2016 jyldyń sońyna taman Tokıodan shyǵatyn «Japonııa jáne Eýrazııa» gazetiniń redaksııasynan hat kelgen edi. «2017 jylǵy gazettiń alǵashqy sanyn Astana qalasynda ótetin EKSPO kórmesi týraly maqalamen ashsaq degen josparymyz bar. Halyqaralyq kórmege Qazaqstannyń daıyndyǵy, halyqtyń atalǵan sharaǵa degen yqylasy jóninde maqala daıarlap berseńiz degen tilegimiz bar» dep jazylypty hatta.
Respýblıkanyń álemdik dárejedegi bedelin aıǵaqtaıtyn aıtýly shara týraly japon oqyrmandary da bilsin degen nıetpen EKSPO-2017 týraly jazbaqqa qýana-qýana kelistim. «Japonııa-Eýrazııa» dep atalatyn, 1957 jyly qurylǵan iri uıym shyǵaratyn bul basylym Japonııanyń barlyq aımaǵyna keńinen taraıdy. Uıymnyń Aıchı, Ishıkava, Osaka, Hokkaıdo, Kıoto, Hırosıma, Kanagava sekildi óńirlerde bólimsheleri jumys isteıdi. «Japonııa-Eýrazııa» uıymynyń maqsaty Eýrazııa, Ortalyq Azııa elderimen Japonııanyń mádenı yntymaqtastyǵyn nyǵaıtý, elaralyq dostyqty damytý.
Astanada ótetin EKSPO-ny tanystyrý maqsatyndaǵy maqalamyz «Japonııa jáne Eýrazııa» gazetiniń 2017 jylǵy alǵashqy sanynyń birinshi betine jarııalanypty. Kartadaǵy Qazaqstan men Astanadaǵy EKSPO qalashyǵynyń sýreti de basylǵan. «Astana kórmesi. Qazaq eline qosh keldińiz!» degen arnaıy aıdar taǵylyp, «Bolashaqtyń energııasy: Kún energııasy, Jel energııasy» taqyrybymen jarııalanǵan maqalada atalmysh shara týraly barynsha mol aqparat berýge tyrystyq. 1997 jyldan beri elorda sanalatyn Astana jaıynda sóz qozǵadyq. EKSPO sımvolynyń mánine toqtaldyq. Jer aýmaǵy boıynsha álemde toǵyzynshy oryn alatyn respýblıkanyń ekonomıkalyq áleýeti men damý qarqynyna sholý jasadyq. Qazba baılyǵy mol, jeri sııaqty peıili de darhan Qazaq eli Ortalyq Azııa tórindegi Astana shaharynda ótetin kórmede barshany ystyq yqylaspen qarsy alý úshin qyzý daıyndalyp jatqanyn eske saldyq. Maqala «Peıili keń, dastarqany mol Qazaqstanda sizderdi kútemiz!» degen sóılemmen aıaqtalǵan.
Gazettiń osy sanynda Japonııa azamattarynyń Qazaqstan týraly oı-pikirleri de jarııalanǵan.
Sharafat JYLQYBAEVA,
japontanýshy, jýrnalıst
ALMATY