Alasapyran kúnderde atqa qonyp, taǵdyrsheshti kezeńde tabandylyq tanytyp, erliktiń eren úlgisin kórsetken kóriktiler qazaq tarıhynda az emes. Qos bilegin sybanyp, soǵysqa da suranyp, maıdan dalasynda qarý ustaǵan arýlar da bolǵan. Onyń bári Otanǵa degen mazdaǵan mahabbattan paıda bolsa kerek-ti. Bul oraıda árkim óz sezimin ártúrli jolmen jetkizetini belgili ǵoı. Bireýler qanymen, bireýler janymen, endi bireýler ánimen bildirip jatady. Sahnany saıalap, sazdyń súıemeldeýimen sanasyndaǵy sarqylmas sezimin, Atamekenge degen orny bólek lebizin án arqyly jetkizip júrgen jandardyń qatarynda Qarlyǵashtyń da ózindik órnegi bar. Jastardy otansúıgishtikke tárbıeleý jolynda eńbek etip júrgen ol Qazaq Ulttyq mýzyka akademııasynda bilim alyp, Erbol Sarınniń synybyna túsedi. Keıin osy oqý ornynyń magıstratýrasynda oqyǵanda jeztańdaı ánshi Qaırat Baıbosynovtan tálim alady. Sodan bolý kerek, Qarlyǵash qaı kezde de óner báıgesinde aldyńǵy shepten kórinip keledi. Az ǵana merzimniń ishinde Maǵjan Jumabaev, Kenen Ázirbaev, Nurǵısa Tilendıev atyndaǵy baıqaýlar men «Shabyt» festıvaliniń jeńimpazy atanyp úlgerdi. 2011 jyly Qyzyljar qalasynda Maǵjan Jumabaevqa arnalǵan «Qazaq eli, bir aýyz sózim saǵan!» atty festıvalde aqynnyń óleńderine jazylǵan jańa ánder atalymy boıynsha belgili sazger Jolaman Tursynbaevtyń «Saryarqa – saıran jerim-aı!» ánin oryndap, bas júldege ıe bolǵan edi. Odan keıin Aqtóbe qalasynda bolǵan kezekti óner saıysynda da qatarlastarynan baǵy basym túsip, onyń da bas júldesin qanjyǵasyna baılaıdy.
Sol jarystan keıin Italııadaǵy halyqaralyq baıqaýǵa joldama alady. Osy 2013 jyly Rımde ótken «Djovannı Kantano ıl Mondo» baıqaýynda Qarlyǵash Abbasova ekinshi oryndy enshilep qaıtqanyn súıinshilep jazǵan aqparat betterinen baıqaǵan bolatynbyz. Italııaǵa Shveısarııadan, Reseıden, Norvegııadan, Fransııadan, Ýkraınadan, Belorýssııadan jáne t.b. memleketterden 356 qatysýshy jınalǵan. Bul baıqaýdyń birden-bir ereksheligi munda tek ulttyq óner túrleri ǵana usynyldy, deıdi Qarlyǵash. Qazylar alqasynyń músheleri birinshiden vokal sapasyn, oryndaý tehnıkasyn jáne artıstızmdi baǵalaǵan. Bizdiń jerlesimiz «Dombyramen án aıtý» atalymynda óner kórsetip, halyq áni «Bulbulym» men Estaı Berkimbaevtyń «Sandýǵash» ánin shyrqap, sheteldiń sahnasynan qazaqtyń abyroıyn asqaqtatyp qaıtqan edi.
Qazirgi ýaqytta Qazaqstan Respýblıkasy Qarýly Kúshteriniń ulttyq áskerı patrıottyq ortalyǵynda qyzmet etip júrgen Qarlyǵash «Ana týraly ballada» deıtin beınebaıanymen de belgili. Surapyl soǵystyń sulbasyn sýretteıtin, syndarly sátterden syr shertetin klıptiń áseri áste bólek. Baýyr eti balasyn maıdan dalasyna attandyrǵan ananyń qars aıyrylǵan júregi, qapalanǵan reńi, úmit pen kúdikke toly kútýmen ótken kúnderi bári-bári osy beınebaıannyń beınesin ashyp turǵandaı.
«Adam bireýge ustaz bolyp ony tárbıeleý úshin, ol eń birinshi óz-ózin tárbıeleý kerek. Qanshama jyl jınaǵan bilim men tájirıbeni ushtastyra bilgen ustazdyń shákirtteri de osal bolmaıdy dep oılaımyn. Sol sebepti men eń birinshi ózimniń ónerim arqyly dúıim jurtty moıyndatyp, moıynyn burǵyza alsam, sonda ǵana muǵalimdik muratty júzege asyra alam der edim. О́zim tálimin alyp, tárbıesin kórgen ustazdarymmen qalaı maqtansam, erteń men daıyndaıtyn shákirtterim de menimen solaı maqtana alatyn dárejege jetýdi kózdeımin», deıdi Qarlyǵash.
Qarlyǵashtyń ózi aıtpaqshy, «sahna salǵyrttyqty kótermeıdi» degendeı oǵan taımas tabandylyq pen shyǵarmashylyq shydamdylyqtyń qajet ekeni daýsyz. Sonda ǵana mashaqat marapatqa aınalǵanyn kóresiz.
Raýan QAIDAR,
«Egemen Qazaqstan»