Astanada «Ádilet» saıası partııasynyń quryltaı sezi ótti. Jıynǵa elimizdiń barlyq óńirinen myńǵa jýyq delegat pen partııa jaqtastary jınaldy. Quryltaı barysynda jańa saıası birlestikti qurý, onyń resmı ataýyn bekitý, jarǵysy men baǵdarlamasyn qabyldaý, sondaı-aq basshylyq jáne baqylaý organdaryn saılaý máseleleri qaraldy, dep habarlaıdy Egemen.kz.
Jańa partııa qurý týraly sheshim qabyldandy
Sez barysynda delegattar «Ádilet» partııasyn qurý týraly sheshimdi qoldady. Tıisti sheshimge sezge qatysqan 931 delegat daýys berdi. Sonymen qatar partııanyń qazaq, orys jáne aǵylshyn tilderindegi resmı ataýy bekitildi. Barlyq rásimder «Saıası partııalar týraly» Qazaqstan Respýblıkasynyń zańy talaptaryna sáıkes ótti.
Quryltaıda partııanyń negizgi qujattary – Jarǵysy men baǵdarlamasy qabyldandy. Jıynnyń resmı bóligi bastalmas buryn qonaqtarǵa arnap shaǵyn konserttik baǵdarlama uıymdastyrylyp, keıin delegattar jańa saıası uıymnyń aldaǵy baǵyttaryn talqylady.
Partııa basshysy bolyp Aıbek Dádebaı saılandy
Sez delegattarynyń sheshimimen partııa tóraǵasy qyzmetine Dádebaı Aıbek Arqabaıuly saılandy. Buǵan deıin quryltaı barysynda jańa saıası birlestiktiń saıası keńesiniń quramy tanystyrylǵan bolatyn. Tizimge 30 adam endi.
Sez barysynda qatysýshylar Aıbek Dádebaıdy partııa tóraǵalyǵyna usyný týraly usynysty qoldady. О́z kezeginde Dádebaı delegattarǵa senim bildirgeni úshin alǵys aıtyp, bul sheshimdi úlken jaýapkershilik dep qabyldaıtynyn jetkizdi.
«Bizdiń nıettesterimiz – dál osyndaı azamattar. Olar – belsendi, jaýapkershiligi joǵary, el damýyna úles qosatyn jandar. Biz birge eńbek etemiz, jumysty ashyq, adal ári qoǵam aldynda esep bere otyryp júrgizemiz. Júıeli, jaýapty jáne dáıekti jumys júrgizýge ýáde beremiz», dep atap ótti Aıbek Dádebaı.
Jarǵy – partııanyń jumys tártibin aıqyndaıtyn negizgi qujat
Quryltaıda partııa jarǵysynyń negizgi qaǵıdattary da tanystyryldy. Saıasattanýshy Bórihan Nurmuhamedovtiń aıtýynsha, bul qujat jaı ǵana ishki ereje emes, partııanyń bolashaqtaǵy jumys baǵytyn aıqyndaıtyn mańyzdy negiz.
«Bul – úlken jaýapkershilik sáti. Bizdiń partııanyń erteń qandaı bolatyny dál osy kezeńge baılanysty. Usynylǵan qujat – aýqymdy, tereń ári muqııat júrgizilgen jumystyń nátıjesi. Ol Qazaqstan Respýblıkasynyń Konstıtýsııasy men qoldanystaǵy zańnamasyna tolyq sáıkes keledi. Biraq onyń mańyzy budan da keń. Bul – partııanyń saıası júıeniń tolyqqandy qatysýshysyna aınalýyna, azamattardyń múddesin qorǵaýyna jáne memlekettik saıasattyń qalyptasýyna yqpal etýine múmkindik beretin jumys quraly», dedi ol.
