Respýblıka óńirlerinde biliktiligi men kásibı deńgeıi joǵary jýrnalısterdiń az ekeni sońǵy kezde jıi aıtylyp júr. Munyń sebebi nede? Osy saýal tóńireginde oblystaǵy birqatar BAQ basshylarymen oı-pikir almasqan edik.
Aımaqtaǵy eki oblystyq jáne on tórt aýdandyq gazetti biriktirip otyrǵan iri medıaholdıng – «Jaıyq Press» JShS-tiń bas dırektory Jantas Safýllınniń aıtýy boıynsha, joǵary oqý oryndarynda bolashaq jýrnalısterdiń sapalyq deńgeıine basa mán berilýi kerek. Ony irikteý eń aldymen ál-Farabı jáne L.N.Gýmılev atyndaǵy joǵary oqý oryndarynyń jýrnalıstıka fakýltetterindegi shyǵarmashylyq konkýrsqa qoıylatyn talaptardy kóterýden bastaý alǵany jón.
Aımaqtyq ýnıversıtetterde ashylǵan jýrnalıstıka bólimderi ózin-ózi aqtaı almady. Munyń syryn tıisti materıaldyq-tehnıkalyq bazanyń jetkiliksizdiginen jáne sabaq beretin oqytýshy-professorlardyń tapshylyǵynan izdegen oryndy. Mysaly, M.О́temisov atyndaǵy Batys Qazaqstan memlekettik ýnıversıtetiniń birinshi prorektory Áset Tasmaǵambetovtiń aıtýynsha, 2005-2008 jyldary fılologııa fakýlteti janynan jýrnalıstıka mamandyǵy boıynsha joǵary bilim berilgen. Keıin jabylyp qalǵan. Buǵan qajetti grant bólinbegeni, úmitkerlerdiń az bolǵany sebepshi bolǵan.
Jýrnalıstıka salasynda elektrondyq aqparat quraldarynyń alatyn úlesi jyldan-jylǵa ósip keledi. Oral óńirindegi bul istiń jaı-kúıi qandaı? Bul saýaldy «Qazaqstan» respýblıkalyq teleradıokorporasııasy» AQ Batys Qazaqstan oblystyq fılıalynyń dırektory Asylanbek Ǵubashevke qoıǵan edik. Onyń jaýabynan kóńilge túıgenimiz, Almaty men Astanada BAQ mamandyǵy boıynsha oqyp júrgen stýdentter fılıalda óndiristik tájirıbeden ótedi eken. О́ıtkeni, óńirler olardyń kásibı daǵdylardy meńgerýi jáne qajetti tehnologııalarmen jumys isteýge úırenýi úshin yńǵaıly ári qoljetimdi. Áıtse de ár jyl saıyn tájirıbeden ótetin 7-8 stýdenttiń óńirge oralýy neken-saıaq. Negizinen olar turmystyq jáne shyǵarmashylyq múmkindikterdiń tómendigin jáne jalaqynyń azdyǵyn alǵa tartatyn kórinedi.
Temir QUSAIYN,
«Egemen Qazaqstan»
Batys Qazaqstan oblysy