Sarapshylardyń málimetinshe, 2025 jyldyń qorytyndysy boıynsha bir adamǵa shaqqandaǵy azyq-túlik pen alkogolsiz sýsyndarǵa ketken ortasha shyǵyn 615,5 myń teńgege jetken. Bul aldyńǵy jylmen salystyrǵanda 13,9%-ǵa kóp, al 2010 jyldan beri nomınaldy shyǵyndar shamamen alty esege artqan. Sonymen qatar halyq shyǵynynyń qurylymynda azyq-túliktiń úlesi joǵary deńgeıde qalyp otyr. 2025 jyly bul kórsetkish 47,8%-dy qurady. Pandemııa kezindegi eń joǵary deńgeı – 50,4%, kórsetkish azdap tómendegenimen, burynǵy qalypty mejege qaıta túspegen. Bul azamattardyń negizgi qarjysy áli de kúndelikti tutynýǵa jumsalatynyn kórsetedi, dep habarlaıdy Egemen.kz.
Tabystyń ósýine qaramastan, onyń edáýir bóligi tek kúndelikti tamaqtanýǵa jetedi. 2025 jyly qazaqstandyqtar jalpy tabysynyń 42,5%-yn azyq-túlikke jumsaǵan. Bul 2024 jylmen salystyrǵanda joǵary (40,7%). Aımaqtar arasynda aıyrmashylyq aıqyn: mysaly, Almatyda bir adamǵa shaqqandaǵy azyq-túlik shyǵyny 843,1 myń teńgege jetse, Jetisý oblysynda turǵyndar tabysynyń 59,1%-yn, al Jambyl oblysynda 55,9%-yn azyq-túlikke jumsaǵan. Túrkistan oblysynda bul kórsetkish 52,9%-dy quraıdy.
Elordada tıimdi baǵada azyq-túlikti qaıdan alýǵa bolady?
Al Astana, Qaraǵandy jáne Qostanaı oblystarynda azyq-túlik shyǵyndarynyń úlesi salystyrmaly túrde tómen – shamamen 32-34% aralyǵynda.
Azyq-túlik shyǵyndarynyń qurylymy da ózgerissiz qalyp otyr. Eń úlken úlesti et ónimderinde – barlyq shyǵynnyń 34,4%-y (211,6 myń teńge). Bir jyl ishinde bul sanattaǵy shyǵyn 18,1%-ǵa artqan. Odan keıin nan ónimderi men jarma (14,7%), sondaı-aq sút ónimderi (10,6%) tur. Osy úsh sanat jalpy shyǵynnyń shamamen 60%-yn quraıdy.
Al jemis-jıdek pen kókóniske jumsalatyn qarjynyń úlesi tómenirek – tıisinshe 9,1% jáne 7,7%. Balyq pen teńiz ónimderine jumsalatyn shyǵyn – nebári 4,4%, al jumyrtqaǵa – 2,1%. Bul halyq tutynýynyń negizinen qoljetimdi, bazalyq ónimderge táýeldi ekenin ańǵartady.
Baǵanyń ósýi jaǵdaıdy odan ári ýshyqtyryp otyr. 2026 jyldyń aqpan aıynda azyq-túlik baǵasy ótken jyldyń osy kezeńimen salystyrǵanda 12,6%-ǵa qymbattaǵan. Bul 2025 jylǵy 6,3%-dyq ósimnen eki ese joǵary. Sońǵy onjyldyqtaǵy eń joǵary qarqyndardyń biri retinde baǵalanyp otyr.
Naýryz aıynda dári-dármekterdiń baǵasy 25%-ǵa arzandady
О́ńirler arasynda eń joǵary baǵa ósimi Ulytaý oblysynda tirkelgen – 16,2%. Odan keıin Aqmola (15,2%) jáne Soltústik Qazaqstan (15,1%) oblystary tur.
Sarapshylardyń aıtýynsha, azyq-túlik baǵasynyń mundaı qarqynmen ósýi jalǵassa, 2026 jyldyń qorytyndysynda halyq shyǵynyndaǵy azyq-túlik úlesi qaıtadan 50%-dan asýy múmkin. Bul óz kezeginde turǵyndardyń basqa qajettilikterge jumsaıtyn qarajatyn azaıtyp, ómir súrý sapasynyń tómendeýine ákelýi yqtımal.