Onyń sózinshe, jarǵynyń negizinde ashyqtyq, jaýapkershilik jáne azamattardyń qatysýy qaǵıdattary jatyr. Partııa sezi uıymnyń eń joǵary organy retinde belgilenip, saıası keńes pen bıýro úzdiksiz jumysty qamtamasyz etetin qurylymdar retinde qarastyryldy.
Adamı kapıtal men ádilet qaǵıdaty: Baǵdarlamada ne aıtyldy?
Quryltaı sezinde «Ádilet» partııasynyń resmı baǵdarlamasy da bekitildi. Qujatta adamı kapıtaldy damytý, zań ústemdigin kúsheıtý, óńirlerdiń teńgerimdi damýy jáne ádiletti qoǵam qurý máseleleri negizgi basymdyq retinde aıqyndalǵan.
Partııa ustanymynda ádildik, otanshyldyq, jaýapkershilik, eńbekqorlyq pen damý basty qundylyq retinde kórsetilgen. Baǵdarlamada densaýlyq saqtaý, bilim berý, ǵylym, mádenıet jáne kreatıvti ındýstrııalardy damytý arqyly qoǵam sapasyn arttyrýǵa erekshe mán berilgen.
Saıasattanýshy Marat Shıbutov quryltaı barysynda partııanyń baǵdarlamalyq ustanymdaryna toqtalyp, uıym óz jumysyn ádildik, jaýapkershilik, naqty áreket pen ınstıtýsıonaldyq qaǵıdattarǵa negizdeıtinin aıtty. Onyń sózinshe, «Ádilet» partııasy ádildik ıdeologııasyna jáne jańa Konstıtýsııa qundylyqtaryna súıenedi.
«Eń aldymen, baǵdarlamamyzdyń ereksheligine toqtalǵan jón. «Ádilet» partııasy óziniń ádildik ıdeologııasyna jáne jańa Konstıtýsııa qundylyqtaryna súıenetinin aıryqsha atap ótedi. Osy arqyly naqty mindettemelerdi óz moınyna alady. Bul degenimiz – baǵdarlama bolashaqtyń negizine aınalýy tıis qaǵıdattarǵa qurylyp otyr degen sóz. Partııanyń negizgi tirekteri retinde ádildik, otanshyldyq, eńbekqorlyq, jaýapkershilik pen progress aıqyndalǵan», dep atap ótti saıasattanýshy.
Partııanyń saıası baǵyty
Partııa tóraǵasy Aıbek Dádebaı sezde málimdeme jasap, jańa saıası birlestiktiń ıdeologııalyq negizderi men basty baǵyttaryn tanystyrdy. Onyń aıtýynsha, partııa qyzmeti zańdylyq, tártip jáne qoǵamdyq jaýapkershilik qaǵıdattaryna súıenedi.
«Bizdiń partııamyzdyń negizi zań ústemdigi men tártip qaǵıdattaryna qurylady. Halyqtyń zań ústemdigine degen senimi – memlekettiń basty resýrsy ári tiregi. Sondyqtan bizdiń negizgi mindetimiz – ádildikti jarııalaý ǵana emes, ony ortaq mádenıetimizdiń ajyramas bóligine ári kúndelikti ómirimizdiń shartyna aınaldyrý. Basqasha aıtqanda, Ádildik ulttyq sana men bolmystyń aıryqsha sıpatyna aınalýǵa tıis. Memleket basshysy Qasym-Jomart Toqaev óz nazaryn únemi dál osy baǵytqa aýdaryp keledi», dedi Aıbek Dádebaı.
Ol partııanyń negizgi mindetteriniń biri memleket pen azamattar arasyndaǵy senimdi nyǵaıtý, dıalog pen jaýapkershilikke negizdelgen saıası mádenıet qalyptastyrý ekenin atap ótti.
