Kólsaıdaǵy tabıǵat qorǵaý aksııasy

Elimizdiń injý-marjany sanalatyn «Kólsaı kólderi» mem­lekettik ulttyq tabıǵı parki aýmaǵynda jyl saıyn ótkiziletin bul aksııanyń basty maqsaty – tabıǵatty qorǵaý, qorshaǵan orta máselelerine qoǵam nazaryn aýdarý, olardy sheshý joldaryn nasıhattaý. Aksııa aıasynda túrli baıqaýlar, dóńgelek ústelder, tazalyq jumysy, aǵash otyrǵyzý, bulaq kózderin tazartý sııaqty ekologııalyq is-sharalar uıymdastyrylady. Sonymen qatar taqyryptyq kórmeler men konsertter ótki­zilip, oqýshylardyń tabı­ǵat­ty qorǵaý baǵytyndaǵy belsen­di­ligin arttyrýǵa erekshe kóńil bólinedi.

Aýyl turǵyndary, úlkeni men kishisi bir kisideı jumy­lyp, «Qustarǵa qamqor bolaıyq», «Búkil­qazaqstandyq aǵash otyr­ǵyzý kúni», «Jasyl japy­raq», «Tabıǵat – bizdiń anamyz», «Móldir bulaq» aksııalaryna turaqty túrde qatysýdy ıgi dástúrge aınaldyrǵan. Mektep oqýshylary arasynda tabıǵatty qorǵaý taqyrybynda sýret salý, qolóner buıymdaryn jasaý, bı óneri jáne óz shyǵarmalaryn usyný boıynsha baıqaýlar ótkizilip, úzdik shyqqandar «Park­ter sherýi» aksııasynyń qory­tyndy jıynynda marapattaldy.

Jeńimpazdarǵa ulttyq park pen demeý­shiler tarapynan baǵaly syılyqtar tabystalyp, tabı­ǵatty aıalaýdy ómirlik ustanymyna aınal­dyrǵan jas býynnyń mereıi ústem boldy.

Bıyl «Parkter sherýi» tabıǵat qorǵaý aksııasy aıasynda 50 túrli is-shara men 4 baıqaý uıymdastyrylyp, oǵan 4 myńǵa jýyq adam qatysty.

Kólsaıdyń kórkem tabı­ǵaty aıasynda ótken qory­tyn­dy jıynda oqýshylardyń óz qoldarymen jasaǵan turmystyq buıymdary men kóz tartar sýretterinen quralǵan kórme kópshiliktiń qyzyǵýshylyǵyn týdyrdy.

– Men ákemniń kómegimen ádemi úıshik jasadym. Eger ony úlkeıtip, Kólsaı aýmaǵyna ornalastyrsa, demalýǵa kelgen adamdardyń tynyǵýyna múm­kin­dik bolar edi. Al qolym­daǵy kúrekti jasaý da qıyn bolǵan joq. Ony qysta qar tazalaýǵa, jazda qoqys jınaý­ǵa paıdalanýǵa bolady, – deıdi Aıtjan Túrkebaev atyndaǵy orta mektep-lıseıiniń 3-synyp oqýshylary Mıras Sebeǵat pen Qasymáli Jánibek.

Eńbekqor ári izdenimpaz balalardyń qolynan shyqqan san alýan buıymdar sapasymen, uqyptylyǵymen, tyń ıdeıalarymen erekshelendi.

– «Parkter sherýiniń» bas­ty maqsaty – babalarymyzdan amanat bolyp jetken tabı­ǵat baılyǵyn saqtap, keler urpaqqa jetkizý. Kórmege qa­tysqan oqýshylardyń turmystyq qatty qaldyqtardan jasaǵan buıymdary erekshe áser qal­dyrdy. Bul – ata-analar men ustazdardyń qoldaýynyń, bala­larǵa durys baǵyt-baǵdar bere bilgen eńbeginiń nátıjesi. «Bir tal kesseń, on tal ek» degen naqyl sóz jas urpaqty tabıǵat­ty qur­met­teýge, qorshaǵan ortaǵa janashyr­lyq­pen qaraýǵa tárbıe­­­­leı­di. Sondyqtan tabıǵatty qorǵaý – barshamyzdyń ortaq min­detimiz, – dedi «Amanat» partııasy Kegen aýdandyq fılıalynyń tóraǵasy Oljas Taqabaev.

Kelesi kezekte Qarabulaq aýyldyq okrýginiń ákimi Rústem Jeńisuly sóz sóılep, dástúrli túrde ótkizilip kele jatqan bul aksııanyń mańyzyna toqtaldy. Ol mektep oqýshylarynyń aksııa aıasyn­daǵy jumysqa belsendi qatysyp, aına­lanyń tazalyǵyn saqtaýǵa eleýli úles qosyp júr­genin atap ótip, rızashylyǵyn bildirdi.

– Aýdan ǵana emes, Almaty oblysy men Almaty qalasynyń mektepterin qamtıtyn «Parkter sherýi» aksııasynyń tarıhy AQSh-tan bastaý alǵan. Bıyl bul is-shara 19-ret uıymdastyrylyp otyr. Aksııaǵa ulttyq park aýmaǵymen shektesetin aýyl­dyq okrýgterdegi 10 mekteptiń oqýshy­lary qatysyp, tabıǵatty qorǵaý isindegi bel­sendiligin kórsetti. Olardyń týǵan ólkeni taza ustaýǵa, qorshaǵan ortany qorǵaýǵa degen ynta-jigeri erekshe qýantady. Sonymen qatar týǵan jerge arnalǵan óleńderi men shyǵarmashylyq týyndylary da joǵary baǵalandy. Búgin marapat­talyp otyrǵan jeńimpazdar – sonyń aıqyn dáleli, – dedi «Kólsaı kól­deri» memlekettik ulttyq tabıǵı parki dırektorynyń orynbasary Hamıt Aǵabekuly.

Is-shara sońynda Hamıt Aǵa­bekuly «Parkter sherýi» aksııasynyń jeńim­paz­dary men belsendi qatysýshy­la­ryna Alǵyshattar men baǵaly syılyq­tardy tapsyrdy.

Almaty oblysy