Dımash Qudaıbergenniń týǵan kúni qarsańynda onyń astanalyq jankúıerleri shala týǵan nárestelerge arnalǵan qaıyrymdylyq aksııasyn uıymdastyrdy. DQ Dears Astana, Eýrazııalyq fan-klýb jáne Dimash Ukraine Dears EFC ókilderi «28 ilmek Astana» klýbyna 290 oram jún jip tapsyrdy, dep habarlaıdy Egemen.kz.
«28 ilmek Astana» uıymy birneshe jyldan beri salmaǵy az bolyp týǵan sábılerge kómek kórsetip keledi. Mundaı balalarǵa dene jylýyn saqtaý qıyn bolǵandyqtan, tabıǵı júnnen toqylǵan kıimder erekshe mańyzdy sanalady.
Berilgen jipterden eriktiler shulyq, bas kıim, keýdeshe jáne kórpeler toqıdy. Barlyq buıymdar qolmen ári 100 paıyz júnnen jasalady.
Meksıkadaǵy qazaqtaný: Maǵjannan Dımashqa deıin
Jankúıerler bul bastama arqyly kóbirek sábıge jylý men qamqorlyq syılaýdy maqsat etkenderin aıtty.
«28 ilmek Astana» klýbynyń músheleri aksııaǵa qatysýshylarǵa alǵys aıtyp, jobanyń erekshe mańyzyn atap ótti.
«Jaqsylyqty jip oramymen ólsheýge bola ma? Bolady eken. 290 oram jip – júzdegen jyly oqıǵanyń bastamasy. Jaqyn arada olardan shala týǵan sábılerge arnalǵan kishkentaı shulyqtar, keýdesheler, bas kıimder men kórpeler toqylady. Mundaı balalar úshin jylý – ómir súrýge jáne kúsh jınaýǵa múmkindik», dedi eriktiler.
Buǵan deıin Dımash Qudaıbergenniń Argentınadaǵy jankúıerleri de qaıyrymdylyq jobasyn bastap, mýzykalyq aspaptary jetispeıtin mektepterge kómek kórsetken bolatyn.
Qaıyrymdylyq aksııasy Dımash Qudaıbergenniń týǵan kúnine deıin jalǵasady. 24 mamyrda óner ıesi 32 jasqa tolady.