ASTANA. 7 maýsym. Qytaıdyń Shansı provınsııasynyń ákimshilik ortalyǵy Taııýan qalasynyń týrıstik aımaǵynda ondaǵan eski avtobýstar qonaq úılerge aınaldy. Bul týraly ekd.me saıtyna silteme jasaǵan egemen.kz tilshisi habarlady.
Erekshe qonaq úı kesheni osy jyldyń basynda ashyldy.
«Qoldanystan shyǵyp qalǵan avtobýstardy satyp alý óte ońaı. Menińshe, ony paıdaǵa jarata bilý tamasha ádis. Olardyń árqaısysynda bólme, qonaqjaı bólme, jýynatyn bólme, sonymen qatar jylý, jaryq pen sýmen qamtý júıesi bar», – dedi qalalyq týrıstik vedomstvo qyzmetkeri Gao Iýnpın.
Onyń aıtýynsha, týrıstik aımaqta osyndaı 50 avtobýs-bólme bar. Al eski avtobýsty meımanhanaǵa aınaldyrý úshin 9 myń dollar kóleminde qarjy ketedi eken. Osy jyldyń 1 shildesine deıin osyndaıdyń 200-ge jýyǵyn ashýdy maqsat etip otyr. Eń qyzyǵy, aldaǵy ýaqytta traktordan, júk kólikterinen, tipti ushaqtan jasalǵan qonaq bólmeler ashylýy múmkin.
Al mundaı nómirde bir ret túneý quny 200-den 600 ıýanǵa deıin. Bul teńgege shaqqanda shamamen 10 myń – 30 myń teńgeni quraıdy.
Aıan Ábdýálı.
Derek, foto: inform.kz.