Ár aptanyń sońǵy kúnderi Astananyń mádenı tynys-tirshiligin bir serpiltip tastap júrgen aımaqtardyń elordadaǵy kúnderi jalǵasyn tabýda. El Táýelsizdiginiń 25 jyldyǵy qarsańyndaǵy berekeli hám merekeli sharany ótkizý kezegi Pavlodar oblysyna kelip tur eken. Osyǵan oraı, oblys ákiminiń orynbasary Baýyrjan Qasenovtiń qatysýymen brıfıng ótti.
Baýyrjan Qasenov oblysta atqarylyp jatqan san-salaly jumystardyń barysyna sholý jasap, qol jetkizgen jetistikter barysyn baıandap berdi. Ásirese, agroónerkásip salasyna kóbirek toqtaldy. Jalpy, respýblıka boıynsha ishki jalpy ónimniń 4,8 paıyzy aýyl sharýashylyǵyna tıesili bolsa, Kereký óńirindegi bul kórsetkish 4,9 paıyzdan asyp túsedi eken. Ásirese, mal sharýashylyǵynyń úlesi basym.
Aýyl sharýashylyǵy salasyna ónimdiligi joǵary tehnologııalardy engizý, zamanaýı jabdyqtar alý, jınalǵan ónimdi saqtaý men qaıta óńdeý syndy jumystar júıeli túrde jolǵa qoıylǵan. Jańa mal bordaqylaıtyn alańdar ashylyp, alynǵan ónimderdi óńdeıtin jańa sehtar ashý, burynnan bar sehtardyń jabdyqtaryn jańartý júrgizilýde.
– Bıyl agroónerkásip keshenin damytýǵa 10 mıllıard teńgeden astam ınvestısııa salyndy. 310 jumys orny ashylyp, 15 ınvestısııalyq joba júzege asyryldy. Investısııanyń artýyna memlekettik qoldaýdyń jańa túri – ınvestısııalyq sýbsıdııalaý yqpal etip jatyr, – dedi Baýyrjan Qasenov.
Kúzgi ónim jınaý naýqanyn da oblys oń kórsetkishtermen qorytyndylaıtyn túri bar. Bıyl 800 myń tonnadan astam astyq, 140 myń tonna maıly daqyldar, 400 myń tonnadan astam kartop, 240 myń tonna kókónis, baqsha daqyldary jınalmaq. Jınalǵan astyqty saqtaý men óńdeý de qarastyrylǵan. Oblystaǵy jalpy syıymdylyǵy 1 164 myń tonnaǵa teń elevator, astyq qabyldaý pýnktteri qajettilikti tolyǵymen óteýge tıis.
23-25 qyrkúıekte «Qýatty óńir – qýatty Qazaqstan» aksııasynyń aıasynda «Han Shatyr» saýda oıyn-saýyq ortalyǵynyń aldynda ótetin jármeńkege pavlodarlyq taýar óndirýshiler 700 tonnadan astam ónim ákelipti. Onyń 90 tonnadan astamy et pen et ónimderi, 300 tonnasy kartop, 140 tonnasy kókónis, 150 tonnasy basqa da azyq-túlikter eken.
«Han Shatyr» saýda oıyn-saýyq ortalyǵynyń aldyndaǵy alańda ótetin jármeńkede halyqqa azyq-túlikpen qatar, túrli daıyn taǵamdar da satylmaq. Oblystyq fılarmonııa ártisteri ónerlerin ortaǵa salyp, sharanyń kórigin qyzdyrady, sporttyq sharalar ótedi.
Arnur ASQAR,
«Egemen Qazaqstan»