Tarazda «Báıterek Development» AQ «Nurly jol» memlekettik baǵdarlamasy aıasynda salynyp jatqan kóppáterli turǵyn úıdiń qurylysyn bitirýge taıap qaldy. Bul týraly Tarazda óńirlik kommýnıkasııalar qyzmetinde ótken brıfıngte «Báıterek Development» AQ dırektory Asyljan Kurtaev málim etti.
«Bul úshin nesıege jáne arendaǵa beriletin turǵyn úı qurylysy baǵytyndaǵy negizgi operatorlardyń biri retinde bizdiń aksıonerlik qoǵamǵa 113 mlrd. teńge bólindi. Taǵy 67 mlrd. teńge qurylysty qarjylandyrý úshin jergilikti atqarýshy bılik arqyly qarastyryldy», - dedi A.Qurtaev.
Spıkeriniń sózine qaraǵanda, AQ Tarazda 395 páter qurylysyna ınvestısııa salýǵa jeke qurylys salýshylarmen 5 shart jasasqan jáne 2016-2017 jyldary 22,5 myń sharshy metr turǵyn úı turǵyzýdy josparlap otyr.
Aıta keter jaıt, 1 sharshy metrdiń baǵasy 131 myńnan 145 myń teńge aralyǵynda.
«Arendalyq turǵyn úı ákimdikte tirkelgen áleýmettik jaǵdaı tómen otbasylaryna beriledi. Al aı saıynǵy arendaǵa tólem sharshy metrine 1 110 teńgeden bolmaq», - dep túsindirdi spıker.