Almaty oblysynyń Aqshı aýylynda túıe sharýashylyǵy qarqyndy damyp keledi. Jergilikti sharýalar túıe sanyn kóbeıtip, ónim eksportyn ulǵaıtyp jatyr. Qazirgi tańda óńirde óndiriletin qurǵaq shubat Qytaı naryǵyna jóneltile bastady. Bul týraly óńir ákimdigi málim qyldy, dep habarlaıdy Egemen.kz.
Kúrti aýyldyq okrýginde búginde 6 myńnan astam túıe bar. Solardyń biri – kásipker Sydyq Dáýletovtiń sharýashylyǵy. Ol túıe ósirýmen 25 jyldan beri aınalysady. Kásipti bir túıeden bastaǵan sharýa búginde mal basyn 5 myńnan asyrǵan. Aldaǵy ýaqytta túıe sanyn 15 myńǵa jetkizip, shubat eksportyn birneshe ese arttyrýdy kózdep otyr.
Kásipkerdiń aıtýynsha, sharýashylyqta táýligine 5-10 tonna aralyǵynda túıe súti óndiriledi. Qys mezgilinde kólem shamamen 5 tonna bolsa, jaz aılarynda óndiris artady. Qazir fermada 1,5-2 myń túıe saýylady.
«Qurǵaq túıe sútin Qytaıǵa eksporttaı bastaǵannan keıin sharýashylyqtyń jumysy turaqtana tústi. Bul – tynymsyz eńbekti qajet etetin sala», deıdi Sydyq Dáýletov.
24 KZ málimetinshe, aýylda túıe sútin óńdeıtin arnaıy seh iske qosylǵan. Munda aı saıyn 30 tonnaǵa deıin qurǵaq shubat óndiriledi. Kásiporyn ónimniń 80%-yn Qytaıǵa eksporttaıdy. Qurǵaq túıe sútiniń 1 kelisi shamamen 50 dollar turady. Al memleket ár keli ónimge 55 teńge kóleminde sýbsıdııa tóleıdi.
Kásiporyn aýyldaǵy 200-ge jýyq turǵyndy jumyspen qamtyp otyr.
Shubat pen qyzylsha qosylǵan sýsyn
Tehnolog maman Anar Qalbaevanyń sózinshe, óndiris birneshe kezeńnen turady. Aldymen sút tazartylyp, súzgiden ótkiziledi. Odan keıin 85 gradýs temperatýrada pasterlenedi. Keıin qoıýlandyrý prosesi júrgizilip, sońynda sút untaq kúıine deıin keptiriledi.
Kásipker endi Almaty oblysynda túıe súti negizinde balalar taǵamyn shyǵaratyn Ortalyq Azııadaǵy eń iri zaýyt salýdy josparlap otyr. Joba júzege assa, kásiporyn táýligine 50-100 tonna ónim óńdeýge qaýqarly bolady. Inısıatıvany iske asyrý úshin shamamen 20 mlrd teńge ınvestısııa tartý kózdelgen.
Shubattan jasalǵan balmuzdaq naryqqa shyqty