıvtik ssenarııler ja­­saýǵa jáne ǵylymı ári eksperttik tapsyrma- larǵa arnalǵan arnaıy AI-agent­terdi qu­rýǵa múmkindik beredi», dedi vıse-mınıstr.

Jańa ortalyq ǵylymı, tehnologııalyq jáne ındýstrııalyq derekterdi biriktirip, ǵy­lymı zertteý jáne tájirıbelik-kons­trýk­­­tor­lyq jumystardyń basym baǵyt­ta­­ryn negizdeýge baǵyttalady. Sony­men qatar­ «AI SilkNet» akademııaǵa arnaıy JI-­agent­ter ázirleýge, strategııalyq baıan­­damalar­dy jedel daıyndaýǵa jáne álem­degi teh­nologııalyq ózgeristerdi turaq­­ty sarap­taýǵa múmkindik beredi. Sarap­shylar­dyń pikirinshe, bul ǵylym, mem­leket jáne ekonomıkanyń naqty sektory ara­syndaǵy baılanysty kúsheıtip, ǵyly­mı sheshim qabyldaýdy jańa deńgeıge shyǵarady.

Strategııalyq sessııa barysynda óńir­lik ǵylymdy damytý, forsaıt je­lisin qalyptastyrý jáne ǵylymı basym­dyqtardy aıqyndaýǵa ákimdikter men ındýstrııa ókilderin tartý máseleleri de keńi­nen talqylandy.