Búgin tamyzdyń 13-i men 14-ine qaraǵan túni Rıo-de-Janeıroda ótip jatqan Olımpııalyq oıyndardyń boks týrnırinde Qazaqstannyń 4 bylǵary qolǵap sheberi sharshy alańǵa shyǵady. Sonyń ishinde Oljas Sáttibaev pen Ivan Dychko bul týrnırdegi birinshi shaıqastaryn ótkizgeli tur.
Jerlesterimizdiń bul jekpe-jekteri serııasyn 52 kg salmaqtaǵy Oljas Sáttibaev bastaıdy. Osy kúngi urystardyń shymyldyǵyn ashyp beretin ol 1\16 fınala pýertorıkolyq Djesýs Djevıer Kantronmen kezdesedi. Eger ony jeńse, 15 tamyz kúni oınalatyn 1/8 fınalda ázerbaıjan Elvın Mamıshzademen qolǵap túıistiredi. Búgingi jekpe-jek Astana ýaqytymen saǵat 20:00-de bastalady. Sessııa «Qazaqstan» telearnasynan tikeleı efırde kórsetiledi.
Osy kúni bizden ekinshi bolyp sharshy alańǵa shyǵatyn boksshymyz – 69 kg salmaqtaǵy Danııar Eleýsinov. Ol 1/4 fınaldyq aıqasyn venesýelalyq Gabrıel Hose Maestrege qarsy ótkizedi. Munyń aldynda Danııar ulybrıtanııalyq Djoshýa Kellıdi 3:0 etip utqan bolsa, onyń búgingi qarsylasy ıtalıan Vınchenso Mangıkapre rıngke shyqpaı qalýy sebepti kelesi kezeńge shaıqassyz ótken edi. Jekpe-jek saǵat 03:30-te «Habar» telearnasynan tikeleı efırde kórsetiledi.
Budan keıin 91 kg salmaqtaǵy Vasılıı Levıt kýbalyq Erıslandı Savonmen jartylaı fınaldyq aıqas ótkizedi. Ol «Habar» telearnasynan saǵat 03:45-te kórsetiledi.
Eń sońynan rıngke asa aýyr salmaqtaǵy Ivan Dychko kóteriledi. Ol óziniń ejelgi qarsylasy ázerbaıjandyq avar jigiti (Reseıden aldyrylǵan) Magomedrasýl Medjıdovpen 1/8 fınaldyq kezdesýin ótkizedi. Urys saǵat 04:00-de bastalady. Bul da «Habar» arnasynan tikeleı efır arqyly beriledi.
Ivan bul qarsylasymen buǵan deıin eki ret ushyrasqan. Onyń birinshisi 2011 jyly Bakýde ótken álem chempıonatynyń jartylaı fınalynda oryn alyp, alań ıesi upaı sanymen jeńiske jetken. Ekinshi reti 2013 jyly Almatyda ótken álem chempıonatynyń fınalyna dóp kelip, ol Medjıdovtiń nokaýt arqyly jeńýimen aıaqtaldy.
Damır QOJAMQUL