«Tórtinshi bılik» tórlete me?

Áleýmettik jeńildikterdiń bar­lyǵynan shettetilgen jýrnalıster jurt­shylyqtyń kóz aldynda júrmiz ǵoı dep ózderin-ózderi jubatqanymen, asyp-tasyp bara jatqan jaǵdaıy joq. Aılyǵy shaılyǵyna jetpeıdi. Páter aqysyn tóleýi kerek. Jylýǵa, sýǵa, jaryqqa tóleıtini taǵy bar, dińkelep-aq qalady. Búginde eki-úsh jınalysqa baryp kelgen tilshińiz kádimgideı qınalady. Qoǵamdyq kólikterdiń jolaqysy qym­battaǵaly jýrnalıster qaltalaryn qaǵyp, tıyn sanap qaldy. Tipti, qyzmet ornyna velosıped minip keletinder de bar. Sóz joq, «densaýlyqqa paıdaly» dep qanshalyqty maqtaǵanymyzben, qasıetti qalam ustaǵandarǵa qıyn-aq. О́ıtkeni, barǵan jerinde veloturaq joq. Jınalystan shyqqanda sol mańnyń tentekteri velo­sıpedińdi úptep úlgeredi. Jaıaý jýrnalıst jylarman halge túsedi. Gazette qyzmet isteıtinderdiń jyl sa­ıyn qaıta oralyp keletin eki naý­­qany bar. Ol – baspasózge jazylý. Qymbatshylyq kelgeli oqyrman baspasózge eki ret, jyldyń birinshi jáne ekinshi jartyjyldyǵyna jazylady. Demek, oqyrmandar aldyna eki ret ba­ramyz. Barýyn baramyz-aý, betimiz alaýlap qaıtady. «Gazetterińizde nege syn joq? Nege problemalyq máseleler kótermeısizder?» dep san saýaldyń astyna alady. Ne dep jaýap beremiz? Quryltaıshylardyń qulaqtaryna altyn syrǵa, osyndaı sansyz saýaldan qutylatyn kún qashan týady? Syrt qaraǵanda, jýrnalısterdi ja­rylqap jatqandaı kórinedi. Jýr­nalısterdiń kásibı merekesi qarsańynda azyn-aýlaq syı-sııapat kórsetip, qo­­lymyzǵa qaǵaz (Alǵys hat nemese maqtaý qaǵazy) ustatyp, mar­qaıtyp qoıady. Sodan keıin jýrnalıster umytylady. Olar tek jınalystardy ás­pettep jazý úshin ǵana izdelinedi. Elimizde temirjolshylarǵa, áskerı jáne quqyq qorǵaý organdarynyń qyz­metkerlerine, dárigerlerge, muǵalimderge birqatar jeńildikter qarastyrylǵan. «Tór­tinshi bılik» ıeleri mundaıda taǵy shettep qalady. Biz oqý jylynda ozat muǵalimder­ge páter berilgenin talaı ret kórdik. Olar bolashaq Otan qurylysshylaryn tárbıelep jatyr. Mundaı qurmetke ábden laıyq. Sonda qoǵamnyń qozǵaýshy kúshi sanalatyn jýrnalıster nege memleket tarapynan qoldaýǵa ıe bolmaıdy? Osyny bılik basyndaǵylar oılansa. Shetelderde jýrnalıstermen sana­satyndar kóp ári olar qomaqty eń­bekaqy alady. Olardyń talaı tájirı­besin elimizge engizip jatyrmyz. Osy oraıda jýrnalıs­terge jaǵdaı jasaý, mártebesin kóterý, materıaldyq jaǵynan kótermeleý sııaqty ıgilikti ister nege qalyp qoıady? Zaıyrly mem­leketpiz deımiz. Demokratııaly elmiz deımiz. Sol demokratııany damytatyn baspasózge nege kómek kórsetilmeıdi? Búginde áleýmettik jelilerdegi bas­syzdyqtar júıkege tıip bitti. Inter­netti qosyp qalsańyz, árkim oıyna kelgenin jazyp jatyr. Bul qoǵamǵa jaqsylyq ápermeıdi. Sondyqtan, qoǵam bul júıeden áli-aq jerinip, bas tartady. Jańalyqqumar jurtshylyq gazetke qaıta oralady. Sonda olar gazetterden ózderine kerektisin taýyp alýy tıis. Endeshe, gazet-jýrnaldardan qol úzýge áli erte. «Tórtinshi bıliktiń» tórge shyǵaryna degen senimdi sóndirgimiz kelmeıdi.  Sabyrbek OLJABAI, jýrnalıst  ShYMKENT