DÚBIR

Armysyń, Olımpıada! Barmysyń, Brazılııa! Búgin tańnyń talma tusynda Brazılııa tórindegi Rıo-de-Janeıro qalasynda XXXI jazǵy Olımpııalyq oıyndar saltanatty jaǵdaıda ashyldy. Onyń sherýinde tórtkúl dúnıeniń tórt buryshynan kelgen 207 eldiń sport delegasııasynyń músheleri ataqty «Marakana» arenasynyń aýmaǵymen tizbektelip júrip ótti. Bálkim, Jer betinde tórt jylda bir aınalyp keletin qýanyshtyń qusy sııaqty bolyp kórinetin Olım­pııalyq oıyndar jóninde búginde tıtteı de bir habary joq, onyń alystan estiletin dúbiri men daqpyrtyna eleń etpeıtin birde-bir sanaly adamzat balasy joq shyǵar. Al mundaı Oıyndarǵa ázir­lik aıtýly alamannyń sóreden shyǵar shaǵynan áldeqaıda buryn, ony ótkizýge alǵash tilek pen tapsyrys bildirilgen kezderden qolǵa alynady. Bul sátke kúlli álemniń sportshylary men mamandary kún ilgeri bet bura bastaıdy. Aqyrynda aldaǵy Olımpıa­dany ótkizetin eldiń esimi de málim bolady. Rıo mundaı saltanatty sátti 2009 jylǵy 2 qazan kúni Kopen­gagende ótken HOK-tyń 121-ses­sııasynda bastan keshti. Sodan bastap Brazılııada básireli báse­kege qamdaný jolǵa túsip júre berdi. Onyń sońǵy burylysty bel­deýi bıylǵy jyldyń 21 sáýi­ri kúni ejelgi Ellada jeriniń Pe­l­o­ponnes túbegindegi Olımp taýy eteginen jaı tapqan qasıetti me­ken – Gera hramynyń ashyq alańyn­da kúnniń sáýlesi qýatymen bilteli tyǵyrshyqty lap etkizýden sóre tartty. Bul rásimdi kóne grek áıelderi úlgisindegi hıton kóılegin kıgen boıjetken – abyz beınesindegi Afına aktrısasy Katerına Lehoý jasady. Budan ári onyń aldyna tizerlep otyra qalǵan grek gımnasty Elefterıosý Petrýnıasý olımpııalyq alaýdy uzaqqa sozylatyn súrgindi saparǵa salý úshin ilip alyp áketti. Sodan arna tartqan jol Grekııa men Shveısarııa aýmaǵy arqyly 3 mamyrda Brazılııa jerine jetip, 95 kún boıy eldiń barlyq aımaǵyn sharlap shyqty. Osy aralyqta ol 20 myń shaqyrym jerdi júrip, 16 myńnan astam shaqyrym aýmaqtan ushyp ótip, jolaı 329 eldi mekendi aralaı kelip, tamyzdyń 4-i kúni Rıo-de-Janeıroǵa da taban tiredi. Sol jolda ony 12 myń alaýger ulan joldardyń tabanymen jele-jorta júrip alyp shyqty. Al alaýdy Brazılııanyń jelken sporty quramasynyń jeti jigiti qaıyqpen jaǵalaýǵa ákeldi. Olardy Rıonyń meri Edýard Paes áıeli Krıstınamen, balalary Bernardpen jáne Izabelamen birge qarsy aldy. Qala basshysy sodan keıin shyraǵdandy alyp, port aımaǵyn birneshe mınýt júgirip ótip, ony sport ýchılıshesiniń 15 jasar stýdenti Rebeka Moraes dýsh Santosqa tabys etti. Osy kúni alaýdy qala ishimen alyp júrý sharasyna kezek berildi. Munyń báriniń sońynda, tamyzdyń 5-inen 6-syna qaraǵan túni jahan jurtshylyǵy kópten asyǵa kútken saltanatty shaq ta kelip jetti. Ol Astana ýaqytymen týra 04.00 saǵatta bastaldy. Osynaý shadyman shattyqty sharany shy­ǵa­rýǵa uıymdastyrýshylar tabany kúrekteı bes jylyn arnapty. Birden aıtyp qoıaıyq, «Marakana» shoýy munyń aldyndaǵy Sıdneıde, Afınada, Beıjiń men Londonda kere qanat jaıǵan merekelik sharalarmen esh shendese