О́tken jyldan beri Qazaqstan quramasy sapynda óner kórsetip kele jatqan, qazir Ońtústik Qazaqstan oblysy atynan synǵa túsip júrgen mońǵol dzıýdoshy qyzy Otgonseseg Galbadrah aqjoltaı sportshy bolyp kezikti. Onyń Olımpıadada respýblıka atynan birinshi bolyp alǵan qola medali artynsha Eldos Smetovtiń kúshimen kúmis medalmen tolyqty.
Tamyzdyń 6-sy kúni Rıo-de-Janeıroda ótip jatqan Olımpııalyq oıyndarda dzıýdoshy qyzdar týrnıriniń 48 kıloǵa deıingi básekesi birinshi bolyp aıaqtalyp, alǵashqy júlde ıesin tanytty. Onda Otgonseseg Galbadrah Qazaqstan quramasyna alǵashqy medaldi alyp berip, qola júldeger atandy.
Bizdiń dzıýdoshy qyz úshinshi oryn úshin talasta kýbalyq Daıares Mestre Alvaresti ıpponmen utty. Onymen birge japon Amı Kondo qola júldege qol jetkizdi.
Al Olımpıada chempıony ataǵyn argentınalyq Paýla Pareto jeńip aldy. Ol fınaldyq aıqasta koreıalyq Chjeon Bok Iýndy «vızarı» ádisimen laqtyryp, jeńiske jetti.
Budan keıin bizdiń álem chempıony ataǵy bar dzıýdoshymyz Eldos Smetov fınalda reseılik Beslan Mýdronovtan utylyp, kúmis medaldi qanaǵat tutty. Úshinshi orynǵa japon Naoısa Takato men ózbek Dıorbek Ýrozbaev ornalasty.
Damır QOJAMQUL
Tehnıkalyq nátıjeler
Dzıýdo. Erler. 60 kg. 1. Beslan Mýdranov (Reseı). 2. Eldos Smetov (Qazaqstan). 3. Naoısa Takato (Iаponııa), Dıorbek Ýrozboev (О́zbekstan).
Áıelder. 48 kg. 1. Paýla Pareto (Argentına). 2. Chjeon Bok Iýn (Koreıa). 3. Amı Kondo (Japonııa), Otgonseseg Galbadrah (Qazaqstan).