Bul kúnderi elimizdiń eki basty qalasy Astana men Almatyda Qytaı Halyq Respýblıkasynan kelgen, quramynda 200-den astam adam bar úlken delegasııa asa mańyzdy mıssııaǵa uıytqy bolýda. «Qytaıman tanysý» dep atalatyn aýqymdy sharalar Uly Jibek joly boıyndaǵy barys-kelisterdi jańǵyrtýǵa baǵyttalǵan.
Bir jaǵynan Almaty qalasynyń 1000 jyldyǵyna arnaıy artynyp-tartynyp kelgen kórshilerimiz Henan, Hýbeı, Sychýan provınsııalarynyń sálemi men dástúrin, óneri men mádenıetiniń bólshegin kótere keldi dese de bolady.
Apta basynda Almatyda osynaý úlken oqıǵa qazaqstandyq BAQ ókilderimen kezdesýden bastaldy. Dúısenbige deıin jalǵasatyn «Qytaımen tanysý» baǵdarlamasy aıasynda týrıstik kórmeler, folklorlyq konsertter, kýng-fý sheberleriniń oıyndary sátimen saltanat qurýda.
Sonyń ishindegi mańyzdy oqıǵanyń biri – Almatydaǵy Ulttyq kitaphanada QHR Memlekettik keńesiniń Baspasóz-keńsesi, QHR Chýnsın qalasynyń Halyq úkimeti Baspasóz-keńsesi, Henan, Hýbeı jáne Sychýan (QHR) aımaqtarynyń ókilderi birige otyryp júzege asyrǵan «Danalyq. О́mir – Qytaıda zııatkerlik deńgeıde jasalǵan-2016» kórmesi. Ári osynaý shara aıasynda «Qytaı mádenıeti men ádebıeti zaly» ashyldy.
Aýyz toltyryp aıtýǵa turarlyq tusaýkeser barysynda Qytaı pavılonyna kórshilerimiz 9 myńǵa jýyq qundy kitaptar men Qytaı mádenıetin áıgilep turatyn buıymdar syılady.
Almatydaǵy Qytaı Halyq Respýblıkasy Bas konsýldyǵynyń qoldaýymen ótken kórme munan bylaıǵy jerde Qytaı pavılonynda turaqty oryn alady.
Endigi jerde «Qytaı mádenıeti men ádebıeti zaly» qazaqstandyqtarǵa kórshi el týraly, onyń mádenıetin, tarıhyn, salt-dástúrin kóbirek bilýge kómektesedi. Zalda turmystyq zattar, mýzykalyq aspaptar, ártúrli baǵyttar boıynsha ádebıetter: anyqtamalyq-ensıklopedııalyq basylymdar, sózdikter, qytaı tilin úırenýge arnalǵan oqýlyqtar, Qytaı týraly tanysý ádebıetteri qoıyldy.
Munan da bólek Ulttyq kitaphanada «Smart life – Created in China-2016» Qytaı Halyq Respýblıkasynyń ǵylymı jáne ındýstrııalyq jetistikteriniń keń aýqymdy aqparattyq kórmesi ótýde.
«Parasattylyq adamdardy baqytty etedi, adamdarǵa álemdi jaqsy túsinýge kómektesedi jáne ómirin jaqsy jaqqa ózgertedi» atty kórmeniń taqyryby EKSPO-2017 qarsańynda óte ózekti. Bul kórme kórshilerimizdiń energııa únemdeý, «jasyl» energetıka salasyndaǵy jáne ǵylym men tehnıka ınnovasııalarynyń qorshaǵan ortaǵa zııansyzdyǵyn kórsetýdi maqsat tutady.
Qazaq tarapy yqylaspen qarsy alǵan sharada QKP OK Nasıhattaý bólimi meńgerýshisiniń orynbasary bastaǵan QHR delegattary, QHR Memlekettik keńesi Baspasóz-keńsesi basshysynyń orynbasary Sýı Iýýı In, QHR Memlekettik keńesi Syrtqy ister basqarmasy basshysynyń orynbasary Jao Shýn Gýo, Chýnsın qalasynyń halyq úkimeti Baspasóz-keńsesiniń basshysy Joý Bo myrzalar sóz sóılep, bul bastamalar eki eldiń tatýlyǵyna qyzmet etedi dedi.
Aınash ESALI,
«Egemen Qazaqstan»
ALMATY