2026 jylǵy 7 mamyrda Astanada jańa «Ádilet» saıası partııasynyń quryltaı sezi ótip, partııanyń resmı qyzmeti bastaldy. Sezd barysynda delegattar uıymnyń resmı ataýyn – «Ádilet» saıası partııasy» qoǵamdyq birlestigi retinde bekitip, Jarǵysy men baǵdarlamasyn qabyldady. Partııa tóraǵasy bolyp Dádebaı Aıbek Arqabaıuly saılandy, dep habarlaıdy Egemen.kz.
Delegattar aldynda sóz sóılegen «Ádilet» partııasynyń tóraǵasy negizgi jumys baǵyttaryn aıqyndady:
«Bizdiń partııamyzdyń negizi zań ústemdigi men tártip qaǵıdattaryna qurylady. Halyqtyń zań ústemdigine degen senimi – memlekettiń basty resýrsy ári tiregi. Sondyqtan bizdiń negizgi mindetimiz – ádildikti jarııalaý ǵana emes, ony ortaq mádenıetimizdiń ajyramas bóligine ári kúndelikti ómirimizdiń shartyna aınaldyrý. Basqasha aıtqanda, Ádildik ulttyq sana men bolmystyń aıryqsha sıpatyna aınalýǵa tıis. Memleket basshysy Qasym-Jomart Toqaev óz nazaryn únemi dál osy baǵytqa aýdaryp keledi», dedi Aıbek Dádebaı.
«Ádilet» partııasy óz qyzmetin zań jáne tártip, tıimdi ınstıtýttar, qýatty óńirler – qýatty el, is júzindegi Halyq únine qulaq asatyn memleket, ádiletti ári básekege qabiletti ekonomıka, áleýmettik yntymaq pen ataýly qoldaý, adamı áleýetke basymdyq berý, sıfrlyq memleket, Taza Qazaqstan, jaýapty orta derjava jáne jańa geosaıası etıka qaǵıdattary tóńireginde qurady.
«Ádilet» ıdeologııasynyń negizinde Qazaqstannyń jarqyn bolashaǵy ár azamattyń búgingi kúndelikti tańdaýy arqyly qalyptasady degen senim jatyr. Bul – adal eńbek etý, zańdy qurmetteý jáne el ómirine beıjaı qaramaı, qoǵam isine belsendi atsalysý.
«Bizdiń nıettesterimiz – dál osyndaı azamattar. Olar – belsendi, jaýapkershiligi joǵary, el damýyna úles qosatyn jandar. Biz birge eńbek etemiz, jumysty ashyq, adal ári qoǵam aldynda esep bere otyryp júrgizemiz. Biz jeńil sheshimder usynbaımyz. Júıeli, jaýapty jáne dáıekti jumys júrgizýge ýáde beremiz», dep atap ótti Aıbek Dádebaı.
Partııa ustanymdary qazaqstandyqtardyń keń qoldaýyna ıe boldy. 30 sáýirde iske qosylǵan http://adilet-partiyasy.kz/ sıfrlyq platformasy arqyly partııa qataryna kirýge 9000-nan astam ótinish kelip tústi.
Partııanyń qurylýy 2026 jylǵy 15 naýryzda qabyldanǵan Qazaqstan Respýblıkasynyń jańa Konstıtýsııasynda bekitilgen qundylyqtardyń is júzindegi naqty kórinisi boldy. Quryltaı sezi «Ádilettiń» Táýelsizdik býynynyń partııasy retindegi mártebesin rastap, onyń ókildi demokratııa ınstıtýttary men zań ústemdigin nyǵaıtýǵa baǵyttalǵanyn kórsetti.