2026 jyldyń qańtar-naýryz aılarynyń qorytyndysy boıynsha Qazaqstan men Reseı arasyndaǵy taýar aınalymy 6,46 mlrd AQSh dollaryn qurap, ótken jyldyń osy kezeńimen salystyrǵanda 16,1% artty, dep habarlaıdy Egemen.kz
2025 jyldyń alǵashqy toqsanynda bul kórsetkish 5,56 mlrd AQSh dollaryn quraǵan bolatyn. Reseı Qazaqstannyń negizgi saýda seriktesteriniń biri retindegi ornyn saqtap, ózara saýda kólemi boıynsha ekinshi orynda tur. Sonymen qatar, Reseı ımport pen ónerkásiptik kooperasııa baǵytyndaǵy mańyzdy naryqtyń biri.
Qazaqstannan Reseıge eksport negizinen metallýrgııa jáne shıkizat ónimderi esebinen qalyptasty. Negizgi eksporttyq taýarlar qatarynda ystyqtaı ılektelgen legırlenbegen jalpaq prokat (131,8 mln AQSh dollary), temir keni men konsentrattary (77,8 mln dollar), qaptalǵan jalpaq prokat (77 mln dollar), sýyqtaı ılektelgen jalpaq prokat (73,3 mln dollar), alıýmınıı oksıdteri men gıdroksıdteri (60,5 mln dollar), tas kómir (40 mln dollar), sondaı-aq óńdelmegen myrysh (39,5 mln AQSh dollary) bar.
2026 jyldyń alǵashqy toqsanynda Reseıden Qazaqstanǵa ımport kólemi 28,5%-ǵa ósip, 4,96 mlrd AQSh dollaryna jetti. Import ósimi strategııalyq mańyzy bar taýarlar men ónerkásip ónimderiniń jetkiziliminiń artýymen baılanysty. Ásirese, ýran ımportynyń kólemi aıtarlyqtaı ósip, 2486 esege artyp, 258,5 mln AQSh dollaryn qurady. Tabıǵı gaz ımporty 93,4%-ǵa ósip, 499 mln dollarǵa jetse, óńdelmegen jáne jartylaı óńdelgen altyn ımporty 36,5 esege ulǵaıyp, 211,2 mln dollardy qurady. Sonymen qatar, munaı ónimderi, bıdaı, baǵaly metaldar kenderi men konsentrattary, sondaı-aq temirjol vagondary ımporty boıynsha da ósim tirkeldi.
О́zara saýdanyń oń dınamıkasy Qazaqstan men Reseı arasyndaǵy ekonomıkalyq yqpaldastyqtyń joǵary deńgeıin, óndiristik kooperasııanyń keńeıýin jáne eki eldiń negizgi salalary ónimderine degen turaqty suranysty kórsetedi.