almaıdy. Ony alań ıeleri buǵan deıin ózderi moıyndap qoıǵan da bolatyn. Brazılııalyqtar mundaı jutań jaǵdaıdy eldegi kúrdeli qarjy tapshylyǵyna aparyp tiredi. Sol sebepti Oıyndardy uıym­dastyrý komıteti munyń aldyn­daǵy elderdiń keń aýqymdaǵy shashylyp-tógilgen saltanatynyń ornyn qazirgi zamannyń kórinisteri men stılin kóbirek kórsetý arqyly jabýǵa sheshim qabyldady. Rasynda da sporttyq merekeniń máni onyń ashylý rásimindegi alqynǵan asta-tók alasapyranmen ólshenbese kerek. Osyndaı tujyrymǵa kelgen rıolyqtar Oıyndardyń ashylý rásimine bıýdjetten 20 mıllıon dollar ǵana shyǵarǵan eken. Al munyń aldyndaǵy Londonda 2012 jyly osy sharaǵa 42 mıllıon dollar kóleminde qarjy jara­tylǵanyn eske alsaq, aıyrma­shylyqtyń qansha aqshany quraıtynyn baıqaý qıyn emes. Rıodaǵy Olımpııalyq oıyn­dar­dyń ashylý saltanatynyń atqa­rýshy prodıýseri Marko Balıch Bra­zılııadaǵy ekonomıkalyq ahýal­­dyń nasharlyǵy sebepti ar­tyq shyǵyndardyń bárinen bas tart­qandaryn málimdedi. Sóıtip, Afınadaǵy arnaıy sáýleler shashatyn jarqyldar da, Beıjińdegi ásemdiktiń álemi men Londondaǵy adamzattyń júrip ótken joldaryn satylap kórsetetin keń aýqymdy hronıka da munda qaıtalanǵan joq. «Biz bárin qarapaıym etip jasadyq, – dedi osy oraıda Balıch. – Sonymen birge, Londondaǵy baǵanyń Rıoǵa qaraǵanda áldeqaıda qymbat eke­nin de umytpańyzdar. Áńgime tek avtomat-oıyndardyń, kokaın men jezókshelerdiń naryq­tary týraly bolyp turǵan joq. Jalpy, Ulybrıtanııada ómir súrýdiń ózi edáýir qymbatqa túsedi. Biz son­dyq­tan Brazılııada ómir súrýdiń qanshalyqty rahat ekenin kórsetemiz dep tyrashtanyp jatpadyq». Aıtsa aıtqanyndaı, saltanat shynynda óte-móte qarapaıym qalypta órbidi. Qoıylymnyń rejısserleri Fernandý Mereıes, Andrýsha Vaddıngton, Danıela Tomas, horeo­grafy Debora Kolker 3 saǵatqa sozylǵan sharanyń barysynda 2000 jaryq berýshi tapanshalardy, 3 tonna pırotehnıkany, 109 projektordy, 5 myńǵa jýyq bıshi-eriktilerdi, 300 kásibı bıshiler men stılısterdi paıdalandy. Búginde «Marıo Fılıý» degen jańa at alǵan áıgili «Marakana» stadıonyn aýmaǵynan oryn alǵan 78 myń baqytty adam aldymen sherýletip júrip ótken álem sportshylarynyń 12 myń adamdyq delegasııalar quramyn qarsy aldy. Sodan keıin Marko Balıch aıtqan sharqy shamaly shoýǵa kezek keldi. Ol eldiń osy kezge deıingi tarıhyn, onyń barysynda qol jetkizgen jetistikterin, ǵylym men mádenıetke qosqan úlesin tar­qatyp baıandap berýge arnaldy. Munda Brazılııanyń shejiresindegi eń kórnekti kezeńder ǵana emes, sonymen birge ondaǵy áleýmettik mánerdegi máselelerge de mán berildi. Sonyń qabatynda qonaqtar men kórermender elde jıi bolyp jatatyn jol-kólik oqıǵalaryna kóz qadady. Budan ári belgili model Jızel Býndhen kóshede áldeqandaı bir qaraqshylardyń «tonaýyna» urynyp qalady. Sosyn polıseıler kóp uzamaı «qaraqshylardy» tap bastyrmaı ustaı qoıady. Kelesi kezekte ánshiler Kaetaný Velozý men Anıtta, burynǵy mádenıet mınıstri Jılbertý Jıl tizgindi ustady. Al osy kórinisterdiń bárin