Burnaǵy kúni fýtboldan Fransııada ótip jatqan Eýropa dop dodasy taǵy bir toptyń oıyndaryn tııanaqtap berdi. Bul joly V tobyndaǵy eki oıynnyń birinde iri esep tirkelse, ekinshisi teń aıaqtaldy. Týlýzada utylǵan Reseı quramasy endi eline qaıtatyn bolsa, utqan Ýels toptyń kóshin bastady. Al Sent-Etende qatar ótken matchta Anglııa men Slovakııa bir-birleriniń qaqpalarynyń qulpyn asha almady. Biraq reseılikterdiń utylyp qalýlaryna baılanysty slovaktar da kelesi kezeńge ótti.
Nátıjesinde Ýels – 6, Anglııa – 6, Slovakııa – 4, Reseı 1 upaımen týrnır kestesiniń qorytyndysyn túzdi.
Reseılikter bul kezdesýge Karelııanyń Sıamozero kólinde sýǵa batyp ketken balalardyń qazasyn aza tutatyn qara shúberek baılap shyqpaqshy bolyp edi, oǵan chempıonat qojaıyndary ruqsat bere qoıǵan joq. Al oıynnyń basy olar úshin erekshe qaýip uıalatatyndaı eshteńe baıqatpady. Komanda birinshi bolyp shabýylǵa shyqty. Birinshi bolyp qarsy qaqpaǵa dop urdy. Alańda da erkin qımyldap júrgendeı kóringen. Biraq munyń bári aldamshy kórinis eken. Quramanyń qorǵanys shebiniń sheteni tym bos bolyp shyqty. Ol Ýels jasaǵy alǵash qaýyrt shabýylǵa shyqqan kezde-aq setinep sala berdi. 11-mınýtta Djo Allen óz alańy betten ustaı alǵan dobyn ortalyq qorǵaýshylar aımaǵynyń ústimen alǵa qaraı zyrlatty. Ony birden qaǵyp alyp, qaqpaǵa qaraı umtylǵan Aaron Remsı sol zamatta-aq Igor Akınfeevpen betpe-bet keldi. Sol jekpe-jekte salqynqandylyq tanytqan vallıılik forvard dopty qaqpashynyń ústinen asyryp tastaı saldy.
Budan keıin Reseı quramasy esepti teńestirý úshin alǵa umtyldy. Alaıda, onyń oıynynda asa qatty tegeýrin de, qaqpany qaqyratyp ótetin týra soqqy da bolǵan joq. Esesine qarsylastarynyń oqta-tekte quıǵytyp alǵy shepten shyǵa salatyn shapqynshylyqtary qaterdi kóbirek tóndirip turdy. Osylaısha birinshi taımnyń ortasynda jasalǵan kezekti qarsy shabýyl kezinde Ýels komandasy taǵy bir gol salyp ketti. Sol dúrligiste eń aldynan tabylǵan Nıl Teılor aldymen golkıperge týra soqqy jasady, sosyn odan qaıtqan dopty bos qaqpaǵa atyp jiberdi. Al 67-mınýtta Remsı reseılikterdiń aıyp alańyna kirip, ashyq turǵan Garet Beıldi alǵa shyǵardy. Darbaza aldyna jalǵyz kelgen ol Akınfeevti aldap túsirdi. Esep – 3:0.
Álbette, match aldynda reseılikterdiń utylyp qalý yqtımaldylyǵyn eshkim esten shyǵarǵan joq, biraq dál mynadaı eseptiń tirkeletinin sezgender tym az shyǵar. Muny matchtan keıin jýrnalıstermen kezdesken Leonıd Slýskıı de ańǵartty. Ol, sonymen birge, Reseı quramasynyń Eýropa chempıonatyndaǵy sátsiz oıyndary úshin barlyq jaýapkershilikti óz moınyna alýǵa daıyn ekenin atap kórsetti. Endigi jerde ornyna jańa adamnyń kelýi kerek ekenin de onyń ózi bildirdi.
Buǵan qaraǵanda, Anglııa men Slovakııa quramalary arasyndaǵy oıyn birshama jaıbaraqat ótti. Aǵylshyndardyń bapkeri Roı Hodjson munyń aldynda Ýels komandasyna qarsy kezdesýge shyqqan starttyq quramnan 6 oıynshyny almastyrdy. Onyń áriptesi Iаn Kozak bolsa, «jeńimpaz quramyn ózgertpeıdi» degen eski qaǵıdamen burynǵy qalypty ustanypty. Kezdesýdiń birinshi taımynda, sóz joq, Djeımı Vardı men Adam Lallana kóbirek kózge tústi. Áýeli «Lesterdiń» forvardy Natanıel Klaın áýeletip bergen dopty qaqpa baǵany jaqqa dál bere almaı qaldy. Sodan soń qatar turǵan Martın Shkrteldi artqa tastap, qatty soqqan dobyn Matýsh Kozachıktiń qolyna týra berip qoıdy. Osy aralyqta Lallana komandalasynan qala qoımady. «Lıverpýldiń» jartylaı qorǵaýshysy alǵashqy 45 mınýttyqta esep ashý úshin eń qolaıly sátti jiberip aldy. Ol oń qaptaldan dál janyna áýeletip berilgen dopty qaqpaǵa qaraı qatty urǵanda, ony keremet sheberlikpen qulap qaıtarǵan Kozachık qaqpasyn aman saqtap qaldy.
Slovaktar shabýyldaǵy kreatıvti jasaýǵa kelgende, kóp kibirtikteı berdi. Olar tek ekinshi taımda ǵana joıqyn joryqtarǵa shyǵa bastady. Sol shabýyldardyń birinde Krıs Smollıngtiń óz qaqpashysyna sátsiz tastaǵan dobyn Robert Mak ádemi paıdalanyp kete jazdady. Kelesi epızodta qaqpashy Djo Hart slovaktar urǵan dopty serpip tastady. Osynyń sońyn ala Klaınnyń jaqyn jerden qatty soqqan doby jolyna Kozachık tosqaýyl bolyp jata qaldy. Taǵy eki mınýttan soń Shkrtel qaqpaǵa kirip bara jatqan dopty qaıtaryp úlgerdi. Al alańǵa Ýeın Rýnı shyqqannan keıin oıyn tizgini túgel aǵylshyndar qoldaryna kóshti. Olar matchtyń sońyna qaraı birneshe ret jeńis dobyn soǵyp kete jazdady. Biraq maqsattaryna jete almady. Osynyń saldarynan topta ekinshi bolyp qaldy.
Keshe túnde Ýkraına – Polsha, Soltústik Irlandııa – Germanııa, Chehııa – Túrkııa, Horvatııa – Ispanııa arasyndaǵy oıyndarmen eki toptyń komandalary kezdesýlerin aıaqtady. Búgin qalǵan eki toptyń oıyndary óz máresine jetedi.
Serik PIRNAZAR,
«Egemen Qazaqstan»