Bizge Pablo Nerýdanyń óleńderi arqyly tanys Chılı eli – erekshe tabıǵaty men baı mádenıeti bar memlekettiń biri. Tynyq muhıttyń jaǵasyna ornalasqan elge baıaǵyda aqıyq aqyn Muqaǵalı Maqataev «Chılı – shýaǵym meniń» degen úlken dastan arnaǵan edi.
Jaqynda chılılik Marııa Argentına esimdi bıologııa pániniń muǵalimi Aqan seriniń «Balqadısha» ánin úırenip, jurt arasynda oryndap júrgenin estidik. Onyń aıtýynsha, ol qazaq ánin alǵash ret bir dosy arqyly estipti. «Ol maǵan Dımash Qudaıbergen týraly aıtyp berdi. Onyń tańǵajaıyp daýsyn tyńdaǵanymda, óz qulaǵyma ózim senbedim. Sol kúnnen bastap Dımashtyń jankúıerine aınaldym da, dombyra úırenýdi bastadym. Osylaısha, qazaq mýzykasyn tereńirek zerttedim. Sol kezde «Made in KZ» sııaqty tamasha mýzykalyq toptardy, sondaı-aq Roza Rymbaeva, Batyrhan Shúkenov sııaqty kóptegen daryndy ánshini bildim», deıdi ol tebirenip.
Ultymyzdyń mýzyka ónerine jan-tánimen ǵashyq bolǵan ol «Otan Ana», «Atameken», «Meniń Qazaqstanym» sııaqty ásem ánderdi estip, án mátinderiniń maǵynasyn túsinýge qulshynypty.
«Bul ánder meniń júregimdi birden baýrap aldy. Kóp uzamaı olardy ózim de aıtqym keletinin túsindim. Án aıtýdy janym qalaıdy. Ásirese basqa tilderde oryndaǵandy unatamyn. Al qazaq tili – erekshe áýezdi til. Sondyqtan kún saıyn qazaq ánderin tyńdap, mátinderin jazyp alyp júrmin. Alǵash oryndaǵan ánderim «Samaltaý» men «Qaratorǵaı» boldy. Men fın, japon, ıtalııa, portýgal tilderinde de án aıta alamyn. Degenmen qazaq ánderi múlde bólek áser qaldyrady. О́ıtkeni árbir ánniń shynaıy, tereń, óte muńly tarıhy baryn túsindim. Kóp jaǵdaıda bul bir halyqtyń basynan ótken aýyr taǵdyr týraly syr bolyp esepteledi. Sol sebepti qazaq halqynyń tarıhyn, mádenıetin, dinin de zertteı bastadym. Osylaısha, olardy múmkindiginshe jaqsy túsingim keldi».
Marııa Argentına qazaq ánderine degen qyzyǵýshylyǵy Dımashtan bastalǵanyn erekshe maqtanyshpen aıtady. Onyń endigi maqsaty qazaq tilin erkin sóılep úırený eken.