Almatynyń Ortalyq ıppodromynda qalalyq Sport basqarmasy men Ulttyq jáne at sporty túrleriniń sport klýby uıymdastyrǵan Naýryz merekesin bóle-jaryp aıta ketý kerek.
Bul kúnniń basty oqıǵasy «Topjarǵan» etnomádenı ortalyǵy ornatqan – eki birdeı álemdik rekord. Aldymen Dınara Saıdalına túıemen saǵatyna 35,9 shaqyrymdyq jyldamdyqpen jelip otyryp, 10 sekýndta 4 tórt nysanany da dál kózdep, álemdik rekord ornatty. Syrttaı tamashalaǵan adamǵa osynyń bári ońaı kóringenimen, shaıqalaqtaǵan túıeniń ústinde tepe-teńdik saqtaı otyryp sadaq tartý óte qıyn ári asqan sheberlikti talap etedi. Bul jetistik Gınnestiń rekordtar kitabyna tirkeldi.
Mamandar da nysana kózdeýdiń mundaı túri at ústindegi dástúrli sadaq atýdan áldeqaıda kúrdeli ekenin alǵa tartyp otyr.
«Bul jarysqa óte uzaq daıyndaldyq. Qatty ýaıymdadyq desek te bolady. Búgin sol qajyrly eńbegimiz aqtaldy. Túıemen jattyǵyp júrgenime bir jyldaı boldy, biraq dál osy álemdik rekordqa keıingi eki aıda barymyzdy saldyq. Keıingi ýaqyttaǵy jańbyr aralas qar dala jattyǵýlaryn qıyndatty. Biraq qajyrly eńbegimizdiń nátıjesi bárin umyttyrdy», deıdi Dınara.
Kelesi rekordty Aıqasqa attyń ústinde tik turyp, 500 metr qashyqtyqty saǵatyna 43,331 shaqyrymdyq jyldamdyqpen shaýyp ótken Ernar Jasuzaq jańartty.
«Men úshin bul rekord sandar ǵana emes, bul – ulttyq sporttyń damýyna qosqan úlesim. Júgendi ustamaı shabý – erkindiktiń nyshany ǵana emes, ójet te qaısar ata-babalarymyzdyń qanymen kelgen qasıet. Olar osynaý has ónerdi sheber meńgergenin maqtanysh etemin», deıdi Ernar Jasuzaq.
ALMATY