Elge qorǵan bolar sarbazdardy otan qorǵaýǵa baýlyp júrgen ofıserdiń biri – kapıtan Aıdar Negaev. Qazir Atyraýdaǵy barlaýshylar batalonynda rota komandıriniń orynbasary bolyp qyzmet atqarady.
Aıdar Haıdaruly – Batys Qazaqstan oblysynyń Jańaqala aýdanyndaǵy Muqyr aýylynyń týmasy. Kópbalaly otbasynda dúnıege kelgen. Ákesi traktorshy-mashınıst, anasy bala tárbıesine mán berip, úı sharýasynda bolǵan.
«Bala kezimnen áskerı salaǵa qyzyǵatyn edim. Bastapqyda áskerı adamnyń formasy qyzyqtyratyn edi. Keıin otandy qorǵaý úshin Qarýly kúshter qatarynda qyzmet atqarýdy maqsat ettim», deıdi A.Negaev.
Onyń negizgi mamandyǵy – pedagog-psıholog. Batys Qazaqstan gýmanıtarlyq ýnıversıtetinde joǵary bilim alǵan. Alaıda bala kezdegi armany áskerı salaǵa alyp keldi.
«Rota komandıriniń orynbasary retinde maǵan júktelgen mindet bar. Bul – jeke quramdy qarýmen, oq-dárimen qamtamasyz etý, saqtalýyn qadaǵalaý. Biraq munymen shektelýge bolmaıdy. Qarýly kúshter qataryndaǵy barsha ofıserdiń mindeti – eldiń qorǵanys salasyn jetildirý, áskerge shaqyrylǵan jastardyń el qorǵany bolatyndaı myqty sarbaz retinde qalyptasýyna atsalysý», deıdi ol.
Qazaq ofıseri byltyrǵy sáýirde Golan jotalarynan oraldy. Ol 2024 jylǵy kóktemde BUU-nyń bitimgershilik mıssııasy (UNDOF) aıasynda Qazaqstannan attanǵan derbes bitimgerlik kontıngentiniń quramynda bir jyl bir aı boldy. El bitimgerleri Sırııa Arab Respýblıkasynyń aýmaǵyndaǵy Golan jotalarynda BUU-nyń ajyratý aımaǵyn baqylaý mıssııasyna, áskerı qaqtyǵysty toqtatý rejimin qamtamasyz etýge qatysty. Naqtysynda baqylaý beketterin kúzetti. Sol kezde Aıdar Negaev zymyran-artıllerııalyq qarý-jaraq ofıseri mindetin atqardy.
«Bul mıssııa Qazaqstan bitimgerleriniń alǵashqy derbes operasııasy edi. Qaqtyǵys aımaǵynda bitimgerlik mıssııasyn atqarý ońaı emes. Biz táýelsiz ári beıbit elde ómir súrip jatqanymyzǵa qýandyq. Táýelsizdiktiń qadirin tereń sezindik», deıdi ofıser.
Atyraý oblysy