kestelep bergen Balıchtiń esimin biz 2014 jyly óz kózimizben kórgen Sochı qysqy Olımpııalyq oıyndarynyń jabylý rásimi kezinde estip edik. Ol sol joly Oıyndardyń jabylý saltanatynyń kórkemdik jetekshisi bolǵan. Odan buryn, 2007 jyly Týrındegi qysqy Olımpıadany «ashyp-japqan» eken. Al 2008 jyly Beıjińde «hattama jónindegi menedjer» rólin atqarǵan. Mine, sodan keıingi taban tiregen jeri osy Rıo kórinedi. Biz Brazılııa degende ádette eń aldymen bul eldiń fýtbolyn, onyń Pele men Garrıncha bastaǵan álemdik deńgeıdegi eń jaryq jul­dyzdaryn eske alamyz. Men óz basym bul eldiń aıaqdop úrdisimen, onyń ozyq sheberlerimen alǵash ret ótken ǵasyrdyń 70-jyldarynyń basynda jaryq kórgen belgili halyqaralyq jýrnalıst Igor Fesýnenkonyń kitaptary arqyly tanysyp edim. Biraq san túrli boıaýly Brazılııa tek fýtboldyń ǵana týy tigilgen meken emes. Bul el, sonymen qatar, Atlantıka ja­ǵalaýyndaǵy Kopakabana sekildi ǵajaıyp jaǵajaılarymen de maq­tana alady. Brazılııa jeri – kóptegen gektar alaptardy alyp jatatyn kofe plantasııalarynyń, Amazonkadaǵy ný jynysty djýnglı ormandarynyń alqaby. Brazılııa – úndis tekti kóptegen aborıgen taıpalardyń qutty qonysy. Bárinen buryn ol – karnavaldyń otany. Munsyz bul eldi kózge elestetýdiń ózi qıyn. Al munyń arǵy jaǵynan lambada men samba bıleri burańdap shyǵa keledi. Brazılııalyqtardyń tipti jaýyngerlik urys óneri – kapoeıranyń ózi bı elementterinen quralady. Mine, osylardyń bári merekelik máýritter mezetinde men-mundalap kórinip jatty. Brazılııa degende, biz onyń álemge Jorjı Amadý jáne Paýlo Koelo tárizdi talantty jazýshylardy syılaǵanyn da aıtpaı tura almaımyz. Bizdiń urpaq arasynda bulardyń aldyńǵysynyń «Qumdy aýmaqtyń generaldary» atty romany boıynsha túsirilgen fılmdi kórmegenderi kemde-kem shyǵar. Bizdiń taǵy bir biletinimiz, eldiń sol kezdegideı jarly-jaqy­baılary qazir de azaıyp kete qoı­ǵan joq. Shamasy, Brazılııa bıligi Olımpıada syndy shyp-shyrǵasy shyǵynnan bastalatyn shyrmaýyqtaı shyrmatylǵan sharany ótkizýge yntalylyq tanytqanda, onyń shymyldyǵyn aıtarlyqtaı aýqymdy tabystarmen jaýyp, turǵyndardyń násip-nápaqalaryn bir kóterip tastaýǵa úmittengen bolar. Biraq munyń ózi de barǵa ǵana baryp quıatyn baıdyń maly sııaqty dúnıe ǵoı. Buǵan 2004 jyly Olımpıada ótkizgennen keıin tabandap otyryp qalyp, sodan kúni búginge deıin esin jııa almaı kele jatqan Grekııanyń mysaly anyq aıǵaq. Degenmen, qalaı bolǵanda da, bir mezgilde álemniń úsh jarym mıllıard turǵyny tamashalap úlgergen Rıonyń toıy bastalyp ketti. Endi onyń alań ıeleri úshin de, meımandar úshin de tabysty bolǵanyn tilegennen ózge nıet joq. Osy kúnderi Oıyndar týrnır­leri Rıonyń ózindegi Marakana, Barra, Kopakabana, Deodoro dep atalatyn tórt klasterden bólek, Belý-Orızontı, Brazılıa, Salvadore jáne San-Paýlý qalalarynda ótip jatyr. Bulardyń sońǵylary 3 tamyzdan beri fýtbol shaıqastarynyń alańdaryna aınalyp ketken. S­o­nymen, alaman báıge arnaly jolyna tústi. Alda el namysy men er tabysy