Keıipkerlerimiz Sáýlen otbasynan tórt izdenýshi shyǵyp otyr. Úlkeni Aqsuńqar – halyqaralyq deńgeıdegi qarjy jáne ekonomıka salasynyń mamany. Ol 2015 jyly Qytaıdyń bedeldi oqý oryndarynyń biri – Shanhaı qarjy jáne ekonomıka ýnıversıtetinde bilim aldy. Kóp ótpeı Fransııadaǵy ataqty «Université Paris 1 Panthéon-Sorbonne» ýnıversıtetinde ekonomıka mamandyǵy boıynsha magıstr dárejesin aldy. Eńbek jolyn 2016 jyly «Kazakh Invest» ulttyq kompanııasynda bastap, shetelden ınvestısııa tartý baǵytynda qyzmet atqardy. Al 2019 jyldan 2025 jylǵa deıin «Astana» halyqaralyq qarjy ortalyǵynyń ákimshiliginde ekonomıst, bólim basshysy jáne ınvestısııa tartý mamany retinde jumys istep, el ekonomıkasyna halyqaralyq kapıtal tartý isine úles qosty.
Sáýlen otbasyndaǵy ekinshi jas maman – Haqnazar. Ol 2015–2020 jyldary Nazarbaev ýnıversıtetinde robottehnıka jáne mehatronıka mamandyǵy boıynsha bilim aldy. Tehnologııaǵa degen qyzyǵýshylyǵyn tereńdetý maqsatynda Aýstralııadaǵy «Torrens University»-de IT salasy boıynsha magıstratýrany aıaqtady. Qazir ol Aýstralııanyń Brısben qalasynda aqparattyq tehnologııalar salasynda jumys istep, halyqaralyq IT-ındýstrııasynda tájirıbe jınap júr. Onyń kásibı joly – qazaq jastarynyń álemdik tehnologııalyq keńistikke erkin qanat sermep jatqanyn kórsetedi.
Aıdanaq – halyqaralyq tájirıbesi mol jas kásipker. Ol Nazarbaev zııatkerlik mektebiniń túlegi retinde bilim jolyn bastap, keıin Nazarbaev ýnıversıtetinde áleýmettaný jáne ekonomıka mamandyǵy boıynsha bakala-vrıat bitirdi. Stýdenttik kezeńnen halyqaralyq jobalarǵa qatysyp, 2018–2020 jyldary AQSh-taǵy «Southwestern Advantage» kompanııasynda marketıng salasynda jumys istedi. Osy baǵdarlama aıasynda toǵyz elde ótken sharaǵa elimiz atynan qatysyp, kásibı tájirıbesi men biliktiligin kórsetti. Keıin halyqaralyq «Eskimi Adtech» tehnologııalyq kompanııasynda marketıng jáne bıznes analıtıka salasynda eńbek etip, 2023 jyldan bastap jeke kompanııasyn damytyp keledi.
Otbasyndaǵy eń jas maman Nartegindi bilimge qushtar jańa býyn ókili deýge bolady. Ol 2019–2025 jyldary Nazarbaev zııatkerlik mektebinde bilim alyp, matematıka páni boıynsha olımpıadalardyń júldegeri atandy. 2025 jyly Nazarbaev ýnıversıtetine bakalavrıat baǵdarlamasyna oqýǵa túsip, bolashaq ǵylymı jolynyń alǵashqy qadamyn jasady. Bir sát bul otbasyndaǵy jas izdenýshilerge nazar salsaq, olardyń bilimge qushtarlyǵy, halyqaralyq tájirıbesi men óz bilimin qoǵam ıgiligine jumsaýǵa degen jaýapkershiligi madaqtaýǵa turarlyq.