Keshe «Tabıǵat» ekologııalyq odaǵynyń tóraǵasy, Qazaqstan prezıdenttigine kandıdat Mels Eleýsizov EQYU-nyń Demokratııalyq ınstıtýttar jáne adam quqyqtary jónindegi bıýrosynyń elimizdegi prezıdenttik saılaýdy baıqaýshylar mıssııasynyń basshysy Daan Evertspen kezdesti.
Kezdesý Astanadaǵy EQYU-nyń Demokratııalyq ınstıtýttar jáne adam quqyqtary jónindegi bıýrosy mıssııasynyń ǵımaratynda ótti. Prezıdenttikke kandıdat pen mıssııa basshysynyń kezdesýi ózara túsinistik jaǵdaıynda ótip, onyń barysynda naýqanǵa qatysty máseleler sóz boldy.
Osy rette mıssııa týraly birer sóz aıta ketken lázim. Ol elimizde ústimizdegi jyldyń 3 sáýirinde kezekten tys ótetin prezıdenttik saılaý barysyn baıqaý úshin qurylǵan. Onyń quramynda 15 sarapshy bolsa, olar Almaty jáne Astana qalalarynda shoǵyrlanatyn bolady, sonymen qatar, jer-jerde saılaýǵa deıin bir aı qalǵanda 28 uzaq merzimdi baıqaýshylar da jumys isteıdi. Atalǵan mıssııa EQYU-ǵa qatysýshy memleketterdiń atynan 400 qysqa merzimdik baıqaýshy jiberýdi kózdeıdi.
Mıssııa saılaýdyń EQYU prınsıpterine jáne halyqaralyq demokratııa úlgisine sáıkestigin, sonymen qatar, memleket zańnamasyna sáıkestigin baǵalaıtyn bolady. Baıqaýshylar sondaı-aq saıası úgit jumystarynyń barysyn, saılaý zańnamasynyń saqtalýyn, buqaralyq aqparat quraldarynda jarııalanýy jaǵdaıyn, saılaý komıssııalary men basqa da mańyzdy memlekettik qurylymdar jumysyn jan-jaqty baqylaıdy.
Asqar TURAPBAIULY.