jolyndaǵy keskekti kúreske toly kúnder tur. Serik PIRNAZAR, «Egemen Qazaqstan» Boksshylardyń qarsylastary anyqtaldy Rıo-de-Janeıroda burnaǵy kúni boksshylardyń jerebe tartý rásimi bolyp ótti. Osyǵan oraı bizdiń bylǵary qolǵap sheberleriniń de alǵashqy naqty nemese yqtımal qarsylastary anyqtaldy. Erler quramasynan bastasaq, 49 kg. salmaqtaǵy Birjan Jaqypov urysqa 1/8 fınalda kirip, ázerbaıjan Rýfat Gýseınov pen namıbııalyq Matıas Hamýnıelanyń qaı jeńgenimen kezdesetin boldy. Eger odan ótse, shırek fınalda ózbek Hasanboı Dýsmatovpen qolǵap túıistiredi. 52 kıloǵa deıingi salmaqtaǵy Oljas Sáttibaev 1/16 fınalda Pýerto-Rıko ókili Djeıvıer Kıntronmen ushyrasady. Ony utsa, ázerbaıjan Elvın Mamıshzadege tap keledi. 56 kg. salmaqtaǵy Qaırat Erálıevtiń 1/16 fınaldaǵy básekelesi de ázerbaıjan sportshysy. Ol – Djavıd Chelebıev, 2013 jyly Almatyda ótken álem chempıonatynda altyn medal jeńip alǵan. Bular sol jarystyń jartylaı fınalynda kezdesip, ázerbaıjan jigiti 2:1 etip utyp ketken. Qaırat sol jolǵy esesin qaıtaryp jatsa, 1/8 fınalda ózbek Mýradjon Ahmada­lıevpen kúsh synasady. Al 60 kılo sal­maqtaǵy Berik Ábdirahmanov 1/16 fınalda AQSh úmiti Karlos Balderaspen aıqasady. Bizdiń 64 kg. salmaqta óner kórsetetin eń jas boksshymyz Abylaıhan Júsipovtiń 1/16 fınaldaǵy qarsylasy da ońaı shaǵylatyn jańǵaq emes. Eger aǵylshyn Pıt Mak-Kormaktan asyp jatsa, kýbalyq Iаsnıer Toledomen shaıqasady. 69 kg. salmaqtaǵy Danııar Eleýsinov jekpe-jekti 1/8 fınaldan bastaıdy. Ol ulybrıtanııalyq Djoıs Kellı men kenııalyq Reıton Okvı­rıdiń birimen judyryqtasady. 75 kg. salmaqtaǵy Jánibek Álimhanuly 1/16 fınalda ulybrıtanııalyq Entonı Foýler­men baq synasady. Odan ótse, Aljır ne Kamerýn ókilderiniń birimen kezdesedi. 81 kg. salmaqtaǵy Ádilbek Nııazymbetov te tartysqa 1/8 fınaldan kirisedi. Ol ýkraın Denıs Solonenko men ázerbaıjan Teımýr Mamedovtiń birine kezigedi. 91 kg. salmaqtaǵy Vasılıı Levıttiń belesi de 1/8 fınaldan bastalady. Ol qytaılyq Iý Fengkaımen ustasady. Odan ary kýbalyq Erıslandı Savonmen ushyrasyp qalýy múmkin. Al 91 kılodan aýyr salmaqtaǵy Ivan Dychko 1/8 fınalda ázerbaıjan Magomedrasýl Medjıdov pen marokkolyq Mohamed Arjaoýıdiń utqanymen bettesedi. Aıtyp qoıaıyq, bizdiń boksshy bulardyń aldyńǵysymen 2011 jyly Bakýde, 2013 jyly Almatyda ótken álem chempıonattary kezinde kezdesip, ekeýinde de utylǵan. Bakýde jartylaı fınalda upaı sanymen ese jiberse, Almatyda fınalda nokaýtqa túsip qalǵan. Áıelder básekesinde 51 kg. salmaqtaǵy Jaına Shekerbekova 1/4 fınalda fransýz Sara Oýrahmoýn men marokkolyq Zohra Ez-Zahraoýıdiń birimen medal úshin shaıqasady. Al 75 kg. salmaqtaǵy Darı­ǵa Shákimova 1/8 fınalda kanadalyq Arıan Fortınmen kezdesedi. Budan ótse, marokkolyq, odan da assa, jartylaı fınalda amerıkalyq ataqty Klarıssa Shıldspen jekpe-jek shyǵady. Rýslan IGILIK Ala dop alamany qyzyp tur Olımpııalyq oıyndar básekesin birinshi bolyp fýtbolshylar bastady Alańǵa aldymen 3 tamyz kúni áıel­der