Atyraýda alaıaqtar qylmysy órship tur. Quqyq qorǵaý organdaryn ınternettegi alaıaqtyq qylmysynyń 14 paıyzǵa artqany alańdatady. Keıingi jyldary aram pıǵyldy alaıaqtardyń osyndaı zańsyz áreketinen jábirlenýshilerge 1 mlrd 297 mln teńgeden asa shyǵyn keltirilgen.
Atyraý qalalyq prokýratýrasynyń málimetine qaraǵanda, alaıaqtar azamattardy aldaý úshin áleýmettik jelilerdi, messendjerlerdi, jalǵan saıttar men habarlamalardy keńinen paıdalanady. Alaıaqtar ózderin bank qyzmetkeri, quqyq qorǵaý organynyń ókili ne jaqyn týysyńyz retinde tanystyrýy múmkin. Sóıtip, jeke derekterdi, bank kartasynyń rekvızıtterin nemese kodtardy alýǵa tyrysady.
«Osyǵan baılanysty turǵyndar qaýipsizdik maqsatynda birneshe saqtyq sharasyna mán bergeni jón. Birinshiden, beıtanys siltemelerge ótpeýdi, jeke jáne bank derekterin úshinshi tulǵalarǵa bermeý kerek. Ekinshiden, kúmándi qońyraýlar men habarlamalarǵa senbeýdi usynamyz. Alaıaqtyq belgileri baıqalǵan jaǵdaıda quqyq qorǵaý organdaryna dereý habarlasýdy suraımyz», dep habarlady qalalyq prokýratýradan.
Oblystyq prokýratýranyń úılestirýimen Atyraýda ınternet-alaıaqtyqqa qarsy «Anti-Fraud Call Center» ortalyǵy ashyldy. Ortalyqta polısııa departamentiniń kıberqylmysqa qarsy jedel toby «Qazaqtelekom» AQ-tyń óńirlik fılıalynyń qyzmetkerlerimen birlese jumys isteıdi.
«Basty maqsatymyz – turǵyndardy ınternet jelisindegi alaıaqtyq qylmystardan qorǵaý. Bul ortalyqta zardap shekken turǵyndardyń ótinishteri jedel qaralady. Alaıaqtardan qorǵaný ádisi jóninde profılaktıkalyq keńes beriledi», deıdi oblys prokýrory Madııar Basshybaev.
Quqyq qorǵaý organdarynyń málimetine súıensek, jyl basynan beri ınternet arqyly jasalǵan alaıaqtyq qylmysynyń deregi 19 paıyzǵa ósken. Ákkilerdiń zańsyz áreketine baılanysty ortalyqqa 100-ge jýyq shaǵym túsken.
Polısııa departamentiniń bastyǵy Ońal Bekeevtiń aıtýynsha, alaıaqtardan qorǵaıtyn ortalyq qyzmetkerleri táýlik boıy jumys isteıdi. Ortalyqqa túsken qońyraýlarǵa monıtorıng júrgiziledi.
«Qyzmetkerler monıtorıng kezinde qylmyskerdiń qońyraý shalǵanyn anyqtasa, dereý jábirlenýshimen baılanysqa shyǵady. Turǵyndarǵa eskertý jáne túsindirý jumysyn júrgizedi. Polıseıler budan keıin alaıaqtyq áreketiniń jolyn kesý, kúdiktini ustaý maqsatynda tıisti jedel is-sharalardy júzege asyrady», deıdi O.Bekeev.
Atyraý oblysy