Májilis depýtaty Bolatbek Nájmetdınuly Premer-mınıstrge sheteldik kólikterge qoıylatyn talaptardy teńestirý týraly bastama kóterdi, dep habarlaıdy Egemen.kz
Onyń aıtýynsha, qazirgi tańda qazaqstandyq júrgizýshiler Qytaı aýmaǵyna kirgen kezde ýaqytsha ákelý rásimi, júrgizýshi kýáligin rásimdeý, kólikti tirkeý, memlekettik nómir alý, saqtandyrý, qujattardy aýdarý, notarıattyq qyzmetter jáne baqylaý sekildi onǵa jýyq aqyly rásimnen ótedi. Munyń jalpy quny shamamen 560 myń teńgeni (8-9 myń ıýan) quraıdy.
Al Qytaı kólikteri Qazaqstanǵa negizinen tegin jáne barynsha jeńildetilgen tártippen kirip jatyr.
Gıbrıd kólikterge salynǵan qosymsha salyq: Depýtat sheneýnikterdi jaýapqa tartýdy surady
Depýtattyń málimetinshe, 2025 jyl men 2026 jyldyń alǵashqy tórt aıynda Qazaqstanǵa 8 myńnan astam qytaılyq avtokólik kirgen. Eger olarǵa da osyndaı talaptar qoldanylǵanda, bıýdjet pen qyzmet kórsetý ınfraqurylymy qosymsha shamamen 5 mıllıard teńge tabys tabar edi. Bul qarajatty shekara jáne keden qyzmetkerleriniń shyǵyndaryn óteýge baǵyttaýǵa bolady.
«Bul týrızmdi shekteý týraly másele emes. Áńgime quqyqtyq teńdik, qaýipsizdik jáne memlekettik shyǵyndardyń ornyn toltyrý týraly», – dedi Bolatbek Nájmetdınuly.
Ol Úkimetten sheteldik kólikterdi kirgizýge jumsalatyn memlekettik shyǵyndardy taldaýdy, ýaqytsha tirkeý men memlekettik nómir berý máselesin qarastyrýdy, sondaı-aq Qytaı tarapynyń talaptaryna saı keletin teńgerimdi tetik ázirleýdi surady.