shyqty. Rıo-de-Janeıroda Shvesııa quramasy Ońtústik Afrıka Respýblıkasynyń komandasyn 1:0 etip súrindirse, Kanada qyzdary avstralııalyq áriptesterin 2:0 esebimen tize búktirdi. Al kelesi kúni osy jerde Brazılııa Qytaıdy 3:0 etip talqandap shyqty. Munyń sońynan Ger­manııa Zımbabveni 6:1 esebimen kúırete jeńdi. Bulardan keıin AQSh qyzdary Jańa Zelandııa komandasynan 2:0 esebimen basym tústi. Erler quramalary saıysqa 4 tamyzda kiristi. Ony Manaýs qalasynda Nıgerııa men Japonııa ashyp, jankúıerlerdi qaptaǵan goldarmen qaryq etti. Matchta 9 dop soǵylyp, «qara qurlyq» ókilderi 5:4 esebimen jeńisti tartyp áketti. Budan keıingi nátıjeli oıyn Ońtústik Koreıa men Fıdjı arasynda ótti. Onda koreıler aral komandasy darbazasyna jaýapsyz 8 gol sqty. Al buǵan deıin Brazılııa – Ońtústik Afrıka arasyndaǵy oıyn esep ashylmastan tarqady. Alań ıeleri sapynda Neımardyń oınaýy da olar úshin jaǵdaıdy durystap bere almady. Sol sııaqty Shvesııa men Kolýmbııa matchynda da jeńimpaz anyqtalmady. Ol 2:2 esebimen aıaqtaldy. Osynyń bári týrnırdiń tartysty ótetinin kórsetip berip tur. Damır QOJAMQUL Jerińniń jaqsy aty janyńdy jadyratady «Egemen Qazaqstannyń» arnaýly tilshisi Baqtııar TAIJAN Rıo-de-Janeırodan habarlaıdy «Astana – ertegideı ádemi qala» Brazılııaǵa tórtkúl dúnıeden jýrnalıs­ter kelgen. Jumys qaınap jatyr. Qaı-qaısy da jaqsy habar alý, jaqsy materıal daıyndaý úshin sportshylardyń janynan tabylýǵa tyrysady. Bárimizdiń basymyzdaǵy kep osy. – Siz qazaqstandyqsyz ba? Qasymdaǵy otyrǵan kórshimniń daýysy. Túr-túsi taza eýropalyq ekendigin álginde baıqaǵanmyn. Bul aǵaıyndar ádette aǵylshyn tilinen basqany bilmeıtin sekildi edi. Ol mendegi kúdikti seıilteıin dedi me, jumsaq jymıdy. – Men Astanada kóp bolǵanmyn. Meniń áıelim Nazarbaev Ýnıver­sıtette sabaq beredi. Ári qaraı áńgimemiz jarasyp ketti. Tegi – shved, AQSh-qa keıinirek qonys aýdarǵan bul jigit qatardaǵy qarapaıym jýrnalısterdiń biri emes eken. Brazılııany qosqanda, qatarynan 8 Olımpııalyq oıyndarǵa baryp, reportaj júrgizgen myqtynyń ózi. Astanada dzıýdodan jáne bokstan áıelder arasynda ótken álem chempıonatynda bolyp, sol jerden habar daıyndaǵan. Ol Brazılııanyń Olımpııalyq oıyndarǵa daıyndyǵynyń jetkiliksiz ekendigin qynjyla aıtty. Basqasyn bylaı qoıǵanda, jýrnalıster minetin avtobýstardyń qyzmeti syn kótermeıdi, deıdi. Áıeli Vıktorııa Torstenson Nazarbaev Ýnıversıtette orys ádebıeti páninen sabaq beredi eken. Professor. Qazir demalysta bolǵanymen, kelisimshart boıynsha áli jumys jasaıdy. Sondyqtan, Martın Astanaǵa áli talaı keledi. – Astana maǵan óte unaıdy, – deıdi ol. – Álemdegi barlyq ádemi qalalardyń sáýlet óneriniń belgileri bar. Syrt jaqtary nasharlaý bolsa da, ortalyǵy ertegideı qala. Prezıdentterińiz Nursultan Nazarbaevty óte úlken saıası tulǵa dep tanımyz. Halqynyń sany az bolǵanymen, Ortalyq Azııada Qazaqstannyń bedeli úlken, álemdik saıası oqıǵalarda oryndaryńyz bilinedi. Qýanyp qaldyq. Amerıkalyqtar eshkimniń aldynda