«Ádilet» Prezıdenttiń reformalaryn qoldaıdy
Jańa saıası uıym Memleket basshysynyń reformalaryn qoldaıtynyn da jarııa etti. Partııa óz jumysyn zań ústemdigi men qoǵamdyq tártipke, tıimdi memlekettik ınstıtýttardy qalyptastyrýǵa, óńirlerdiń áleýetin kúsheıtýge jáne «Halyq únine qulaq asatyn memleket» qaǵıdatyn is júzinde júzege asyrýǵa negizdemek.
Sonymen qatar uıym ádiletti ári básekege qabiletti ekonomıkany damytýǵa, áleýmettik yntymaq pen naqty qoldaýdy kúsheıtýge, adamı kapıtaldy arttyrýǵa, sıfrlyq memleketti jetildirýge, «Taza Qazaqstan» bastamasyn qoldaýǵa, jaýapty orta derjava qaǵıdatyn ustanýǵa jáne jańa geosaıası etıkany qalyptastyrýǵa basymdyq beredi.
Partııa ıdeologııasynyń ózeginde Qazaqstannyń bolashaǵy ár azamattyń búgingi áreketine baılanysty degen ustanym jatyr. Bul – adal eńbek etý, zańdy qurmetteý jáne qoǵam ómirine beıjaı qaramaı, el isine belsendi aralasý degendi bildiredi.
«Qarsylastyq emes, óz qundylyqtarymyz mańyzdy»
«Astana» halyqaralyq qarjy ortalyǵynyń basqarýshysy, partııanyń jetekshi tobynyń múshesi Renat Bekturov jańa saıası uıymnyń qundylyqtary men jumys tásilderine toqtaldy. Onyń aıtýynsha, «Ádilet» partııasy ózin saıası teketirestiń quraly retinde qarastyrmaıdy jáne basty nazardy óz baǵdarlamalyq maqsattary men ıdeologııasyna aýdarmaq.
Onyń sózinshe, partııanyń ereksheligi onyń bastamashylary men qoldaýshylarynyń býynymen de baılanysty. Bekturov partııa músheleriniń kópshiliginiń dúnıetanymy Táýelsiz Qazaqstan kezeńinde qalyptasqanyn atap ótti.
Raýan Kenjehanuly: «Partııa qoǵamdaǵy ózgeriske degen suranysqa jaýap beredi»
Quryltaı sezinde sóz sóılegen «Qazaq tili» halyqaralyq qoǵamynyń prezıdenti, bastamashyl toptyń múshesi Raýan Kenjehanuly «Ádilet» partııasy ádilet qaǵıdatyn basty qundylyq retinde ustanatynyn aıtty. Onyń sózinshe, partııa qoǵamdaǵy ózgeriske degen suranysqa jaýap berip, ár azamat óz ómirinde ádilettilikti sezinetin orta qalyptastyrýdy maqsat etedi.
Ol partııa óz qyzmetin ózge saıası kúshtermen qarsylastyqqa qurmaıtynyn aıtyp, basty nazar qoǵamdyq dıalog pen memleket pen azamattar arasyndaǵy senimdi kúsheıtýge aýdarylatynyn jetkizdi.
«Ádilettiń» negizgi tiregi jastar bolmaq
Partııa bastamashylarynyń biri Talant Omarbekov «Ádilet» partııasyn qurýǵa 700 adam bastamashy bolǵanyn aıtty. Onyń sózinshe, uıym qurylǵannan keıin partııanyń baǵdarlamasy men jarǵysy ázirlenip, múshelikke onlaın tirkelýge múmkindik beretin arnaıy sıfrlyq platforma iske qosylǵan.
Sondaı-aq qysqa ýaqyt ishinde partııaǵa 9 myńnan astam adamnyń tirkelgeni aıtyldy. Bastamashyl top ókiliniń pikirinshe, partııaǵa qyzyǵýshylyq tanytyp otyrǵandardyń basym bóligi – jastar.
«Jastarǵa áleýmettik lıft pen jańa ózgerister qajet. Qazir saıasatqa aralasatyn ýaqyt kelgenin jastardyń ózi de túsinip otyr», dedi ol.