Premer-mınıstr Oljas Bektenov «Derekterdi óńdeý ortalyqtary alqaby» jobasynyń Ulttyq quryltaıdyń V otyrysynda Prezıdent qoıǵan mindetter sheńberinde júzege asyrylý barysy qaralǵan jıyn ótkizdi, dep habarlaıdy Egemen.kz Úkimettiń baspasóz qyzmetine silteme jasap.
Onda Premer-mınıstrdiń orynbasary – jasandy ıntellekt jáne sıfrlyq damý mınıstri Jaslan Mádıev, «Qazaqtelekom» AQ basqarma tóraǵasy Baǵdat Mýsın jobanyń bıylǵy qańtar aıynda Pavlodar oblysy Ekibastuz qalasynda iske qosylǵannan bergi atqarylǵan jumystar týraly baıandady.
Ortalyq Azııadaǵy energetıkalyq áleýeti 1 GVt-qa deıin jetetin eń iri kampýsty qurý jónindegi «DО́O alqaby» jobasy búgingi tańda qarqyndy túrde júzege asyrylyp jatyr. Úkimet tıisti ınfraqurylymdyq jáne quqyqtyq jaǵdaılardy jasap otyr. Atap aıtqanda, jalpy aýdany 1,4 myń gektar jer telimi bólindi. Aýqymdy jobany júzege asyrý úshin qosalqy stansa satyp alý, sondaı-aq ınvestorlar men jobaǵa qatysýshylardy memlekettik qoldaýdyń qosymsha tetikterin ázirleý boıynsha jumystar júrgizilip jatyr.
Qurylatyn ınfraqurylymnyń mańyzdy elementi halyqaralyq seriktesterdi tartýǵa arnalǵan Greenfield aımaǵy bolmaq. Sondaı-aq odan ári keńeıte túsý múmkindigi bar 100 MVt-ǵa deıingi qýattar daıyndaldy. Infraqurylym energııa tıimdiligi koeffısıenti PUE 1.25 bolatyn Tier III halyqaralyq standartyna sáıkes kelmek.
Úkimet Prezıdent tapsyrmalaryn júzege asyrýǵa kiristi
«Telekommýnıkasııalyq ınfraqurylym salasyndaǵy eń iri hyperscale jáne BigTech kompanııalarynyń talaptaryn qanaǵattandyrý úshin jelilik kidiris 80-nen 57 mıllısekýndqa deıin tómendetiledi, bul – negizgi eýropalyq trafık almasý ortalyqtarymen teń deńgeı. Budan ári esepteý ınfraqurylymyn kezeń-kezeńmen ulǵaıtý, árqaısysy 50 MVt-tan JI-DО́O-nyń tórt kezeńin salý kózdelgen. Tutastaı alǵanda, «DО́O alqabyn» iske qosý Qazaqstanda sıfrlyq ınfraqurylym men esepteý qýattylyǵynyń óńirlik ortalyǵyn qalyptastyrýǵa, 30 mlrd dollarǵa deıin ınvestısııa tartýǵa jáne 500-den astam joǵary bilikti jumys oryndaryn ashýǵa múmkindik beredi», dep habarlady Úkimettiń baspasóz qyzmeti.
Jıyn qorytyndysy boıynsha Premer-mınıstr Oljas Bektenov salalyq mınıstrlikter men jaýapty uıymdarǵa jumystyń barlyq kezeńderin ýaqtyly júzege asyrýdy qamtamasyz etýdi jáne qajetti normatıvtik sheshimderdi qabyldaýdy jedeldetýdi tapsyrdy.
Prezıdent Qasym-Jomart Toqaevtyń Úkimettiń keńeıtilgen otyrysynda sóılegen sózi