jaǵym­pazdanbaıdy. Oıyn ashyq aıtady. Ol: «Qazaqstanda kezdesýge jazsyn», dep meken-jaıymyzdy jazyp aldy. Biz de amerıkalyq jýrnalıs­pen estelikke sýretke túsip, eki jaqtyń sportshylaryna tabys tiledik. «Qazaqstan – biz úshin qymbat meken» Rıo-de-Janeıroda taǵdyr talaıymen ózge memleketterden kelip, osynda turyp jatqandar kóp. Sonyń biri – Irına Kýznesova. Ol Ýkraınanyń soǵys órti basylmaı turǵan Dnepropetrovsk aımaǵynan kelipti. Bizdiń kıgen formamyzdy kórip qaıyrylǵan ózi. – Qazaqtar, qalaısyzdar? Áńgime ári qaraı jaqsy úılesim taýyp ketti. Onyń Qazaqstandy jaqsy biletindigi – kúıeýi uzaq jyldar «Baıqońyr» ǵarysh aılaǵynda jumys jasaǵan eken. Ortaq áńgimede Qazaqstandy kóp maqtaıdy eken. Qazaq halqyn da. Irına Dnepropetrovskide soǵys órti tutanǵanǵa deıin jaqsy turǵandaryn aıtady. Úı-jaılary bar, bireýden ilgeri, bireýden keıin ómir súrse de ómirge ókpesi bolmaǵan. Ortaq bıznes at basyndaı tabys ákelmese de otbasyna alańsyz ómir súrýge tolyǵymen jetip turǵan. – Sonshama dúnıeń bola turyp, jertólede ómir súrgennen qorlyq joq eken, – deıdi ol. – Kóshede kele jatsań, bomba jarylady. Keıde aınalańnan shashyrap atylǵan oq izderin baıqaısyń. Kúıeýim týǵan qalamdy qorǵaımyn dep qopańdap edi, «qaıda, shoshańdama», dedim. Bul aǵaıyndardyń áıelderi kúıeýlerine mátibı ǵoı. Irına kúıeýin aldyna salǵannan salyp otyryp, Brazılııadan bir-aq shyǵarǵan. Kompıýterde oqytýdan jaqsy bıznesi bolǵan. Brazılııa aty dardaı bolǵanymen, ómirdiń jańa ıgilikterine onshalyqty yńǵaıly emes. Osy jaǵyn esepke alǵan. Alaıda, kedeılik qamytyn moınyna myqtap kıgizip alǵan memlekette jańa zaman talaptaryn moıyndaıtyndar da kóp emes sııaqty. Onyń qasynda Astanadaǵy bıznesteri aıtarlyqtaı paıda ákelip tur. Irına Brazılııadaǵy ózimiz baıqaǵan kóńilsiz jaǵdaıattardy ári qaraı baıandady. Kedeı memlekette baılardyń quqy aldymen qorǵalady eken. Jarlynyń sózi esepke kóp alyna bermeıdi. Sondyqtan ba, adamdardyń ózi jeńildiń astymen, aýyrdyń ústimen ómir súrýge mashyqtanyp alǵan. Mundaǵy tártip boıynsha jumys berýshi óz qyzmetkeri talaptan shyǵa almaǵan jaǵdaıda eki aı jalaqysyn berýge mindetteledi. – Osy jaǵdaı jumys izdegenderdiń mıyna qatty sińip qalǵan­dyǵy sonshalyq, saǵan jumys izdep kelip turyp, basqa mekemege jumys surap aryz jazyp jatady, – deıdi ol. Irına Brazılııadaǵy ómirdiń kóleńkeli tustary týraly uzaǵynan aıtyp berdi. Áńgime aýany taǵy da Qazaqstanǵa aýǵan. – Maǵan Qazaqstan óte qatty unaıdy, – deıdi Irına. – Astanada bıznesim bar. Jıi bolmasa da jolymyz túsip turady. Brazılııada turaqty turmaıtynymyzdy bilemiz. Elde qartaıǵan ata-analarymyz qaldy. Olar munda kelýden bas tartty, onyń ústine osyǵan deıin jınaǵan dúnıe-múlikterimiz de bar, soǵan qorǵan bolyp otyr. Al Qazaqstanda jaqsy ómir súrýge jaqsy jaǵdaı týǵyzylǵan, jerlerińiz keń baıtaq qansha halyq bolsańyzdar da asyraı alady. Biz túrimiz bólek bolsaq ta, týysqanǵa aınalyp ketken halyqtarmyz. Sondyqtan da Qazaqstanǵa tek jaqsylyq tileımiz.